Güvən və Etibarlı əməkdaşlıq nümunəsi: Azərbaycan-Gürcüstan münasibətlərinin 30 ili

Bakı:

17 °C

77 %

2 m/s

Əlaqə

AZ RU EN

Ana səhifə / YAP xəbərləri / Güvən və Etibarlı əməkdaşlıq nümunəsi: Azərbaycan-Gürcüstan münasibətlərinin 30 ili

Güvən və Etibarlı əməkdaşlıq nümunəsi: Azərbaycan-Gürcüstan münasibətlərinin 30 ili

31.10.2022 [09:44]

Azərbaycan və Gürcüstan münasibətləri tarixboyu mehriban qonşuluq, qarşılıqlı etibar və inama bağlı olmuşdur. Belə ki, iki ölkə arasında strateji tərəfdaşlığın əsasını qoymuş 8 mart 1996-cı il tarixində imzalanmış “Azərbaycan Respublikası ilə Gürcüstan arasında dostluq, əməkdaşlıq və qarşılıqlı təhlükəsizliyin möhkəmləndirilməsi haqqında Müqavilə”, eləcə də 4 mart 2004-cü il tarixli “Azərbaycan Respublikası və Gürcüstan arasında Birgə Bəyannamə” yuxarıda qeyd etdiklərimizin bariz nümunəsidir. Bu günə qədər İki ölkə arasında 109 sənəd imzalanmışdır.

Sovetlərin dağılmasından dərhal sonra 1991-ci ildə Gürcüstan Azərbaycanın müstəqilliyini tanıdı. İki ölkə arasında diplomatik münasibətlər Partiyamızın 18 noyabr 1992-ci il tarixində qurulmuşdur. 18 gün sonra Azərbaycan-Gürcüstan arasında diplomatik münasibətlərin 30 ili qeyd ediləcək. Bu tarix iki ölkə arasında münasibətlərin daha güclü inkişafa töhfə verəcəkdir.

Azərbaycan Respublikası Prezidentinin 17 noyabr 2009-cu il tarixli Sərəncamı ilə Gürcüstanın Batumi şəhərində Azərbaycan Respublikasının Baş Konsulluğu təsis edilmiş və 03 dekabr 2010-cu il tarixdən Baş Konsulluq rəsmi fəaliyyətə başlamışdır. Gürcüstanın Azərbaycandakı səfirliyi 1995-ci ilin fevral ayından etibarən fəaliyyət göstərir. Gəncə şəhərində Gürcüstanın Baş konsulluğu 12 dekabr 2013-cü il tarixində rəsmi fəaliyyətə başlamışdır.

30 il ərzində Azərbaycan-Gürcüstan əlaqələri uğurla və sürətlə inkişaf edib və hazırda yeni mərhələyə daxil olub. Ötən həftə Azərbaycan Respublikası Prezidenti İlham Əliyev cənablarının Gürcüstana səfəri, aparılan müzakirələr, danışıqlar bir daha onu təsdiqləyir ki, iki ölkə arasında münasibətlərin parlaq gələcəyi vardır:

“Bizim siyasi əlaqələrimiz yüksək səviyyədədir, müntəzəm olaraq yüksək səviyyəli görüşlər keçirilir, məsləhətləşmələr aparılır. Biz beynəlxalq təşkilatlar çərçivəsində bir-birimizi daim dəstəkləyirik. Gürcüstan və Azərbaycan bütün beynəlxalq təşkilatlarda ərazi bütövlüyü məsələləri ilə bağlı daim həmrəylik göstərir və bir-birini dəstəkləyir.”

Bu mənada, Prezident İlham Əliyevin Azərbaycan-Gürcüstan münasibətlərinin tarixinə nəzər salaraq, bu əlaqələrin tarixi köklərinin nə qədər sağlam olduğunu vurğuladı:

“Xalqlarımız əsrlər boyu bir-birinin yanında olmuşdur, bir yerdə olmuşdur. Biz həmişə dostluq, qardaşlıq şəraitində yaşamışıq. Bu gün də dostluq və qardaşlıq əlaqələrimiz bizim dövlətlərarası əlaqələrimiz üçün əsas amildir. Biz dövlətlərarası əlaqələri bu möhkəm təməl üzərində qururuq. Bu gün Gürcüstan və Azərbaycan bütün sahələrdə çox uğurla əməkdaşlıq edir.”

İki ölkə arasında əməkdaşlığın böyük hissəsi karbo-hidrogen sektoruna aiddir. Bu əməkdaşlığın böyük tarixi var və qarşılıqlı səylərlə çox böyük layihələri icra edilib. 1990-cı illərin sonlarında Bakı-Supsa neft kəmərinin tikintisi o dövr üçün çox böyük hadisə idi. Bu kəmərlə Xəzər dənizi Qara dənizlə neft kəməri ilə birləşdi və yeni imkanlar yarandı. Daha sonra Bakı-Tbilisi-Ceyhan neft, Bakı-Tbilisi-Ərzurum və TANAP qaz kəmərləri tikildi. Bütün bu layihələr Azərbaycan və Gürcüstanın birbaşa iştirakı və töhfələri reallaşdı.

İki ölkə arasında münasibətlər təkcə energetik yox digər sahələrdə də bu gün uğurla inkişaf edir.

Paylaş:

Baxılıb: 628 dəfə