26 Avqust – Laçın Şəhəri Günü: Qədim yurdumuzun yeni inkişaf dövrü

Bakı:

24 °C

69 %

7 m/s

Əlaqə

AZ RU EN

Ana səhifə / YAP xəbərləri / 26 Avqust – Laçın Şəhəri Günü: Qədim yurdumuzun yeni inkişaf dövrü

26 Avqust – Laçın Şəhəri Günü: Qədim yurdumuzun yeni inkişaf dövrü

26.08.2026 [18:53]

Azərbaycan tarixinin şanlı səhifələrində özünəməxsus yeri olan Laçın şəhəri xalqımız üçün yalnız coğrafi məkan deyil, milli yaddaşımızın, tarixi irsimizin və doğma Vətən sevgimizin rəmzlərindən biridir. Məhz bu baxımdan 26 Avqust – Laçın Şəhəri Gününün təsis edilməsi xüsusi əhəmiyyət daşıyır. Bu əlamətdar gün Laçının işğaldan azad edilməsinin, şəhərin dirçəldilməsinin və doğma sakinlərinin öz yurdlarına qayıdışının təcəssümüdür.
Laçın şəhərinin tarixi Azərbaycanın qədim və zəngin dövlətçilik ənənələri ilə sıx bağlıdır. Bu torpaqlar əsrlər boyu xalqımızın yaşayış məskəni olmuş, burada milli-mədəni irsimizin qiymətli nümunələri formalaşmışdır. Laçının əsrarəngiz təbiəti, dağları, meşələri, çayları və saf havası bu bölgəni Azərbaycanın ən gözəl guşələrindən birinə çevirib. Laçın həm də özünəməxsus mədəniyyəti, adət-ənənələri və zəngin folkloru ilə seçilib.
Lakin XX əsrin sonlarında Azərbaycanın üzləşdiyi Ermənistanın işğal siyasəti nəticəsində Laçın da ağır faciələrlə üzləşdi. 1992-ci il mayın 18-də Laçın şəhəri işğal edildi. On minlərlə soydaşımız öz doğma yurdlarından didərgin düşdü. Şəhər və kəndlər dağıdıldı, tarixi-mədəni irsimizə qarşı vandalizm törədildi. Laçın uzun illər ərzində həsrət, nisgil və qayıdış arzusu ilə yaşadı. Azərbaycan xalqı isə heç zaman doğma torpaqlarının işğalı ilə barışmadı. Ölkəmiz bütün beynəlxalq platformalarda ərazi bütövlüyümüzün bərpasını tələb etdi, güclü ordu quruculuğu həyata keçirildi və dövlətimizin iqtisadi qüdrəti daha da artırıldı. Bu siyasətin nəticəsində Azərbaycan 2020-ci ildə 44 günlük Vətən müharibəsində tarixi Zəfər qazandı. Vətən müharibəsi nəticəsində Azərbaycanın ərazi bütövlüyünün böyük hissəsi bərpa edildi. Laçının da azad olunmasına aparan yol məhz bu tarixi Qələbədən sonra mümkün oldu. 2020-ci il dekabrın 1-də Laçın rayonu Azərbaycana qaytarıldı. Bu hadisə uzun illər doğma torpaqlarına qayıtmaq arzusu ilə yaşayan laçınlıların həyatında böyük tarixi dönüş yaratdı.
Laçın şəhərinin azad edilməsi isə xüsusi əhəmiyyət daşıyır. 2022-ci il avqustun 26-da Azərbaycan Ordusunun bölmələri Laçın şəhərinə daxil oldu və şəhər üzərində üçrəngli Azərbaycan bayrağı ucaldıldı. Bu tarix xalqımızın yaddaşına əbədi olaraq qızıl hərflərlə yazıldı.
Laçının azadlığı dövlətimizin gücünün, Azərbaycan Ordusunun qüdrətinin və xalqımızın milli iradəsinin daha bir göstəricisi oldu. Bu qələbə həm də şəhidlərimizin qanı bahasına əldə edilmiş tarixi Zəfərin nəticəsidir. Laçın şəhərinin azad edilməsindən sonra qarşıda duran əsas vəzifələrdən biri bu qədim şəhərin yenidən qurulması və keçmiş məcburi köçkünlərin doğma yurdlarına qayıdışının təmin edilməsi oldu. Azərbaycan dövləti bu istiqamətdə genişmiqyaslı layihələr həyata keçirməyə başladı. Bu gün Laçın şəhəri sürətlə yenidən qurulur, müasir şəhərsalma prinsipləri əsasında inkişaf etdirilir.
