“Xəzər dənizi hər kəsin ortaq sərvətidir” - Abşeron Milli Parkında “Xəzər festivalı” keçirilib

Bakı:

4 °C

65 %

7 m/s

AZ RU EN

Ana səhifə / Xəbər lenti / “Xəzər dənizi hər kəsin ortaq sərvətidir” - Abşeron Milli Parkında “Xəzər festivalı” keçirilib

“Xəzər dənizi hər kəsin ortaq sərvətidir” - Abşeron Milli Parkında “Xəzər festivalı” keçirilib

28.09.2024 [20:16]

Sentyabrın 28-də Abşeron Milli Parkında Ümumdünya Dəniz Günü ilə əlaqədar Xəzər həftəsi çərçivəsində "Xəzər festivalı" keçirilib.

AZƏRTAC xəbər verir ki, festivalda Ekologiya və Təbii Sərvətlər Nazirliyinin rəsmiləri, beynəlxalq təşkilatların və səfirliklərin nümayəndələri, milli parkı ziyarət edən turistlər, məktəblilər iştirak ediblər.

Festivalın açılış mərasimində çıxış edən ekologiya və təbii sərvətlər nazirinin müavini Vüqar Kərimov son 20 ildə Xəzər dənizinin hər il öz səviyyəsini itirdiyini bildirib. Qeyd olunub ki, 1995-ci illə müqayisədə Xəzərin səviyyəsində 2,5 metrdən çox azalma müşahidə olunub. Hər il isə 7,5-8 santimetr azalma qeydə alınır. Bu özü ilə birlikdə bir sıra problemlər yaradır. Belə ki, həm su biomüxtəlifliyinin mühafizəsi baxımından, həm sahilboyu ərazilərdə problemlər müşahidə olunur. Azalmanın qarşısının alınması istiqamətində tədbirlərin görülməsi və azalma davamlı olarsa, buna uyğunlaşma tədbirlərinin həyata keçirilməsi ilə bağlı ən müxtəlif müstəvilərdə müzakirələr aparılır. Azərbaycan da həmin müzakirələrin ən aktiv iştirakçılarından biridir.

Xəzərin problemlərinə ictimaiyyətin diqqətinin çəkilməsi məqsədilə keçirilən tədbirlərdən bəhs edən Vüqar Kərimov deyib: "1978-ci ildən etibarən hər il dünyada Ümumdünya Dəniz Günü qeyd olunur. Azərbaycanda da son bir neçə ildir sentyabrın son həftəsi "Xəzər həftəsi" elan edilib. "Xəzər festivalı" da "Xəzər həftəsi" çərçivəsində təşkil olunan və maarifləndirmə xarakteri daşıyan tədbirlər sırasındadır. Məlum olduğu kimi, noyabrda Bakı iqlim dəyişmələrinin yaratdığı problemlərin və onun təsirinin aradan qaldırılması ilə bağlı müzakirələrin aparılacağı baş platforma olacaq. Xəzərin problemləri də COP29-un panellərində müzakirə olunacaq əsas məsələlərdən biridir".

FAO-nun Azərbaycandakı nümayəndəsi Muhammad Nasar Hayat dəniz həyatının ətraf mühit üçün əhəmiyyət kəsb etdiyini, Xəzər dənizinin hər kəsin ortaq sərvəti olduğunu bildirib.

Azərbaycanda keçiriləcək COP29 tədbirindən danışan M.N.Hayat fikirlərinə belə davam edib: "Bu il Azərbaycan və bütün dünya üçün çox mühümdür. Belə ki, noyabrda Azərbaycanda COP29 keçiriləcək. Biz artıq torpaq, su və havanın çirklənməsi məsələlərinin müzakirəsi ilə bağlı tez-tez bir araya gəlirik. Müzakirələrin hər kəs üçün faydalı olacağına ümidvaram".

Festivalda iştirakdan məmnun olduğunu bildirən BMT İnkişaf Proqramının Azərbaycandakı rezident nümayəndəsinin müavini Slobodan Tadic BMT-nin İnkişaf Proqramının enerji və ətraf mühit sahələrində son dərəcə fəal olduğunu, milli adaptasiya planlarını dəstəklədiklərini deyib: "Biz ətraf mühit və enerji sahələrini əhatə edən bir çox tədbir keçirmişik. Bu gün burada hər kəs, hətta uşaqlar da sahib olduğumuz təbii resursların varlığını qeyd edir. Xəzər dənizi də həmin resurslardan biridir. Biz görürük ki, burada mühüm dərəcədə anlayış, qətiyyət və stabillik mövcuddur. Bizim bu il də mühüm məqsədlərimiz var. COP29 yalnız Azərbaycan üçün deyil, bütün qlobal dünya üçün mühümdür. Bunu dəstəkləməyə, bu tədbirə töhfə verməyə, öz təcrübəmizi bölüşməyə çox şadıq".

Festival çərçivəsində müxtəlif qurumların nümayəndələrinin, mütəxəssislərin iştirakı ilə Xəzər dənizinə həsr olunan dəyirmi masa keçirilib.

Gənc rəssamlar Xəzər dənizi ilə bağlı rəsmlər çəkiblər. Parkı ziyarət edən turistlər festivalda təşkil olunan maarifləndirici guşələrlə yaxın tanış olub, gənc rəssamların stendlərini izləyiblər.

Festivalda, həmçinin veloyürüş keçirilib, yoqa, canlı musiqi, uşaqlar üçün Xəzərin ekosistemi ilə bağlı təlimlər təşkil olunub.

Paylaş:

Baxılıb: 439 dəfə