26 İyun – Azərbaycan Respublikasının Silahlı Qüvvələri Günü: Dövlətimizin qüdrətinin və milli qürurumuzun təntənəsi

Bakı:

26 °C

53 %

3 m/s

AZ RU EN

Ana səhifə / YAP xəbərləri / 26 İyun – Azərbaycan Respublikasının Silahlı Qüvvələri Günü: Dövlətimizin qüdrətinin və milli qürurumuzun təntənəsi

26 İyun – Azərbaycan Respublikasının Silahlı Qüvvələri Günü: Dövlətimizin qüdrətinin və milli qürurumuzun təntənəsi

24.06.2026 [15:49]

Azərbaycan xalqının zəngin dövlətçilik ənənələrinin mühüm dayaqlarından biri güclü ordu quruculuğudur. Hər il 26 İyun tarixinin Azərbaycan Respublikasının Silahlı Qüvvələri Günü kimi qeyd olunması ölkəmizdə hərb sənətinə, Vətən müdafiəçilərinə və müstəqil dövlətimizin təhlükəsizliyini təmin edən qüdrətli ordumuza verilən yüksək dəyərin ifadəsidir. Bu əlamətdar gün xalqımızın milli qürur mənbəyi olmaqla yanaşı, Azərbaycan Ordusunun keçdiyi şərəfli inkişaf yoluna nəzər salmaq, əldə olunan uğurları dəyərləndirmək və gələcək hədəfləri müəyyənləşdirmək baxımından xüsusi əhəmiyyət daşıyır.

Azərbaycan Xalq Cümhuriyyəti dövründə, 1918-ci il iyunun 26-da milli ordunun yaradılması haqqında qərarın qəbul edilməsi müstəqil dövlət quruculuğu prosesinin mühüm mərhələlərindən biri olmuşdur. Həmin tarixi qərar Azərbaycan xalqının öz təhlükəsizliyini təmin etmək, suverenliyini qorumaq və müstəqilliyini möhkəmləndirmək istiqamətində atdığı ən mühüm addımlardan biri kimi tarixə düşmüşdür. Sonralar ümummilli lider Heydər Əliyevin 1998-ci ildə imzaladığı fərmanla 26 İyun tarixi rəsmi olaraq Azərbaycan Respublikasının Silahlı Qüvvələri Günü elan edilmişdir.

Müstəqilliyin ilk illərində ölkədə hökm sürən siyasi qeyri-sabitlik və xaos şəraitində ordu quruculuğu sahəsində ciddi problemlər mövcud idi. Vahid komandanlığın olmaması, nizami hərbi qüvvələrin tam formalaşmaması və müxtəlif silahlı dəstələrin fəaliyyəti dövlətin təhlükəsizliyi üçün ciddi təhdidlər yaradırdı. Məhz belə mürəkkəb bir dövrdə xalqın təkidli tələbi ilə hakimiyyətə qayıdan ümummilli lider Heydər Əliyev Azərbaycan dövlətçiliyinin xilası ilə yanaşı, peşəkar və nizami ordunun formalaşdırılması istiqamətində mühüm islahatlara başladı.

Heydər Əliyevin rəhbərliyi ilə həyata keçirilən məqsədyönlü siyasət nəticəsində Silahlı Qüvvələrdə vahid komandanlıq prinsipi təmin edildi, hərbi hissələrin maddi-texniki bazası gücləndirildi, peşəkar zabit kadrlarının hazırlanmasına xüsusi diqqət yetirildi və ordu quruculuğunun hüquqi əsasları yaradıldı. Məhz həmin dövrdə əsası qoyulan islahatlar müasir Azərbaycan Ordusunun inkişafının təməlini təşkil etdi.

Ümummilli liderin siyasi kursunu uğurla davam etdirən Prezident, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan Ordusu keyfiyyətcə yeni inkişaf mərhələsinə qədəm qoydu. Son illər ərzində hərbi büdcənin artırılması, müasir silah və texnikaların alınması, beynəlxalq təcrübənin öyrənilməsi və hərbi sənaye kompleksinin inkişafı ordumuzun gücünü daha da artırdı. Müasir çağırışlara uyğun aparılan islahatlar nəticəsində Azərbaycan Silahlı Qüvvələri regionun ən güclü ordularından birinə çevrildi.