Yeni yaşayış binaları, məktəblər, inzibati və sosial obyektlər, yollar və digər infrastruktur layihələri həyata keçirilir. Şəhərin tarixi simasının qorunması ilə müasir memarlıq elementlərinin vəhdətinə xüsusi diqqət yetirilir. Laçında həyata keçirilən quruculuq işləri Azərbaycanın işğaldan azad edilmiş ərazilərin bərpasına verdiyi böyük önəmin göstəricisidir. Dövlətimizin qarşıya qoyduğu əsas məqsədlərdən biri insanların doğma torpaqlarına təhlükəsiz, rahat və layiqli şəkildə qayıtmasını təmin etməkdir. Laçının bərpası yalnız tikinti və infrastruktur layihələri ilə məhdudlaşmır. Burada iqtisadi fəaliyyətin genişləndirilməsi, turizm imkanlarının inkişaf etdirilməsi, yeni iş yerlərinin yaradılması və sosial rifahın yüksəldilməsi istiqamətində də mühüm addımlar atılır. Laçının zəngin təbiəti və turizm potensialı gələcəkdə şəhərin və bütövlükdə rayonun iqtisadi inkişafında mühüm rol oynayacaq. Laçının yeni inkişaf dövrünün mühüm istiqamətlərindən biri də onun “ağıllı şəhər” konsepsiyası əsasında qurulmasıdır. Müasir texnologiyaların tətbiqi, enerji səmərəliliyi, ekoloji tarazlığın qorunması və rahat yaşayış mühitinin yaradılması Laçının gələcək simasını müəyyənləşdirən əsas amillərdəndir.
Laçın həm də Azərbaycanın “Böyük Qayıdış” siyasətinin mühüm ünvanlarından biridir. Uzun illər doğma yurdlarından ayrı düşmüş insanların öz evlərinə qayıtması böyük tarixi və mənəvi hadisədir. Bu qayıdış yalnız insanların yaşayış yerinə dönməsi deyil, həm də tarixi ədalətin bərpasıdır.
26 Avqust – Laçın Şəhəri Günü həm də milli həmrəyliyimizin təntənəsidir. Bu tarix bizə göstərir ki, xalq və dövlət bir məqsəd ətrafında birləşdikdə ən çətin vəzifələrin öhdəsindən gəlmək mümkündür. Azərbaycan xalqının Qarabağ və Şərqi Zəngəzurla bağlı illər ərzində yaşatdığı qayıdış arzusu dövlət siyasəti, xalq iradəsi və ordumuzun gücü ilə gerçəyə çevrildi. Laçının dirçəldilməsi Azərbaycanın qarşısında duran böyük quruculuq missiyasının bir hissəsidir. İşğaldan azad edilmiş bütün ərazilərdə olduğu kimi, burada da dövlətimizin diqqət və qayğısı özünü aydın şəkildə göstərir. Qarabağ və Şərqi Zəngəzurun bərpası Azərbaycanın yeni inkişaf mərhələsinin mühüm istiqamətlərindən birinə çevrilib.
Vətən torpağı heç vaxt unudulmur. İnsan öz doğma yurduna bağlılığını illər keçsə də itirmir. Laçınlıların uzun illər ərzində qoruduqları qayıdış ümidi bu gün gerçəyə çevrilib. 26 Avqust tarixinin hər il Laçın Şəhəri Günü kimi qeyd olunması bu tarixi hadisənin yaddaşlarda yaşadılması baxımından mühüm əhəmiyyət daşıyır. Bu gün həm qəhrəman şəhidlərimizin xatirəsinə ehtiram, həm qazilərimizin fədakarlığına minnətdarlıq, həm də dövlətimizin apardığı quruculuq siyasətinə dəstəyin ifadəsidir. Laçının azadlığı Azərbaycan tarixində yeni səhifə açdı. Bu səhifədə şəhidlərimizin qəhrəmanlığı, qazilərimizin şücaəti, əsgər və zabitlərimizin peşəkarlığı, xalqımızın birliyi və dövlətimizin qətiyyətli siyasəti öz əksini tapır.
Azərbaycan öz ərazi bütövlüyünü bərpa edib və işğaldan azad edilmiş torpaqlarımızda yeni həyat qurur. Laçın isə bu böyük qayıdışın və dirçəlişin parlaq simvollarından biridir.

Azər Ağayev
YAP Tərtər rayon təşkilatının sədr müavini

Paylaş:

Baxılıb: 211 dəfə