Etibarlı tərəfdaş

Bakı:

20 °C

88 %

10 m/s

Əlaqə

AZ RU EN

Ana səhifə / YAP xəbərləri / Etibarlı tərəfdaş

Etibarlı tərəfdaş

15.12.2023 [11:53]

Ölkəmizin enerji sahəsində gələcək planları qaz təchizatının coğrafiyasını daha da genişləndirmək və gələcəkdə Avropa məkanında yeni yaradılacaq interkonnektorlar vasitəsilə yeni ölkələrin bazarlarına çıxmaqdır. Azərbaycanın əsas iqtisadi hədəflərindən biri də bərpaolunan enerji növləri ilə bağlıdır. Bununla əlaqədar olaraq 10 qiqavat bərpaolunan enerji növlərinin yaradılması üzrə ölkəmiz tərəfindən investorlarla sazişlər və anlaşma memorandumları imzalanmışdır.

Dekabrın 10-da Serbiyanın Niş şəhərində Serbiya-Bolqarıstan Qaz İnterkonnektorunun açılış mərasimində çıxışı zamanı da Prezident cənab İlham Əliyev bu mövzuda fikir bildirərkən qeyd etdi ki, Azərbaycanın zəngin neft və qaz resursları olmasına baxmayaraq, ölkəmiz öz gələcəyini təmiz yaşıl enerjinin istehsalında və ixracında görür.

Azərbaycanın bütövlükdə enerji strategiyası uğurla icra edilir. Ölkəmiz tərəfindən irəli sürülmüş və icra edilmiş layihələr Avropanın və Asiyanın - Avrasiyanın enerji xəritəsini böyük dərəcədə yenidən tərtib etmişdir. Strateji əhəmiyyət kəsb edən neft kəmərləri olan Bakı-Tbilisi-Ceyhan, Bakı-Supsa neft kəmərləri bu gün Azərbaycan neftini Aralıq dənizinin və Qara dənizin bazarlarına çatdırır. Həmçinin uzunluğu 3500 kilometr olan nəhəng infrastruktur layihəsi Cənub Qaz Dəhlizi Avropanın enerji təhlükəsizliyinə çox böyük töhfə verir. Məhz bütün bunların nəticəsi olaraq Avropa Komissiyası ölkəmizi etibarlı tərəfdaş və Pan-Avropa qaz təchizatçısı kimi dəyərləndirir. Bu əsasda ölkəmizin Serbiya və Bolqarıstanla da çox yüksək əlaqələri formalaşmışdır. Serbiya-Bolqarıstan Qaz İnterkonnektorunun fəaliyyəti ölkələrimizin sənaye inkişafına böyük töhfə verəcəkdir.

Dekabrın 10-da Serbiyanın Niş şəhərində Serbiya-Bolqarıstan Qaz İnterkonnektorunun açılış mərasimində Bolqarıstan Prezidenti Rumen Radevi çıxışında ölkəmizlə əlaqədar vacib mesajlar səsləndirilmişdir. Bolqarıstan Prezidenti bildirmişdir ki, ölkələrimiz bu gün yalnız təbii qaz şəbəkələrini birləşdirmir. Çünki Bolqarıstan–Serbiya interkonnektoru yalnız infrastruktur layihəsi deyil. Bu, ölkələrimizin artan texnoloji imkanlarının, həmçinin Serbiya-Bolqarıstan, Bolqarıstan-Serbiya-Azərbaycan arasındakı uğurlu və faydalı əməkdaşlığın rəmzidir. Serbiya-Bolqarıstan Qaz İnterkonnektoru Avropanın enerji xəritəsini dəyişdirir və yalnız iştirakçı ölkələr üçün deyil, bütün region üçün şaxələndirməyə və təhlükəsizliyə zəmanət verir.

Məhz bu interkonnektor sayəsində Bolqarıstan, Azərbaycan qazını qəbul edə bildi. Bununla bağlı hələ on il öncə anlaşma əldə edilib. O vaxt Bolqarıstan nə Avropadan, nə də ki, Azərbaycandan fiziki qaz qəbul edə bilmirdi. Bolqarıstan Prezidenti Rumen Radevi öz çıxışı zamanı Prezident cənab İlham Əliyevə öz təşəkkürünü bildirərək qeyd etdi ki, Azərbaycan bütün anlaşma və razılıqlara ciddi yanaşır. Bolqarıstan Prezidenti onu da vurğuladı ki, o avropalı həmkarları ilə görüşlərində Azərbaycanın etibarlı tərəfdaş olduğunu hər dəfə bildirir.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 670 dəfə