Üçrəngli bayrağın Zəfər Yolu: 28 Maydan Qarabağa

Bakı:

25 °C

59 %

6 m/s

Əlaqə

AZ RU EN

Ana səhifə / YAP xəbərləri / Üçrəngli bayrağın Zəfər Yolu: 28 Maydan Qarabağa

Üçrəngli bayrağın Zəfər Yolu: 28 Maydan Qarabağa

25.05.2026 [11:18]

1918-ci il mayın 28-də yaradılmış Azərbaycan Xalq Cümhuriyyəti xalqımızın dövlətçilik tarixində yeni bir mərhələnin başlanğıcı oldu. Məhz həmin gün Şərqdə ilk parlamentli respublika quruldu, xalqın milli iradəsi dövlət səviyyəsində təsdiq edildi və Azərbaycanın müstəqil dövlət kimi dünya siyasi xəritəsində yeri müəyyənləşdi. Azərbaycan Xalq Cümhuriyyəti cəmi 23 ay fəaliyyət göstərsə də, onun yaratdığı siyasi və mənəvi irs əsrlər boyu yaşayacaq böyük bir məktəbə çevrildi. Bu irsin ən müqəddəs rəmzlərindən biri isə üçrəngli Azərbaycan bayrağı oldu.

Sovet hakimiyyəti illərində Azərbaycan xalqı öz milli dövlətçiliyindən məhrum edilsə də, müstəqillik arzusu heç vaxt sönmədi. Üçrəngli bayraq qəlblərdə yaşadı, azadlıq uğrunda mübarizə aparan insanların ruhuna çevrildi. XX əsrin sonlarında xalqımız yenidən müstəqillik uğrunda ayağa qalxdı və 1991-ci ildə Azərbaycan dövlət müstəqilliyini bərpa etdi. Həmin dövrdə xalqın təkidli tələbi ilə Azərbaycan Xalq Cümhuriyyətinin bayrağı yenidən dövlət bayrağı kimi qəbul edildi. Bu, tarixi ədalətin bərpası və milli yaddaşın dirçəldilməsi idi.

Müstəqilliyimizin ilk illərində ölkədə hökm sürən siyasi böhran, xaos və xarici təhdidlər Azərbaycan dövlətçiliyini ciddi təhlükə ilə üz-üzə qoymuşdu. Belə ağır bir dövrdə xalqın tələbi ilə hakimiyyətə qayıdan Ümummilli Lider Heydər Əliyev müstəqilliyimizin qorunması, dövlətçiliyimizin möhkəmləndirilməsi və milli birliyin təmin olunması istiqamətində misilsiz xidmətlər göstərdi. Heydər Əliyev Azərbaycan Xalq Cümhuriyyətinin ideallarına xüsusi önəm verir, üçrəngli bayrağı dövlət müstəqilliyimizin əsas rəmzi kimi qiymətləndirirdi. Onun rəhbərliyi ilə Azərbaycan beynəlxalq aləmdə öz mövqeyini möhkəmləndirdi, ordu quruculuğu sürətləndi və gələcək inkişafın təməli qoyuldu.

Bu siyasi kurs bu gün Prezident İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan təkcə regionun deyil, dünyanın nüfuzlu dövlətlərindən birinə çevrilib. Güclü iqtisadiyyat, qüdrətli ordu və milli birlik nəticəsində Azərbaycan tarixi ədaləti bərpa etməyə nail oldu. Xalqımızın illərlə həsrətində olduğu Qarabağ və Şərqi Zəngəzur torpaqları işğaldan azad edildi. Bu qələbə yalnız hərbi uğur deyil, həm də Azərbaycan Xalq Cümhuriyyətinin yarımçıq qalmış dövlətçilik idealının tam reallaşması idi.

2020-ci ildə 44 günlük Vətən müharibəsində Azərbaycan Ordusunun qazandığı möhtəşəm zəfər nəticəsində üçrəngli bayrağımız işğaldan azad olunmuş torpaqlarda dalğalandı. Şuşada, Cəbrayılda, Füzulidə, Zəngilanda, Qubadlıda, Kəlbəcərdə, Laçında və digər azad edilmiş ərazilərdə Azərbaycan bayrağının ucaldılması xalqımız üçün qürur və fəxarət anına çevrildi. Dövlət Başçısının həmin torpaqlarda bayrağımızı ucaltması Azərbaycan tarixinin ən möhtəşəm səhifələrindən biri oldu.

Bu gün Azərbaycan bayrağının Qarabağda dalğalanması yalnız hərbi zəfərin nəticəsi deyil, həm də böyük siyasi iradənin, milli birliyin və xalq-dövlət həmrəyliyinin təntənəsidir. Cənab Prezident İlham Əliyevin həyata keçirdiyi siyasət nəticəsində Azərbaycan öz ərazi bütövlüyünü və suverenliyini tam təmin etdi. Bu, gələcək nəsillərə verilən ən böyük dövlətçilik əmanətidir. Çünki bayraq təkcə parça deyil, o, xalqın tarixi, şəhidlərin qanı, qəhrəmanların iradəsi və gələcək nəsillərin qürur mənbəyidir.

Bu gün işğaldan azad edilmiş ərazilərdə genişmiqyaslı bərpa-quruculuq işləri aparılır. Dağıdılmış şəhərlər və kəndlər yenidən qurulur, yollar, məktəblər, xəstəxanalar, hava limanları tikilir. Qarabağ və Şərqi Zəngəzur yenidən həyat qazanır. Bütün bu işlərin mərkəzində isə Azərbaycan bayrağı dayanır. Hər yeni tikilən binada, hər istifadəyə verilən obyekt üzərində dalğalanan üçrəngli bayraq Azərbaycan dövlətinin gücünü və əbədi varlığını nümayiş etdirir.

Azərbaycan gəncliyi də bu müqəddəs irsə böyük ehtiramla yanaşmalıdır. Çünki müstəqillik və dövlətçilik asan qazanılmayıb. Bu yolda minlərlə şəhid canından keçib, qəhrəman oğullarımız torpaqlarımız uğrunda mübarizə aparıblar. Bugünkü azad və güclü Azərbaycan onların qəhrəmanlığının nəticəsidir. Gənc nəsil Azərbaycan Xalq Cümhuriyyətinin ideallarını, Heydər Əliyev dövlətçilik məktəbini və Prezident İlham Əliyevin həyata keçirdiyi milli inkişaf strategiyasını dərindən öyrənməli, dövlət müstəqilliyimizi daim qorumalıdır.

28 May – Müstəqillik Günü Azərbaycan xalqının milli qürur və şərəf tarixidir. Bu tarix xalqımızın azad yaşamaq iradəsini, dövlətçilik ənənələrini və milli birliyini nümayiş etdirir. Bu gün Azərbaycan bayrağının işğaldan azad olunmuş torpaqlarda qürurla dalğalanması isə Azərbaycan Xalq Cümhuriyyətinin ruhunun yaşadığını və müstəqil Azərbaycanın əbədi olduğunu bütün dünyaya göstərir. Cənab Prezident İlham Əliyevin rəhbərliyi ilə əldə olunan bu böyük tarixi nailiyyət gələcək nəsillərə verilən ən qiymətli dövlətçilik mirası kimi daim yaşayacaq.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 337 dəfə