Əməkdaşlıq genişlənir

Bakı:

20 °C

94 %

8 m/s

Əlaqə

AZ RU EN

Ana səhifə / YAP xəbərləri / Əməkdaşlıq genişlənir

Əməkdaşlıq genişlənir

18.09.2023 [16:02]

İstər rəsmi, istərsə də işgüzar görüşlərində, müxtəlif beynəlxalq tribunalardan etdiyi çıxışlarında Azərbaycanın milli və dövlət maraqlarını daim ifadə edən Prezident İlham Əliyevin siyasi uzaqgörənliyi, diplomatik gedişləri ölkəmizin mövqelərini davamlı olaraq gücləndirir. Ölkə Prezidenti Azərbaycanın dövlət siyasətini milli maraqlar çərçivəsində beynəlxalq siyasi və iqtisadi proseslərlə uzlaşdırır, konstruktiv, beynəlxalq hüququn norma və prinsiplərinə əsaslanan, regional və qlobal miqyasda sabitliyə xidmət edən siyasi xətt yürüdür.

Cari ildə iki dəfə Tacikistan Respublikasına səfər edən ölkə başçısının imzaladığı sənədlər iki ölkə arasında münasibətlərin strateji xarakter aldığını göstərir.

Məlumdur ki, Mərkəzi Asiya ölkələri ilə Azərbaycanı ortaq mədəni köklər və iqtisadi əlaqələr birləşdirir. Bu region ölkələrinin əksəriyyətinin tükdilli dövlətlər olması, eyni zamanda Azərbaycanla din, dil və ortaq tarixə malik olması bu ölkələrlə əlaqələrin genişləndirilməsini tələb edir. Ölkəmizin başçısı cənab İlham Əliyevin xarici siyasətdə yürütdüyü bu xətt artıq əhəmiyyətli dərəcədə özünü büruzə verməkdədir.

Sentyabrın 14-də cənab Prezident İlham Əliyev Tacikistanda keçirilən Mərkəzi Asiya Dövlət Başçılarının 5-ci Məşvərət görüşündə fəxri qonaq qismində iştirak edib. İlk dəfədir ki, Məşvərət görüşünə regiondankənar ölkənin rəhbəri dəvət olunub. Bu, dövlətimizin başçısının şəxsi nüfuzunun, ölkəmizin beynəlxalq arenada sülhün və təhlükəsizliyin təmin edilməsinə, əməkdaşlığın genişlənməsinə töhfələrinə verilən yüksək qiymətin bariz nümunəsidir.

Tədbirdə çıxış edən ölkə başçısı qeyd etmişdir ki, Mərkəzi Asiya və Azərbaycan artan iqtisadiyyatı, demoqrafiyası və geosiyasi potensialı ilə dünya siyasətində strateji əhəmiyyətə malik olan vahid tarixi-mədəni coğrafi regiondur. Bu mənada regional əməkdaşlığın yeni formatı ölkələrimizin və xalqlarımızın daha da yaxınlaşmasına zəmin yaradacaqdır. Bu tendensiyanın davamlı və inkişaf edən olmasını qeyd edən cənab Prezident demişdir: “İkitərəfli əməkdaşlığın mühüm meyarlarından biri qarşılıqlı ticarətin və sərmayələrin artımıdır. Sevindirici haldır ki, həmin iki istiqamət üzrə göstəricilər davamlı artıma malikdir. Keçən il Azərbaycanın Mərkəzi Asiya ölkələri ilə ticarət dövriyyəsi 3 dəfədən çox, bu ilin 7 ayı ərzində isə daha 50 faiz artıb. Birgə sərmayə fondları yaradılıb, növbəti 3 il üzrə 1 milyard dollardan artıq qarşılıqlı sərmayələrin həcmi razılaşdırılıb. Biz artıq sənaye əməkdaşlığı, maşınqayırma, avtomobil sənayesi, gəmiqayırma, kənd təsərrüfatı, xüsusən də pambıqçılıq, ipəkçilik, bağçılıq və heyvandarlıq sahələrində çoxsaylı layihələri həyata keçiririk. Mehmanxana işi və turizm sahəsindəki sərmayə layihələri ilk icra mərhələsindədir. Biz Mərkəzi Asiyadan olan şirkətlərin bu yaxınlarda Azərbaycanda yaradılmış Ələt Azad İqtisadi Zonasına marağını görürük.”

Ölkəmizin başçısı xüsusi vurğulamışdır ki, logistika və nəqliyyat sahəsində Azərbaycanın mövcud potensialı region ölkələrinin Avropaya birbaşa çıxışına imkan verir. Bu gün Azərbaycanın mövcud imkanları Mərkəzi Asiya ölkələri üçün açıqdır. “Mərkəzi Asiya ölkələrindən yük göndərənlərin artan tələbatını nəzərə alaraq, gəmiqayırma zavodunun imkanlarının genişləndirilməsi üzərində fəal işlər aparılır. Yeni sərmayə layihələri başa çatdıqdan sonra istehsal olunan tanker və quru yükdaşıyan gəmilərin sayı bu gün ildə 6 gəmidən 10-15 gəmiyə qədər artacaq”.

Ölkələrimiz arasında əməkdaşlığın yeni sahəsi olan fiber-optik infrastrukturun yaradılmasına yönəlmiş “Rəqəmsal İpək Yolu” layihəsinin üzərində çalışmaların davam etdiyini bildirən cənab Prezident bundan sonra da region ölkələri ilə əmkdaşlığın davam və inkişaf etdiriləcəyini qeyd etmişdir.

Azərbaycan Şərqlə Qərb arasında, o cümlədən Mərkəzi Asiya ölkələri üçün mühüm tranzit ölkə və etibarlı tərəfdaş rolunu oynayan Azərbaycan öz potensialından səmərəli istifadə etməklə bərabər, dost və qardaş ölkələrin iqtisadi inkişafı üçün imkanlar yaratmaqda davam edəcəkdir.

Natiq Quluzadə,

YAP Zəngilan rayon təşkilatının sədri

Paylaş:

Baxılıb: 773 dəfə