Azərbaycan əsgərinin vətənpərvərlik ruhu

Bakı:

29 °C

42 %

4 m/s

Əlaqə

AZ RU EN

Ana səhifə / YAP xəbərləri / Azərbaycan əsgərinin vətənpərvərlik ruhu

Azərbaycan əsgərinin vətənpərvərlik ruhu

24.06.2026 [15:30]

Azərbaycan əsgərinin vətənpərvərlik ruhu, sadəcə hərbi bir vəzifənin icrası və ya nizamnamə qaydalarının yerinə yetirilməsi deyil. Bu ruh əsrlər boyu tarixin sınaqlarından keçərək formalaşmış, xalqımızın genetik yaddaşına həkk olunmuş, qanla və canla yoğrulmuş müqəddəs bir anddır. Müstəqil Azərbaycanın hər bir əsgəri və zabiti üçün Vətən anlayışı, üzərində addımladığı torpaq parçasından qat-qat dərindir. Vətən onun üçün şəhidlərin əmanəti, millətin namusu, keçmişin qüruru və gələcək nəsillərin azadlıq təminatıdır. Məhz bu ali şüur və sarsılmaz iman Azərbaycan əsgərini dünyadakı bir çox orduların hərbçilərindən fərqləndirən ən böyük mənəvi qüvvədir.

Tarix boyu xalqımız çətin sınaqlarla üz-üzə qalsa da, daxilindəki azadlıq alovunu və torpaq sevgisini heç vaxt itirməmişdir. Bu sarsılmaz vətənpərvərlik ruhunun ən parlaq, ən möhtəşəm nümayişi, şübhəsiz ki, 44 günlük Vətən Müharibəsində və ondan sonra həyata keçirilən tarixi antiterror tədbirlərində özünü göstərdi. Otuz ilə yaxın davam edən torpaq həsrətinə, xalqımızın qəlbindəki Qarabağ nisgilinə son qoyan güc məhz Azərbaycan əsgərinin daxili mənəviyyatı idi. Keçilməz hesab olunan düşmən istehkamlarını asanlıqla yaran, müasir hərb elminin qanunlarını yenidən yazan və yalın əllə, sıldırım qayaları dırmaşaraq Şuşanı azad edən Azərbaycan əsgəri bütün dünyaya böyük bir həqiqəti sübut etdi: Müharibələri qələbəyə aparan, döyüşlərin taleyini həll edən əsas amil təkcə ən müasir silahlar və texnologiyalar deyil, həm də o silahı tutan əllərin arxasındakı qorxubilməz, vətən eşqi ilə döyünən böyük ürəkdir.

Azərbaycan əsgərinin dastanlaşan vətənpərvərliyi həm də onun şəhadətə olan münasibətində gizlidir. Ölümün gözünə dik baxaraq, bir addım belə geri çəkilmədən "Təki Vətən yaşasın!" deyib canını fəda edən gənclərimizin şücaəti bu xalqın daxili qüdrətinin bariz nümunəsidir. Onlar üçün vətənin bütövlüyü, millətin şərəfi öz gəncliklərindən, reallaşmamış arzularından və canlarından qat-qat uca dayanmışdır. Şəhidlik zirvəsinə ucalan hər bir əsgərimiz, qazilik mərtəbəsinə yetişən hər bir döyüşçümüz rəşadət rəmzinə çevrilərək gələcək nəsillər üçün unudulmaz bir örnək, qəhrəmanlıq məktəbi qoyub getmişdir.

26 İyun – Azərbaycan Respublikasının Silahlı Qüvvələri Günündə hər birimiz böyük qürur və fəxarət hissi ilə bəyan edirik ki, rəşadətli ordumuzun gücü onun yüksək peşəkarlığı və müasir texniki təchizatı ilə yanaşı, həm də əsgərinin sarsılmaz mənəvi gücündən gəlir. İndi Qarabağın və Şərqi Zəngəzurun uca dağ zirvələrində, sərhədlərimizin ən çətin nöqtələrində, soyuqda və istidə, gecə və gündüz ayıq-sayıq keşik çəkən əsgərin gözlərindəki o qətiyyətli baxış, ölkəmizin hər bir guşəsində dinc və əmin-amanlıq içində yaşamağımızın ən böyük zəmanətidir.

Azərbaycan əsgərinin vətənpərvərlik ruhu xalqımızın tükənməz qürur mənbəyi, dövlətimizin isə ən möhkəm, sarsılmaz qalasıdır. Bu müqəddəs ruh var olduqca, Azərbaycan xalqı hər zaman başıuca yaşayacaq və üçrəngli müqəddəs bayrağımız Vətən səmalarında hər zaman uca və toxunulmaz dalğalanacaqdır. Silahlı Qüvvələr Günümüz mübarək olsun!

Pərviz Məcnunov

YAP Laçın rayon təşkilatının əməkdaşı

Paylaş:

Baxılıb: 221 dəfə