Naxçıvanın yeni inkişaf mərhələsi

Bakı:

21 °C

88 %

6 m/s

Əlaqə

AZ RU EN

Ana səhifə / YAP xəbərləri / Naxçıvanın yeni inkişaf mərhələsi

Naxçıvanın yeni inkişaf mərhələsi

14.08.2026 [15:33]

Azərbaycanın ayrılmaz tərkib hissəsi olan Naxçıvan Muxtar Respublikası tarixən ölkənin
siyasi, strateji və geosiyasi həyatında mühüm yer tutub. Bu qədim diyarın Azərbaycanın əsas
ərazisindən coğrafi baxımdan ayrı düşməsi onun inkişafında nəqliyyat, təhlükəsizlik və iqtisadi
əlaqələr məsələlərini daim xüsusi aktuallıqda saxlayıb. Lakin son illərdə regionda yaranan yeni
reallıqlar Naxçıvanın qarşısında daha geniş imkanlar açır. Bu imkanların reallaşdırılması isə
təhlükəsizliyin möhkəmləndirilməsi, iqtisadiyyatın şaxələndirilməsi, sənayeləşmənin
sürətləndirilməsi və nəqliyyat bağlantılarının bərpası ilə sıx bağlıdır. Prezident İlham Əliyevin
11 avqust 2026-cı ildə Naxçıvana səfəri zamanı Azərbaycan Televiziyasına verdiyi müsahibə
məhz bu baxımdan xüsusi əhəmiyyət daşıyır. Dövlət başçısının səsləndirdiyi fikirlər
Naxçıvanın gələcək inkişafının əsas istiqamətlərini aydın şəkildə ortaya qoyur. Müsahibədə
Naxçıvanın sosial-iqtisadi inkişafı, müdafiə potensialının gücləndirilməsi, enerji təminatı,
sənayeləşmə, tarixi-mədəni irsin qorunması və ən başlıcası, Azərbaycanın əsas hissəsi ilə
Naxçıvan arasında nəqliyyat əlaqəsinin təmin edilməsi məsələləri bir-biri ilə əlaqəli şəkildə
təqdim edilib.
Səfərin və müsahibənin ən diqqətçəkən məqamlarından biri nəqliyyat koridorları və
Naxçıvanın tranzit imkanlarının genişləndirilməsi ilə bağlı oldu. Dövlət başçısı qeyd etdi ki,
Naxçıvan dəmir yolu xətti tamamilə yeni texniki-iqtisadi əsaslandırma ilə 194 kilometr
uzunluğunda yenidən qurulur və radius dəyişiklikləri bu xəttin illik yükötürmə qabiliyyətini 15
milyon tona çatdırmağa imkan verəcək. Zəngəzur dəhlizi layihəsinin reallaşması ilə Naxçıvan
uzunillik blokada şəraitindən tamamilə çıxaraq Avrasiyanın əsas nəqliyyat arteriyalarından
birinə çevrilir. Prezident xüsusilə vurğuladı ki, bu marşrut yalnız dəmir və ya avtomobil yolu ilə
məhdudlaşmır; Buradan fiber-optik xətlər, elektrik ötürücüləri və gələcəkdə zərurət yarandığı
təqdirdə neft-qaz kəmərləri də keçə bilər.
Transport infrastrukturu ilə yanaşı, müsahibədə xüsusi yer tutan digər strateji məsələ
Naxçıvanın enerji təhlükəsizliyi və yaşıl enerji potensialı oldu. Bir zamanlar ağır enerji qıtlığı
ilə üzləşən muxtar respublikada hazırda qazlaşdırma dərəcəsi 100 faizə çatdırılıb və növbəti
mərhələdə ana hədəf bölgeni böyük həcmdə elektrik enerjisi ixracatçısına çevirməkdir. Bu
çərçivədə günəş enerjisi istehsalının ən azı 500 meqavat, perspektivdə isə 1000 meqavata
çatdırılması planlaşdırılır. İstehsal olunan bu yaşıl enerji Türkiyə, İran və həmçinin Qara
dənizin dibi ilə çəkiləcək sualtı elektrik kabeli layihəsi vasitəsilə Avropa bazarlarına
çıxarılacaq.
Müsahibənin ən çox diqqət çəkən hissəsi Zəngəzur dəhlizi ilə bağlı regiondakı son
geosiyasi vəziyyətin təhlilidir. Prezident İlham Əliyev 10 noyabr 2020-ci il üçtərəfli
bəyanatının imzalanması zamanı dəhliz rejiminin sənəddə əks olunması üçün qətiyyətli israr
göstərdiyini xatırlatdı. Ermənistanın uzun illər boyu bu öhdəlikdən qaçmağa çalışdığını bildirən
dövlət başçısı, məsələnin 2025-ci ilin avqust ayında Vaşinqtonda keçirilən zirvə görüşündən
sonra fundamental şəkildə həllini tapdığını bəyan etdi. Hazırda ABŞ-nin regional
strategiyasının mərkəzində dayanan TRIPP qlobal layihəsinin icrasına başlanıldığını deyən
dövlət başçısı, Horadiz-Ağbənd avtomobil yolunun demək olar ki, tam hazır olduğunu, dəmir
yolu tikintisinin isə sürətlə irəlilədiyini bildirdi. Ən önəmlisi, Azərbaycanın əsas hissəsindən
Naxçıvana Ermənistan ərazisindən keçməklə çəkiləcək elektrik verilişi xətlərinin layihəsinin

artıq tam hazır olduğunu və qüllələrin yerlərinin müəyyənləşdirildiyini qeyd edən Prezident,
Naxçıvanın gələcəkdə qlobal nəqliyyat və enerji qovşağına çevriləcəyini rəsmən elan etdi.
Dövlət başçısı regionun hərbi və ekoloji təhlükəsizliyi məsələsinə də geniş toxundu.
Əlahiddə Ümumqoşun Ordunun yeni komando hissələrinə döyüş bayraqlarının təqdim
olunmasını Naxçıvanın müdafiə qabiliyyətinin sarsılmazlığı kimi qiymətləndirən Prezident,
eyni zamanda Ermənistandakı "Metsamor" Atom Elektrik Stansiyasının regional fəsadlarından
bəhs etdi. Bu köhnəlmiş stansiyanın bütün region üçün ciddi nüvə və ekoloji təhdid mənbəyi
olduğunu vurğulayan dövlət başçısı, onun gec-tez mütləq bağlanmalı olduğunu qətiyyətlə ifadə
etdi.
Prezident İlham Əliyevin Naxçıvana son səfəri təkcə görülən işlərin təqdimatı deyil, həm
də gələcək inkişaf istiqamətlərinin müəyyənləşdirilməsi baxımından əlamətdar hadisədir.
Təhlükəsizlik, sənayeləşmə, yaşıl enerji, müasir şəhərsalma və iqtisadi fəallığın artırılması
üzərində qurulan bu strategiya Naxçıvanın qarşıdakı illərdə daha sürətli və kompleks inkişafını
təmin edə bilər.

Samir Ağayev
YAP Biləsuvar rayon təşkilatının məsləhətçisi

Paylaş:

Baxılıb: 220 dəfə