Tarixi torpağımız, dilbər guşələrimizdən olan Kəlbəcərin işğaldan azad edilməsindən iki il ötür

Bakı:

24 °C

63 %

10 m/s

AZ RU EN

Ana səhifə / YAP xəbərləri / Tarixi torpağımız, dilbər guşələrimizdən olan Kəlbəcərin işğaldan azad edilməsindən iki il ötür

Tarixi torpağımız, dilbər guşələrimizdən olan Kəlbəcərin işğaldan azad edilməsindən iki il ötür

25.11.2022 [11:06]

Bildiyimiz kimi, 44 günlük Vətən müharibəsi xalqımızın böyük Zəfəri ilə başa çatdı. Vətən müharibəsində əldə etdiyimiz qələbə nəticəsində imzalanmış üçtərəfli bəyanata əsasən, noyabrın 25-də Kəlbəcər rayonu Azərbaycana təhvil verildi. Kəlbəcər şəhəri də daxil olmaqla, rayonun 147 yaşayış məntəqəsi bir güllə atılmadan, hərbi əməliyyat keçirmədən işğaldan azad edildi.
Tarixi torpağımız, dilbər guşələrimizdən olan Kəlbəcərin işğaldan azad edilməsindən iki il ötür. Kəlbəcər rayonu 1993-cü il aprelin 2-də işğal olunub. İşğal nəticəsində 511 dinc sakin öldürülüb, 321 nəfər əsir götürülüb və itkin düşüb. 60 min kəlbəcərli respublikanın 56 rayonunun 770 yaşayış məntəqəsində müvəqqəti məskunlaşmağa məcbur olub. İşğal nəticəsində onlarla tarixi-mədəniyyət abidəsi, 97 məktəb, 9 uşaq bağçası, 116 kitabxana, 43 klub, 42 mədəniyyət evi, tarix-diyarşünaslıq muzeyi, 9 xəstəxana, 75 tibbi məntəqə, 23 ambulatoriya, 9 aptek, yüzlərlə inzibati bina, minlərlə mənzil, yüzlərlə maşın, texnika və sair talan edilib, dağıdılıb və rayonun milyardlarla manatlıq sərvəti Ermənistana daşınıb.
Kəlbəcərin işğalından sonra BMT Təhlükəsizlik Şurasının iclasında 822 saylı Qətnamə qəbul edilib ki, bu Qətnamədə bütün işğalçı qüvvələrin Kəlbəcər və Azərbaycanın digər işğal olunmuş rayonlarından dərhal çıxarılması tələb olunurdu. Lakin Ermənistan bu Qətnaməni icra etmədi, beynəlxalq təşkilatlar isə onun icrasını tələb etmədi. 27 ildən artıq müddətdə dünyanın ən böyük təsisatlarından olan BMT-nin Qətnaməsi kağız üzərində qaldı.
Nəhayət, Azərbaycan xalqı 2 il bundan öncə özü beynəlxalq qanunların aliliyini və tarixi ədaləti bərpa etdi.
27 sentyabr 2020-ci ildə başlanan Vətən savaşında müzəffər Ordumuz Ermənistan ordusunu diz çökdürdü. Vətən müharibəsində əldə etdiyimiz qələbə nəticəsində imzalanmış üçtərəfli bəyanata əsasən, noyabrın 25-də Kəlbəcər rayonu Azərbaycana təhvil verildi. Kəlbəcər şəhəri də daxil olmaqla, rayonun 147 yaşayış məntəqəsi işğaldan azad edildi. Bununla həm də Azərbaycan BMT Qətnaməsinin tələbini özü reallaşdırmış oldu.
2020-ci il noyabrın 26-da “Kəlbəcərin azad olunmasına görə” medalı təsis edilib. Müzəffər Ali Baş Komandan, Prezident İlham Əliyevin sərəncamları ilə Kəlbəcər rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş Azərbaycan Respublikası Silahlı Qüvvələrinin 9424 hərbi qulluqçusu “Kəlbəcərin azad olunmasına görə” medalı ilə təltif olunub.
Ölkəmizin cənub-qərb bölgəsinin zirvəsi hesab olunan Kəlbəcər rayonu dəniz səviyyəsindən 1500-3800 metr yüksəklikdə Tərtər çayı vadisində yerləşən Kəlbəcər qədim dövrün yaşayış məskəni olmaqla, çox zəngin flora və faunası olan bir təbiət muzeyidir. Azərbaycanın ən mənzərəli və şəfa mənbəli rayonlarından biridir, burada tanınmış İstisu və digər çoxsaylı mineral bulaqlar, qızıl da daxil olmaqla, saysız-hesabsız təbii sərvətlər yerləşir. Kəlbəcər təbiətində dünyada nadir sayılan dərman bitkiləri, ağaclar da yer alır.
Kəlbəcər rayonu füsunkar təbiətə, zəngin mədəni irsə malikdir. Kəlbəcər bizim qədim torpağımızdır. Kəlbəcər ərazi baxımından bizim ən böyük rayonlarımızdan biridir. Kəlbəcərin tarixi abidələri bizim böyük sərvətimizdir.
Buna görə də bizim böyük Qələbəmiz təkcə Ermənistan dövləti üzərində əldə edilmiş qələbə deyil, biz erməni faşizmini məhv etdik deyə bilərik.
Kəlbəcər işğaldan azad ediləndən sonra 2021-ci il avqustun 16-da Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyev və birinci xanım Mehriban Əliyeva Kəlbəcər rayonunda səfərdə oldular və Prezident İlham Əliyev Kəlbəcərdə Azərbaycan bayrağını qaldırdı. Ölkə başçısının rəhbərliyi ilə işğaldan azad edilən bütün ərazilərdəki kimi Kəlbəcər rayonunda da böyük quruculuq işləri aparılır.
Səfər çərçivəsində Toğanalı-Kəlbəcər avtomobil yolu üzərində Murovdağda inşa olunacaq tunelin təməli qoyulub. Bununla da Göygöl və Kəlbəcər rayonlarını yeni yol birləşdirəcəkdir. Həmin gün 110/35/10 kilovoltluq “Kəlbəcər” yarımstansiyasının açılışı və Kəlbəcər-Laçın avtomobil yolu üzərində inşa olunacaq tunelin təməli qoyuldu.
Ölkə başçısının Kəlbəcər rayonuna ikinci səfəri bu ilin 26 iyun tarixində baş tutmuşdur. Səfər zamanı Prezident cənab İlham Əliyev “Kəlbəcər-1” Kiçik Su Elektrik Stansiyasının və hərbi hissələrin açılış, İşğal və Zəfər muzeyləri kompleksinin, “İstisu” mineral su zavodunun, eyni adlı sanatoriyanın, Rəqəmsal İdarəetmə Mərkəzinin təməlqoyma mərasimlərində iştirak etmiş, həmçinin Kəlbəcər-Laçın avtomobil yolunun, “Çıraq-1” Kiçik Su Elektrik Stansiyasında tikinti işlərinin gedişi və Kəlbəcər Şəhərinin Baş planı ilə tanış olmuşdur.
Bu gün əminliklə deyə bilirik ki, görülən işlər yaxın zamanlarda kəlbəcərlilərin doğma yurd-yuvalarına qayıdışını reallaşdıracaqdır.

Həbib Misirov
YAP Kəlbəcər rayon təşkilatının sədri