Cümhuriyyətin arzularını gerçəkləşdirən Dahi Lider

Bakı:

18 °C

50 %

1 m/s

Əlaqə

AZ RU EN

Ana səhifə / YAP xəbərləri / Cümhuriyyətin arzularını gerçəkləşdirən Dahi Lider

Cümhuriyyətin arzularını gerçəkləşdirən Dahi Lider

26.05.2026 [11:14]

28 May Müstəqillik Günü Azərbaycan xalqının çoxəsrlik azadlıq mübarizəsinin, milli mənliyinin və dövlətçilik təfəkkürünün ən uca zirvəsidir. 1918-ci ilin bu şanlı günündə əsası qoyulmuş Azərbaycan Xalq Cümhuriyyəti Şərqdə və müsəlman dünyasında ilk demokratik respublika kimi tarixə düşmüşdür. Lakin cümhuriyyətin qısa ömürlü süqutundan sonra bu müqəddəs irsin yaşadılması, onun hüquqi və siyasi qiymətini alması, ən əsası isə gerçək müstəqilliyə çevrilməsi birbaşa Ümummilli Lider Heydər Əliyevin adı və tarixi fəaliyyəti ilə bağlıdır.

Ulu Öndər Heydər Əliyev təkcə müasir Azərbaycan dövlətinin memarı deyil, həm də 1918-ci ilin 28 mayında alovlanan müstəqillik məşəlinin sönməzliyini təmin edən dahi Liderdir.

Ulu Öndərin Azərbaycan Xalq Cümhuriyyətinin irsinə və 28 May ideallarına sahib çıxması hələ SSRİ-nin mövcud olduğu, sovet rejiminin hökm sürdüyü dövrlərə təsadüf edir. 1990-cı il noyabrın 17-də Heydər Əliyevin rəhbərliyi ilə keçirilən Naxçıvan Muxtar Respublikası Ali Məclisinin sessiyasında tarixi qərarlar qəbul olundu. AXC-nin üçrəngli bayrağı ilk dəfə Naxçıvanda dövlət bayrağı kimi qəbul edildi.

1991-ci il oktyabrın 18-də qəbul edilmiş Konstitusiya Aktı ilə Azərbaycan özünü AXC-nin hüquqi varisi elan etsə də, bu varisliyin real məzmunla doldurulması Heydər Əliyevin adı ilə bağlıdır. 1995-ci ildə Ulu Öndərin müəllifliyi ilə qəbul edilən müstəqil Azərbaycanın ilk Konstitusiyası məhz 1918-ci il İstiqlal Bəyannaməsinin demokratik prinsiplərinə, insan hüquq və azadlıqlarına əsaslanırdı. AXC-nin himni, gerbi və bayrağı müasir Azərbaycan dövlətinin rəsmi atributları kimi təsbit olundu.

Azərbaycan Ali Soveti qarşısında bu bayrağın bütün ölkə miqyasında rəsmi dövlət rəmzi kimi qəbul edilməsi barədə vəsatət qaldırıldı.

Bu cəsarətli addım faktiki olaraq 28 May istiqlal ruhunun sovet imperiyasının buxovlarından azad edilərək yenidən dirçəldilməsi demək idi.

Heydər Əliyev siyasi kursunun ən böyük tarixi uğuru müstəqilliyimizin və suverenliyimizin bütün ölkə ərazisində tam təmin edilməsi oldu. Ulu Öndərin layiqli davamçısı, Prezident İlham Əliyevin rəhbərliyi və Müzəffər Azərbaycan Ordusunun şücaəti sayəsində Qarabağ işğaldan azad edildi, ölkənin ərazi bütövlüyü tam bərpa olundu.

Xalqımız artıq 28 May Müstəqillik Gününü sadəcə bir tarixi bayram kimi deyil, Şuşada, Xankəndidə, Laçında dalğalanan üçrəngli bayrağımızın qüruru ilə, tam suveren və bütöv dövlət olaraq qeyd edir. Bu Zəfər, vaxtilə cümhuriyyət quranların ruhuna ən böyük ehtiram, Ulu Öndər Heydər Əliyevin isə ən böyük vəsiyyətinin yerinə yetirilməsidir.

Ulu Öndər sübut etdi ki, 1918-ci ildə qurulan cümhuriyyət iqtisadi, hərbi və siyasi zəiflik səbəbindən cəmi 23 ay yaşaya bildisə, müasir Azərbaycan dövləti güclü orduya, dayanıqlı iqtisadiyyata və sarsılmaz xalq-iqtidar birliyinə malik olaraq əbədi yaşayacaqdır.

Zeynalova Samirə

YAP Tərtər rayon təşkilatının mühasibi

Paylaş:

Baxılıb: 113 dəfə