Dövlətimizin daha da qüdrətlənməsi naminə Yeni Azərbaycan Partiyasına səs verin!

Bakı:

13 °C

94 %

5 m/s

Əlaqə

AZ RU EN

Ana səhifə / YAP xəbərləri / Dövlətimizin daha da qüdrətlənməsi naminə Yeni Azərbaycan Partiyasına səs verin!

Dövlətimizin daha da qüdrətlənməsi naminə Yeni Azərbaycan Partiyasına səs verin!

20.10.2010 [09:30]

Hakim partiyanın 97 saylı Goranboy-Ağdam-Tərtər seçki dairəsindən namizədi Gülçöhrə Məmmədova Goranboyun Tapqaraqoyunlu kəndində seçicilərlə görüşüb
7 noyabrda keçiriləcək parlament seçkilərində Yeni Azərbaycan Partiyası tərəfindən irəli sürülmüş namizədlərin təbliğat - təşviqat kampaniyası çərçivəsində seçicilərlə görüşləri davam edir. Belə görüşlərdən biri də Goranboy rayonunun Tapqaraqoyunlu kəndində keçirilib. Tədbiri giriş sözü ilə açan YAP Goranboy rayon təşkilatının sədri Elçin İsmayılov bildirib ki, Azərbaycan Respublikasının Seçki Məcəlləsinə uyğun olaraq, növbəti parlament seçkilərində iştirak etmək üçün namizədliyin irəli sürülməsi müddəti başa çatıb. Rayonda iki seçki dairəsi yerləşir və Yeni Azərbaycan Partiyası bu dairələr üzrə öz namizədlərini irəli sürüb.
Belə ki, partiyanın İdarə Heyətinin qərarına əsasən, 96 saylı Goranboy-Naftalan Seçki Dairəsindən Goranboy rayon Telekommunikasiya Qovşağının rəisi Muxtarov Hafiz Əli oğlunun, 97 saylı Goranboy-Ağdam-Tərtər Seçki Dairəsindən isə YAP Siyasi Şurasının üzvü, Azərbaycan Memarlıq və İnşaat Universitetinin rektoru Məmmədova Gülçöhrə Hüseyn qızının millət vəkilliyinə namizədliyi YAP tərəfindən irəli sürülüb. Onun sözlərinə görə, bu namizədlər ictimai-siyasi fəaliyyətləri və şəxsi keyfiyyətləri ilə ictimaiyyət arasında böyük hörmət və nüfuz qazanıblar. Goranboyun inkişaf və tərəqqi yolunda inamlı addımlar atmasında YAP fəallarının da böyük rolunun olduğunu söyləyən təşkilat sədrinin sözlərinə görə, bütün çətinlikləri və maneələri mətinliklə, cəsarətlə dəf edən partiya üzvləri daha bir sınaq qarşısındadırlar: “2010-cu il noyabr ayının 7-də Azərbaycan Respublikasının Milli Məclisinə növbəti seçkilər keçiriləcək. ölkəmizin aparıcı siyasi qüvvəsi olan Yeni Azərbaycan Partiyası öz namizədləri ilə bu seçkidə iştirak edir”.
Sonra çıxış edən Yeni Azərbaycan Partiyasının 97 saylı Goranboy-Ağdam-Tərtər seçki dairəsindən namizədi Gülçöhrə Məmmədovanın vəkili Şahin Allahverdiyev namizədin tərcümeyi-halı və platforması ilə seçiciləri tanış edib.
Daha sonra söz Gülçöhrə Məmmədovanın digər vəkili AMEA Kibernetika İnstitutunun direktoru, Akademik Telman Əliyevə verilib. O, vurğulayıb ki, Yeni Azərbaycan Partiyası bu seçkilərə “Güclü dövlət, yüksək rifah” şüarı ilə qatılıb: “Məlum həqiqətdir ki, möhtərəm Prezidentimiz Azərbaycanın güclü və qüdrətli dövlət olması, insanların rifah halının yüksəlməsi, firavan, xoşbəxt həyat sürməsi naminə yorulmaq bilmədən çalışır. Yeganə məqsədimiz ölkə başçısının fəaliyyətini yekdilliklə dəstəkləmək və YAP-ın qələbəsinə nail olmaqdır. Ona görə, sizlərin hər birinizi YAP-ın layiqli namizədi Məmmədova Gülçöhrə Hüseyn qızına səs verməyə çağırıram”.
Sonra çıxış edən Yeni Azərbaycan Partiyasının 97 saylı Goranboy-Ağdam-Tərtər seçki dairəsindən deputatlığa namizədi Gülçöhrə Məmmədova görüşdə belə mütəşəkkilliklə iştirak etdiklərinə görə, seçicilərə minnətdarlıq edib və öz platforması barədə ətraflı məlumat verib. O, qeyd edib ki, Milli Məclisə, ölkənin ali qanunvericilik orqanına seçkilər Azərbaycanın ictimai-siyasi həyatının ən mühüm hadisələrindən biridir. Bu seçkilər ölkədə həyata keçirilən siyasi strategiyaya xalqın münasibətini əks etdirərək gələcək inkişaf xəttinin formalaşmasına istiqamət verəcək. Gülçöhrə Məmmədova əlavə edib ki, ümummilli lider Heydər Əliyevin müəyyən etdiyi siyasətin həyata keçirilməsi nəticəsində ölkəmizdə sabitlik və əmin-amanlıq yaradılıb, xalqımıza firavan gələcək vəd edən iqtisadi uğurların təməli qoyulub, insan hüquq və azadlıqları təmin edilib. Bu gün həmin siyasət Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin rəhbərliyi altında yeni çalarlar əlavə olunaraq davam etdirilir. Qısa vaxtda yüz minlərlə yeni iş yerlərinin açılması, əməkhaqlarının, təqaüd və müavinətlərin dəfələrlə artırılması, ölkəmizdə ildən-ilə geniş vüsət alan quruculuq-abadlıq işləri və infrastruktur layihələri hər bir vətəndaşın həyat səviyyəsini yüksəldib. Azərbaycan bütün sosial-iqtisadi göstəricilərə görə, regionun lider dövlətinə çevrilib.
Sonda Tapqaraqoyunlu kənd sakini, Respublika Ağsaqqallar Şurasının üzvü, Əməkdar müəllim Taryel Abbasov çıxış edərək bildirib ki, goranboylu seçicilər Azərbaycanın xoşbəxt gələcəyi naminə seçkilərdə fəal olacaq, dövlətimizin daha da qüdrətlənməsi, hər bir Azərbaycan vətəndaşının rifahının yaxşılaşmasını təmin edən hakim partiyanın namizədini dəstəkləyəcəklər.
Fazil İsmayilov

Paylaş:

Baxılıb: 1265 dəfə