Yeni Azərbaycan Partiyası İsmayıllı rayon təşkilatı Gənclər Birliyinin IV hesabat-seçki konfransı keçirilib

Bakı:

11 °C

82 %

5 m/s

AZ RU EN

Ana səhifə / YAP xəbərləri / Yeni Azərbaycan Partiyası İsmayıllı rayon təşkilatı Gənclər Birliyinin IV hesabat-seçki konfransı keçirilib

Yeni Azərbaycan Partiyası İsmayıllı rayon təşkilatı Gənclər Birliyinin IV hesabat-seçki konfransı keçirilib

03.03.2015 [09:50]

Yeni Azərbaycan Partiyası (YAP) İsmayıllı rayon təşkilatı Gənclər Birliyinin IV hesabat-seçki konfransı keçirilib. Konfransda İsmayıllı rayon İcra Hakimiyyətinin başçısı Mirdaməd Sadıqov, Milli Məclisin deputatı Ərəstun Cavadov, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, YAP Mərkəzi Aparatının məsul işçisi Həsən Daşdəmirov iştirak ediblər.
Konfransı giriş sözü ilə açan YAP İsmayıllı rayon təşkilatının sədri Əzizə Vahabova qeyd edib ki, 1992-ci ildə Azərbaycan xalqının xilaskarı, Ulu öndər Heydər Əliyevin rəhbərliyi ilə yaradılan Yeni Azərbaycan Partiyası şərəfli və çətin yol keçib, ölkənin ictimai-siyasi həyatında hər zaman fəal rol oynayıb. Vurğulanıb ki, hazırda YAP İsmayıllı rayon təşkilatının 8000 nəfərə yaxın üzvü var ki, onların da 3187 nəfərini gənclər təşkil edir.
Hesabat məruzəsi ilə çıxış edən YAP İsmayıllı rayon təşkilatı Gənclər Birliyinin sədri Taleh Salehov hesabat dövründə rayonda gənclərin davamlı inkişafı üçün görülən işlərdən, onların asudə vaxtlarının səmərəli keçirilməsi üçün YAP İsmayıllı rayon təşkilatının həyata keçirdiyi tədbirlərdən bəhs edib. Qeyd olunub ki, ötən konfransdan keçən müddət ərzində gənclərin partiyaya qəbulu 25 faiz artıb. Vurğulanıb ki, ötən ilin sonunda keçirilən bələdiyyə seçkilərində bələdiyyə üzvü seçilənlərin 36,3 faizini, bələdiyyə sədrlərinin isə 45,2 faizini gənc partiya üzvləri təşkil edib.
Konfransda çıxış edən YAP İsmayıllı rayon təşkilatı GB-nin üzvləri Əsli Süleymanzadə, Qönçə Ağazadə, Rəşid Məmmədov və digərləri hesabatı qənaətbəxş hesab ediblər və Gənclər Birliyinin fəaliyyətini yüksək qiymətləndiriblər.
Sonra YAP İsmayıllı rayon təşkilatı Gənclər Birliyinin Şura üzvləri, İdarə Heyəti və YAP GB-nin növbəti konfransına nümayəndələri seçilib. Konfrans nümayəndələrinin yekdil səsverməsinə əsasən Əsli Süleymanzadə YAP İsmayıllı rayon təşkilatı Gənclər Birliyinin sədri, Nəsimi Teymurov və Qönçə Ağazadə isə onun müavinləri seçiliblər.
Konfransda çıxış edən Milli Məclisin deputatı Ərəstun Cavadov, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə öz gücünü Heydər Əliyev ideyalarından alan Yeni Azərbaycan Partiyasında Azərbaycanın sağlam, intellektual gənclər ordusunun təmsil olunduğunu bildiriblər. Vurğulanıb ki, Ulu öndər Heydər Əliyevin siyasi kursunu uğurla davam etdirən Prezident İlham Əliyev gənclərə xüsusi diqqət və qayğı göstərir, gənclərin inkişafı, onların bilik və bacarıqlarının daha da təkmilləşdirilməsi sahəsində Dövlət proqramları həyata keçirilir.
Çıxış edən İsmayıllı rayon İcra Hakimiyyətinin başçısı Mirdaməd Sadıqov bildirib ki, İsmayıllı gəncləri də dövlət qayğısından bəhrələnərək, ölkənin və rayonun ictimai-siyasi, sosial-iqtisadi və mədəni həyatında fəal iştirak edirlər. RİH başçısı gənclərin sosial müdafiəsinin gücləndirilməsi, onları düşündürən problemlərin həll edilməsi istiqamətində həyata keçirilən layihələrdən danışıb.
Tədbirin sonunda partiyaya yeni qəbul olunan bir qrup gəncə üzvlük vəsiqələri, rayonun ictimai-siyasi həyatında fərqlənən gənclərə isə YAP İsmayıllı rayon təşkilatının fəxri fərman və hədiyyələri təqdim olunub.
Pərviz SADAYOĞLU

Paylaş:

Baxılıb: 917 dəfə