26 İyun – Azərbaycan Silahlı Qüvvələri Günü: Gücün, Qələbənin və Qürurun Tarixi

Bakı:

24 °C

64 %

7 m/s

Əlaqə

AZ RU EN

Ana səhifə / YAP xəbərləri / 26 İyun – Azərbaycan Silahlı Qüvvələri Günü: Gücün, Qələbənin və Qürurun Tarixi

26 İyun – Azərbaycan Silahlı Qüvvələri Günü: Gücün, Qələbənin və Qürurun Tarixi

22.06.2026 [13:57]

26 İyun – Azərbaycan Silahlı Qüvvələri Günü xalqımızın qürurla qeyd etdiyi əlamətdar tarixlərdən biridir. Bu gün milli ordumuzun keçdiyi şərəfli yolu, qazandığı uğurları və dövlətimizin təhlükəsizliyinin təmin olunmasındakı mühüm rolunu bir daha xatırlamaq üçün xüsusi əhəmiyyət daşıyır.

Azərbaycan milli ordusunun əsası 1918-ci il iyunun 26-da Azərbaycan Xalq Cümhuriyyətinin qərarı ilə qoyulub. Həmin tarixdə milli ordunun yaradılması haqqında fərman imzalanaraq müstəqil dövlətçiliyin qorunmasına xidmət edən mühüm addım atılıb. Bu gün 108 illik tarixi olan Azərbaycan Ordusu ölkəmizin ən etibarlı dayaqlarından biri kimi fəaliyyət göstərir.

Müstəqilliyin ilk illərində ölkədə hökm sürən mürəkkəb ictimai-siyasi vəziyyət ordu quruculuğuna da mənfi təsir göstərirdi. Lakin Ümummilli Lider Heydər Əliyevin hakimiyyətə qayıdışından sonra bu sahədə əsaslı islahatlara başlanıldı. Orduda vahid komandanlıq sistemi yaradıldı, nizami hərbi hissələrin formalaşdırılması sürətləndirildi və peşəkar ordu quruculuğunun möhkəm təməli qoyuldu.

Prezident, Ali Baş Komandan İlham Əliyevin rəhbərliyi dövründə isə Azərbaycan Ordusunun gücləndirilməsi dövlət siyasətinin əsas istiqamətlərindən birinə çevrildi. Müasir silah və texnikaların alınması, hərbi infrastrukturun yenilənməsi, hərbçilərin sosial müdafiəsinin gücləndirilməsi ordumuzun döyüş qabiliyyətini əhəmiyyətli dərəcədə artırdı.

Azərbaycan Ordusunun peşəkarlığı və gücü 2016-cı ilin Aprel döyüşlərində bir daha öz təsdiqini tapdı. Ermənistanın təxribatlarına cavab olaraq həyata keçirilən əks-hücum əməliyyatları nəticəsində bir sıra strateji yüksəkliklər və mövqelər işğaldan azad edildi. Cəmi dörd gün davam edən döyüşlər ordumuzun yüksək hazırlığını nümayiş etdirməklə yanaşı, xalqımızda qələbəyə inamı daha da möhkəmləndirdi.

Bu inam 2020-ci ilin 27 sentyabrında başlayan 44 günlük Vətən müharibəsində böyük Zəfərlə nəticələndi. Azərbaycan Ordusu Ali Baş Komandan İlham Əliyevin rəhbərliyi altında həyata keçirdiyi uğurlu əməliyyatlarla işğal altında olan torpaqlarımızı azad etdi. Füzuli, Cəbrayıl, Zəngilan, Qubadlı, Suqovuşan və digər yaşayış məntəqələrinin, eləcə də Qarabağın mədəniyyət paytaxtı Şuşanın azad olunması tariximizin ən şanlı səhifələrinə çevrildi. 10 noyabr 2020-ci ildə əldə olunan Qələbə ilə ölkəmizin ərazi bütövlüyünün bərpası istiqamətində mühüm nəticə əldə olundu.

2023-cü ilin sentyabrında həyata keçirilən lokal xarakterli antiterror tədbirləri isə Azərbaycanın dövlət suverenliyinin tam bərpasını təmin etdi. Qısa müddətdə başa çatan əməliyyat nəticəsində qanunsuz silahlı birləşmələr zərərsizləşdirildi və ölkəmizin konstitusiya quruluşunun bütün ərazidə təmin olunması mümkün oldu.

Bu gün Azərbaycan Ordusu regionun ən güclü hərbi qüvvələrindən biri hesab olunur. Ordumuzun uğurlarının təməlində güclü dövlət siyasəti, müasir hərbi hazırlıq, xalq-ordu birliyi və Vətənə sonsuz sədaqət dayanır.

26 İyun – Silahlı Qüvvələri Günü münasibətilə bütün hərbi qulluqçularımızı və müharibə veteranlarını səmimi qəlbdən təbrik edir, şəhidlərimizin əziz xatirəsini dərin ehtiramla yad edirik. Azərbaycan Ordusunun şanlı tarixi və qazandığı zəfərlər xalqımızın yaddaşında daim yaşayacaq, gələcək nəsillər üçün qürur mənbəyi olacaqdır.

Araz Xudadanov

YAP Sabunçu rayon təşkilatının sədri

Paylaş:

Baxılıb: 370 dəfə