Milli mətbuatımızın şərəfli yolu: keçmişdən gələcəyə uzanan missiya

Bakı:

23 °C

64 %

6 m/s

Əlaqə

AZ RU EN

Ana səhifə / YAP xəbərləri / Milli mətbuatımızın şərəfli yolu: keçmişdən gələcəyə uzanan missiya

Milli mətbuatımızın şərəfli yolu: keçmişdən gələcəyə uzanan missiya

17.07.2026 [20:44]

İyulun 22-si Azərbaycan milli mətbuatının tarixində xüsusi əhəmiyyət daşıyan günlərdən biridir. Məhz 1875-ci ilin bu günündə böyük maarifçi Həsən bəy Zərdabi "Əkinçi" qəzetinin ilk nömrəsini nəşr etdirməklə Azərbaycan milli mətbuatının əsasını qoydu. Bu hadisə yalnız yeni bir qəzetin yaranması deyil, həm də xalqın maariflənməsi, ictimai fikrin formalaşması və milli oyanış prosesinin başlanğıcı idi. Aradan keçən bir əsrdən artıq müddətdə Azərbaycan mətbuatı keşməkeşli, lakin şərəfli inkişaf yolu keçərək cəmiyyətin ayrılmaz hissəsinə çevrilib.

Milli mətbuat hər zaman dövrün ictimai-siyasi hadisələrinin salnaməsini yazıb, xalqın arzu və istəklərini ifadə edib, cəmiyyətlə dövlət arasında etibarlı informasiya körpüsü rolunu oynayıb. Müxtəlif tarixi mərhələlərdə təzyiqlərlə, senzura ilə və çətinliklərlə üzləşməsinə baxmayaraq, Azərbaycan mətbuatı öz missiyasına sadiq qalaraq həqiqətin, obyektivliyin və maarifçiliyin keşiyində dayanıb.

Müstəqillik illərində milli mətbuatın inkişafı yeni mərhələyə qədəm qoydu. Ümummilli Lider Heydər Əliyevin hakimiyyətə qayıdışından sonra Azərbaycanda demokratik institutların möhkəmləndirilməsi, söz və mətbuat azadlığının təmin olunması istiqamətində mühüm addımlar atıldı. Xüsusilə 1998-ci ildə senzuranın ləğv edilməsi ölkə jurnalistikasının inkişafında tarixi hadisə kimi qiymətləndirilir. Bu qərar medianın daha sərbəst fəaliyyət göstərməsinə, cəmiyyətin operativ və obyektiv informasiya ilə təmin olunmasına geniş imkanlar yaratdı.

Ümummilli Lider Heydər Əliyev deyirdi: "Mətbuatın məqsədi həqiqəti yazmaq, həqiqəti xalqa çatdırmaqdır." Bu fikir bu gün də Azərbaycan jurnalistikasının əsas peşə prinsiplərindən biri kimi öz aktuallığını qoruyur. Həqiqətə söykənən söz, məsuliyyətli jurnalistika və obyektiv informasiya hər zaman güclü cəmiyyətin əsas şərtlərindən hesab olunur.

Bu siyasi kurs Prezident İlham Əliyev tərəfindən uğurla davam etdirilir. Dövlət başçısının rəhbərliyi ilə media sahəsində ardıcıl islahatlar həyata keçirilir, jurnalistlərin fəaliyyəti üçün daha əlverişli mühit yaradılır, milli informasiya məkanının təhlükəsizliyinin təmin olunmasına xüsusi diqqət göstərilir. Prezident İlham Əliyev bildirib: "İnsanlar bütün məlumatı mətbuatdan alırlar. Ona görə də mətbuat qərəzsiz olmalı, operativ işləməli və insanları dolğun informasiya ilə təmin etməlidir." Bu yanaşma müasir medianın üzərinə düşən məsuliyyəti və cəmiyyət qarşısındakı vəzifələrini aydın şəkildə ifadə edir.

Rəqəmsal texnologiyaların sürətlə inkişaf etdiyi müasir dövrdə medianın rolu daha da artıb. İnformasiya müharibələrinin geniş vüsət aldığı bir zamanda peşəkar jurnalistika dövlətlərin milli maraqlarının müdafiəsində mühüm vasitələrdən birinə çevrilib. Xüsusilə 44 günlük Vətən müharibəsi zamanı Azərbaycan mediası informasiya cəbhəsində böyük fədakarlıq və peşəkarlıq nümayiş etdirərək ölkəmizin haqq səsini dünya ictimaiyyətinə çatdırdı. Sonrakı dövrdə isə işğaldan azad olunmuş ərazilərdə aparılan bərpa-quruculuq işlərinin, Böyük Qayıdış prosesinin və Azərbaycanın beynəlxalq uğurlarının işıqlandırılmasında milli mətbuatın rolu daha da artdı.

Bu gün Azərbaycan mediası yalnız ölkə daxilində deyil, beynəlxalq informasiya məkanında da fəal iştirak edir. Bunun ən bariz nümunələrindən biri Şuşada keçirilən Qlobal Media Forumudur. Artıq ənənə halını alan bu forum müxtəlif ölkələrdən media rəhbərlərini, jurnalistləri və ekspertləri bir araya gətirən nüfuzlu beynəlxalq platformaya çevrilib. Forumda müasir medianın çağırışları, dezinformasiyaya qarşı mübarizə, süni intellekt dövründə jurnalistikanın perspektivləri və qlobal informasiya təhlükəsizliyi kimi mühüm məsələlər müzakirə olunur. Prezident İlham Əliyevin forum çərçivəsində səsləndirdiyi fikirlər beynəlxalq media nümayəndələri tərəfindən böyük maraqla qarşılanır və Azərbaycanın informasiya siyasətinin əsas istiqamətlərini aydın şəkildə nümayiş etdirir.

149 il əvvəl "Əkinçi" ilə başlanan yol bu gün müasir, dinamik və beynəlxalq əməkdaşlığa açıq Azərbaycan mediası ilə davam edir. Milli mətbuatımız zəngin ənənələrinə sadiq qalaraq, həqiqətin keşiyində dayanmağa, dövlətçilik maraqlarına xidmət etməyə və cəmiyyətin etibarlı informasiya mənbəyi olmağa davam edir. 22 İyul – Milli Mətbuat Günü isə bu şərəfli yolun keçmişinə ehtiramın, bu günün nailiyyətlərinin və gələcəyə inamın rəmzidir.

Vüsalə Əliyeva

YAP Sədərək rayon təşkilatının sədri

Paylaş:

Baxılıb: 523 dəfə