Bakı Enerji Həftəsi Azərbaycanın enerji liderliyini bir daha təsdiqlədi

Bakı:

22 °C

75 %

4 m/s

Əlaqə

AZ RU EN

Ana səhifə / YAP xəbərləri / Bakı Enerji Həftəsi Azərbaycanın enerji liderliyini bir daha təsdiqlədi

Bakı Enerji Həftəsi Azərbaycanın enerji liderliyini bir daha təsdiqlədi

04.06.2026 [13:58]

Azərbaycanın enerji siyasəti son otuz ildə ölkənin iqtisadi inkişafının, beynəlxalq nüfuzunun və regional əməkdaşlıq modelinin əsas dayaqlarından biri kimi çıxış edib. Ulu Öndər Heydər Əliyevin müəyyənləşdirdiyi neft strategiyası Prezident İlham Əliyevin rəhbərliyi ilə müasir dövrün çağırışlarına uyğun şəkildə daha da inkişaf etdirilərək ölkəmizin enerji təhlükəsizliyinin təmin olunmasında və beynəlxalq enerji bazarlarında etibarlı tərəfdaş kimi tanınmasında mühüm rol oynayıb. Bu gün Azərbaycan təkcə neft və qaz ixrac edən ölkə deyil, eyni zamanda enerji təhlükəsizliyinə töhfə verən, yaşıl enerji keçidinə fəal qoşulan və regional əməkdaşlığın genişlənməsinə xidmət edən strateji mərkəzə çevrilib.

2026-cı il iyunun 1-də keçirilən Bakı Enerji Həftəsinin rəsmi açılış mərasimində Azərbaycan Prezidenti İlham Əliyev çıxışı zamanı ölkəmizin enerji siyasətinin uğurlarını, qarşıda duran vəzifələri və qlobal enerji bazarında Azərbaycanın rolunu geniş şəkildə diqqətə çatdırdı. Dövlət başçısı qeyd etdi ki, vaxtilə Xəzər Neft və Qaz Sərgisi ilə əsası qoyulan enerji platforması bu gün beynəlxalq enerji ictimaiyyətinin diqqət mərkəzində olan Bakı Enerji Həftəsinə çevrilib. Prezident vurğuladı ki, bu tədbir artıq qlobal enerji gündəliyinin formalaşmasına töhfə verən nüfuzlu platformalardan biri hesab olunur.

Çıxışında Prezident İlham Əliyev Azərbaycanın müasir enerji tarixində mühüm yer tutan “Şahdəniz” layihəsinin əhəmiyyətinə xüsusi diqqət ayırdı. Dövlət başçısı xatırlatdı ki, dünyanın ən böyük qaz yataqlarından biri olan Şahdəniz üzrə müqavilənin imzalanmasından 30 il ötür və bu layihə Azərbaycanın qaz ixracatçısı kimi mövqeyinin möhkəmlənməsinə, Avropa və digər regionların enerji təhlükəsizliyinə mühüm töhfələr verməsinə şərait yaradıb. Bu gün Azərbaycan qazı bir çox ölkələrin enerji balansında vacib yer tutur və ölkəmiz etibarlı enerji təchizatçısı kimi beynəlxalq tərəfdaşların etimadını qazanıb.

Dövlət başçısı vurğuladı ki, enerji təhlükəsizliyi məsələsi hazırkı geosiyasi şəraitdə daha böyük əhəmiyyət kəsb edir. Bu baxımdan Azərbaycan uzun illər ərzində həyata keçirdiyi ardıcıl siyasət nəticəsində özünü etibarlı tərəfdaş kimi təsdiqləyib. Prezident qeyd etdi ki, ölkəmiz beynəlxalq öhdəliklərinə daim sadiq qalıb, enerji layihələrinin vaxtında və uğurla icrasını təmin edib, tərəfdaş ölkələrlə qarşılıqlı etimada əsaslanan əməkdaşlıq münasibətləri qurub.

Çıxış zamanı enerji sektorunda beynəlxalq əməkdaşlığın əhəmiyyəti də xüsusi vurğulandı. Prezident İlham Əliyev Bakı Enerji Həftəsinin müxtəlif ölkələrdən dövlət nümayəndələrini, enerji şirkətlərini və ekspertləri bir araya gətirməsinin qlobal enerji dialoquna mühüm töhfə verdiyini bildirdi. Tədbirdə iştirak edən onlarla ölkənin və yüzlərlə şirkətin nümayəndələrinin Bakıda toplaşması Azərbaycanın enerji sahəsində beynəlxalq əhəmiyyətini bir daha nümayiş etdirdi.

Cənab Prezident çıxışında ənənəvi enerji mənbələri ilə yanaşı, bərpaolunan enerji sahəsində həyata keçirilən layihələrdən də bəhs etdi. Dövlət başçısı qeyd etdi ki, Azərbaycan yaşıl enerji gündəliyinin reallaşdırılmasına xüsusi önəm verir və bu istiqamətdə iri həcmli layihələr həyata keçirilir. Günəş və külək enerjisi sahəsində xarici investorlarla əməkdaşlıq ölkənin enerji balansının şaxələndirilməsinə, ətraf mühitin qorunmasına və gələcək nəsillər üçün dayanıqlı inkişafın təmin edilməsinə xidmət edir.

Dövlət başçısı Bakı Enerji Həftəsinin rəsmi açılış mərasimindəki çıxışı Azərbaycanın enerji siyasətinin uğurlarının, beynəlxalq əməkdaşlığa verdiyi töhfələrin və gələcək inkişaf prioritetlərinin təqdimatı baxımından mühüm əhəmiyyət daşıdı. Dövlət başçısının səsləndirdiyi fikirlər bir daha göstərdi ki, Azərbaycan enerji sahəsində qazandığı nailiyyətləri yeni mərhələdə yaşıl enerji strategiyası ilə tamamlayaraq regional və qlobal enerji təhlükəsizliyinin təmin edilməsində öz rolunu daha da gücləndirmək əzmindədir. Bu baxımdan Bakı Enerji Həftəsi yalnız iqtisadi tədbir deyil, həm də Azərbaycanın beynəlxalq nüfuzunu, enerji diplomatiyasını və gələcəyə hesablanmış inkişaf modelini nümayiş etdirən mühüm platforma kimi çıxış edir.

Elşən Səfərov

YAP Ağcabədi rayon təşkilatının əməkdaşı

Paylaş:

Baxılıb: 294 dəfə