Azərbaycan Ordusu öz gücünü bütün dünyaya göstərdi

Bakı:

20 °C

83 %

3 m/s

Əlaqə

AZ RU EN

Ana səhifə / YAP xəbərləri / Azərbaycan Ordusu öz gücünü bütün dünyaya göstərdi

Azərbaycan Ordusu öz gücünü bütün dünyaya göstərdi

07.04.2023 [11:34]

Vüsal Hüseynov- YAP Xocavənd rayon təşkilatının sədri

Şanlı Ordumuz nəyə qadir olduğunu 44 günlük Vətən müharibəsində bütün dünyaya göstərdi. Müzəffər Ali Baş Komandan İlham Əliyevin rəhbərliyi ilə ordumuz 30 ildir icra olunmayan BMT qətnamələrini özü icra edərək, tarixi ədaləti bərpa etdi.

Əsgərlərimizin hər biri 44 gün ərzində böyük qəhrəmanlıq nümayiş etdirdi. Hətta Ordumuzun istifadə etdiyi uğurlu taktikalar dünyanın aparıcı ölkələrinin dərsliklərinə belə salındı. Əlbəttə ki, heç bir uğur təsadüfi deyil. Yaxın tarixə nəzər salsaq, Azərbaycan Ordusunun inkişaf dinamikasında da Ulu Öndər Heydər Əliyevin imzasını görmək olar.

Silahlı qüvvələrimiz hər il yeni silahlarla təchiz olunaraq qüvvətlənib. Heydər Əliyev Qarabağın işğaldan azad olunması üçün ordunun güclənməsi üçün bütün lazımi addımları atırdı. Uzaqgörən liderin Ordumuz haqqında 28 may 1999-cu ildə xalqa müraciətində dediyi söz bu gün də öz aktuallığını qoruyur: “Azərbaycan Milli Ordusu bu gün Azərbaycanı hər bir hadisədən qorumağa qadirdir, Azərbaycanın müstəqilliyinin, dövlətçiliyinin keşiyində durubdur”.

Prezident İlham Əliyevin hakimiyyəti dövründə ordu quruculuğu prioritet sahə elan edildi. Ötən illər ərzində ordumuz ən müasir silahlarla təchiz edildi, hərbçilərimizin döyüş bacarıqlarının inkişaf etdirilməsi üçün beynəlxalq standartlara cavab verən təlimlər keçirildi. Dünyanın aparıcı ölkələrinin ordularınım döyüş və müharibə bacarıqları öyrənildi. Bütün bunların məntiqi nəticəsi isə özünü Vətən müharibəsində göstərdi. Hər il qüvvətlənən Azərbaycan Ordusu 44 gün ərzində Ermənistanın “məğlubedilməz” hesab etdiyi ordusunu darmadağı etdi. Müharibə boyunca ən müasir silahlardan və hərbi texnikalardan istifadə edən əsgərlərimiz 30 ildir həsrətində olduğumuz Qarabağı işğaldan azad etdi. Ermənistanda onminlərlə fərari oldu, əsgərlər döyüş meydanını qoyub qaçdı, hətta Azərbaycan əsgərinin qarşısına çıxmaqdan qorxduqları üçün müharibəyə qatılmaqdan boyun qaçırdılar. Lakin Azərbaycanda bunların heç biri yaşanmadı. Vətənpərvər ruhda böyüyən gənclərimiz müharibəyə getmək üçün könüllü olaraq müraciət etdilər. Müharibə dönəmində bir nəfər belə fərari olmadı. Ali Baş Komandan İlham Əliyevin də dediyi kimi, Azərbaycan Ordusu öz gücünü bütün dünyaya göstərdi:

“Bu gün bizim ordumuz dünya miqyasında güclü ordular sırasındadır. Biz bütün dünyaya göstərmişik ki, yenilməz xalq Azərbaycan xalqıdır, müzəffər ordu Azərbaycan Ordusudur. Erməni mifini məhv etdik, erməni uydurmalarını məhv etdik, onları yerinə oturtduq, onlar bizim qabağımızda diz çöküblər və onlar bundan sonra bu damğa ilə yaşayacaqlar, rəzalət damğası ilə yaşayacaqlar. Biz isə bundan sonra qürur hissi ilə yaşayacağıq - müzəffər xalq kimi, güclü dövlət kimi, yenilməz ordu kimi, güclü iradə sahibi kimi”.

Müharibəki zəfərimizdən sonra bölgədə yaranan yeni geosiyasi reallıqlar bəzi ölkələri narahat edir. İran hətta Azərbaycanı təhdid edəcək qədər həddini aşdı. Ancaq Azərbaycanda dövlət-xalq birliyi, güclü orduya olan etibar ərazi bütövlüyümüzü, suverenliyimizi təhdid edən bütün qüvvələrə tutarlı cavabdır.

Paylaş:

Baxılıb: 589 dəfə