Bakıda Türk dünyasının və Qafqazın dini-mənəvi həmrəyliyinə mühüm töhfə

Bakı:

28 °C

51 %

4 m/s

Əlaqə

AZ RU EN

Ana səhifə / YAP xəbərləri / Bakıda Türk dünyasının və Qafqazın dini-mənəvi həmrəyliyinə mühüm töhfə

Bakıda Türk dünyasının və Qafqazın dini-mənəvi həmrəyliyinə mühüm töhfə

16.09.2026 [14:49]

Paytaxt Bakımız son illərdə yalnız mühüm siyasi və iqtisadi tədbirlərin deyil, həm də Türk dünyasının, İslam aləminin və bütövlükdə müxtəlif sivilizasiyaların dialoqunun mühüm mərkəzlərindən birinə çevrilib. Sentyabrın 15-də Prezident İlham Əliyevin Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul etməsi də bu baxımdan xüsusi məna daşıyır.

Nümayəndə heyətinə Türk Dövlətləri Təşkilatının Baş katibi Kubanıçbek Ömüralıyev, TDT-yə üzv ölkələrin müsəlman dini idarələrinin rəhbərləri, Müsəlman Ağsaqqalları Şurasının baş katibi, IRCICA-nın baş direktoru, Qafqaz və digər ölkələrin dini rəhbərləri, eləcə də beynəlxalq islam təşkilatlarının nümayəndələri daxil olub. Bu geniş tərkib görüşün yalnız bir təşkilat çərçivəsində deyil, daha geniş regional və beynəlxalq dini-mənəvi əməkdaşlıq müstəvisində əhəmiyyətini göstərir.

Prezident İlham Əliyev çıxışında Bakıda eyni günlərdə keçirilən iki mühüm tədbirin – TDT Müsəlman Dini Rəhbərləri Şurasının 7-ci toplantısının və böyük Azərbaycan mütəfəkkiri Seyid Yəhya Bakuvi Şirvaniyə həsr olunmuş beynəlxalq konfransın xüsusi məna daşıdığını vurğulayıb. Bu baxımdan, Yəhya Bakuvi irsinin beynəlxalq səviyyədə öyrənilməsi və təbliği Azərbaycanın zəngin tarixi-mədəni irsinin dünyaya təqdim olunması baxımından da əhəmiyyətlidir.

Prezident İlham Əliyev çıxışında Azərbaycanın həm Türk dünyasının, həm də Qafqazın ayrılmaz hissəsi olduğunu diqqətə çatdırıb. Dövlət başçısı Türk dünyası ilə Azərbaycan arasında möhkəm əlaqələrdən, Qafqaz xalqları ilə dostluq və qohumluq münasibətlərindən danışaraq belə görüşlərin xalqları daha da yaxınlaşdırdığını vurğulayıb. Bu kontekstdə Bakıda Türk Dövlətləri Təşkilatının dini liderlərinin və Qafqaz xalqlarının dini nümayəndələrinin bir araya gəlməsi xüsusi rəmzi məna daşıyır. Müxtəlif ölkələri və dini icmaları təmsil edən şəxslərin eyni platformada fikir mübadiləsi aparması qarşılıqlı anlaşmanın, tolerantlığın və həmrəyliyin möhkəmlənməsinə xidmət edən mühüm amil kimi qiymətləndirilə bilər.

Görüşün mühüm məqamlarından biri də konfransın Ağdam məscidində davam etdirilməsi ilə bağlı təşəbbüs olub. Bu məkan Azərbaycanın yaxın tarixində xüsusi mənəvi və tarixi əhəmiyyətə malikdir. Ağdam məscidinin seçilməsi dini-mənəvi tədbirin Azərbaycanın tarixi yaddaşı və Qarabağın dirçəldilməsi prosesi ilə əlaqələndirilməsi baxımından diqqət çəkir. Görüş zamanı Ağdam məscidinin müharibə illərində şəhidlərin dini mərasimlərinin keçirildiyi məkanlardan biri olduğu da qeyd edilib.

Azərbaycan bu gün sülh tərəfdarıdır. Ermənistanla münasibətlərin normallaşdırılmasını və regionda davamlı sülhün bərqərar olmasını istəyir. Lakin sülh keçmişi unutmaq demək deyil. Xocalı soyqırımı, dağıdılmış şəhər və kəndlərimiz, məhv edilmiş məscidlərimiz, doğma torpaqlarından didərgin salınmış insanlar xalqımızın yaddaşında daim yaşayacaq. Azərbaycan öz tarixini və dəyərlərini qoruyaraq gələcəyə doğru gedir. Biz Zəfərimizi unutmuruq, itkilərimizi unutmuruq, amma eyni zamanda sülh və əməkdaşlıq üçün yeni səhifə açmağa çalışırıq. Əsas məqsəd isə bölgədə davamlı sülhün, sabitliyin və qarşılıqlı hörmətin təmin edilməsidir.

Bakıda keçirilən beynəlxalq dini tədbirlərin Qarabağda davam etdirilməsi Azərbaycanın tarixi-mədəni irsinin qorunması, işğaldan azad edilmiş ərazilərin beynəlxalq ictimaiyyətə təqdim olunması və dini-mədəni irsin yaşadılması baxımından da xüsusi əhəmiyyət daşıyır. Görüşdə səsləndirilən fikirlər Azərbaycanın zəngin tarixi-mədəni irsinin, xüsusilə Seyid Yəhya Bakuvi kimi böyük mütəfəkkirlərin irsinin beynəlxalq səviyyədə tanıdılmasının əhəmiyyətini bir daha ortaya qoyub. Azərbaycanın ev sahibliyi etdiyi bu tədbirlər ölkənin dini-mədəni dialoqa, tolerantlığa, qarşılıqlı hörmətə və xalqlar arasında həmrəyliyin möhkəmləndirilməsinə verdiyi töhfənin növbəti ifadəsi kimi qiymətləndirilir.

Araz Xudadanov

YAP Sabunçu rayon təşkilatının sədri

Paylaş:

Baxılıb: 181 dəfə