Azərbaycan Ordusunun qüdrəti 2020-ci ildə 44 günlük Vətən müharibəsi zamanı bütün dünyaya nümayiş etdirildi. Prezident, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu tarixi Zəfər qazanaraq ölkəmizin ərazi bütövlüyünü təmin etdi. Ermənistanın uzun illər davam edən işğal siyasətinə son qoyuldu, Qarabağ və Şərqi Zəngəzur bölgələri azad edildi. Bu Zəfər Azərbaycan xalqının milli birliyinin, güclü dövlət idarəçiliyinin və müasir ordunun nəticəsi kimi tarixə həkk olundu.

Azərbaycan əsgəri və zabiti Vətən müharibəsində yüksək peşəkarlıq, qəhrəmanlıq və fədakarlıq nümayiş etdirdi. Minlərlə hərbçi torpaqlarımızın azadlığı uğrunda canını fəda edərək şəhidlik zirvəsinə ucaldı, qazilərimiz isə sağlamlıqlarını itirsələr də, Vətən qarşısındakı müqəddəs borclarını layiqincə yerinə yetirdilər. Bu gün Azərbaycan dövləti şəhid ailələrinə və qazilərə hərtərəfli sosial qayğı göstərir, onların problemlərinin həlli daim diqqət mərkəzində saxlanılır.

2023-cü ilin sentyabr ayında həyata keçirilən lokal xarakterli antiterror tədbirləri nəticəsində ölkəmizin bütün ərazilərində dövlət suverenliyi tam bərpa olundu. Bununla da Azərbaycan öz Konstitusiya quruluşunu bütün ərazilərində təmin etdi və yeni inkişaf mərhələsinə qədəm qoydu. Bu uğurların əsasında güclü ordu, xalq-iqtidar birliyi və milli həmrəylik dayanır.

Bu gün Azərbaycan Silahlı Qüvvələri ən müasir silah sistemləri ilə təchiz olunmuş, yüksək döyüş hazırlığına malik, peşəkar və çevik bir hərbi qüvvədir. Ordumuzda şəxsi heyətin sosial müdafiəsinin gücləndirilməsi, hərbi təhsilin inkişaf etdirilməsi, beynəlxalq əməkdaşlığın genişləndirilməsi və yeni texnologiyaların tətbiqi istiqamətində mühüm işlər həyata keçirilir. Müdafiə sənayesinin inkişafı isə ölkəmizin hərbi təhlükəsizliyinin daha da möhkəmlənməsinə xidmət edir.

Silahlı Qüvvələr Günü yalnız hərbi qulluqçuların bayramı deyil, bütün Azərbaycan xalqının qürur günüdür. Bu əlamətdar tarix xalqımızın öz Ordusuna olan inamını, dövlətinə sədaqətini və Vətənə bağlılığını ifadə edir. Azərbaycan Ordusu dövlətimizin müstəqilliyinin, ərazi bütövlüyünün və suverenliyinin etibarlı təminatçısıdır.

26 İyun – Azərbaycan Respublikasının Silahlı Qüvvələri Günü münasibətilə bütün hərbi qulluqçularımızı, müharibə veteranlarını, şəhid ailələrini və qazilərimizi ürəkdən təbrik edir, şanlı Azərbaycan Ordusuna yeni uğurlar, Vətənimizin keşiyində dayanan igid əsgər və zabitlərimizə möhkəm cansağlığı, əmin-amanlıq və daim qalibiyyətlər arzulayırıq. Güclü dövlətin güclü ordusu vardır və Azərbaycan Ordusu bu həqiqətin ən parlaq təcəssümüdür.

Xəyyam Vəliyev,

YAP Gədəbəy rayon təşkilatının əməkdaşı

Paylaş:

Baxılıb: 78 dəfə