Azərbaycan–Aİ münasibətlərində yeni mərhələ

Bakı:

20 °C

68 %

4 m/s

Əlaqə

AZ RU EN

Ana səhifə / YAP xəbərləri / Azərbaycan–Aİ münasibətlərində yeni mərhələ

Azərbaycan–Aİ münasibətlərində yeni mərhələ

12.03.2026 [17:20]

Əmir Babayev

YAP Şərur rayon təşkilatının sədri

Azərbaycanın Avropa institutları ilə əməkdaşlığı müstəqilliyimizin ilk illərindən etibarən ölkəmizin xarici siyasətinin əsas istiqamətlərindən biri olmuşdur. Xüsusilə Avropa Şurası ilə münasibətlər Azərbaycanın demokratik inkişafı, hüquqi dövlət quruculuğu və beynəlxalq inteqrasiyası baxımından mühüm rol oynamışdır. 2001-ci ildə Azərbaycanın Avropa Şurasına üzv qəbul olunması ölkəmizin Avropa ailəsinə inteqrasiyasında yeni mərhələnin başlanğıcı oldu. Bu üzvlük Azərbaycanın demokratik institutlarının möhkəmləndirilməsi, insan hüquqlarının qorunması və qanunun aliliyinin təmin edilməsi istiqamətində aparılan islahatların daha da sürətlənməsinə şərait yaratdı.

Sonrakı illərdə Azərbaycan Avropa qurumları ilə əməkdaşlığını ardıcıl şəkildə inkişaf etdirdi. Bu münasibətlər təkcə siyasi dialoqla məhdudlaşmadı, həm də iqtisadi, enerji, humanitar və təhlükəsizlik sahələrində geniş əməkdaşlıq platformasına çevrildi. Azərbaycan Avropanın enerji təhlükəsizliyində mühüm tərəfdaş kimi tanınmağa başladı. Xüsusilə ölkəmizin təşəbbüsü ilə həyata keçirilən beynəlxalq enerji layihələri Avropa ilə strateji tərəfdaşlığın möhkəmlənməsində mühüm rol oynadı.

Bu əməkdaşlığın yeni mərhələsi Azərbaycan Respublikasının Prezidenti İlham Əliyev ilə Avropa İttifaqı Şurasının Prezidenti Antonio Costa arasında keçirilən görüş və birgə mətbuat bəyanatı zamanı bir daha öz təsdiqini tapdı. Görüş zamanı tərəflər Azərbaycan ilə Avropa İttifaqı arasında siyasi dialoqun yüksək səviyyədə olduğunu, qarşılıqlı hörmət və tərəfdaşlıq prinsiplərinə əsaslandığını vurğuladılar.

Birgə mətbuat bəyanatında qeyd olundu ki, Azərbaycan Avropa üçün etibarlı enerji tərəfdaşıdır. Xüsusilə Cənub Qaz Dəhlizi layihəsi Avropanın enerji təhlükəsizliyinin təmin olunmasında mühüm rol oynayır. Prezident İlham Əliyev çıxışında Azərbaycanın enerji resurslarının Avropa bazarlarına çatdırılmasının həm iqtisadi, həm də geosiyasi baxımdan böyük əhəmiyyət daşıdığını bildirdi.

Eyni zamanda görüş zamanı regional təhlükəsizlik məsələləri, Cənubi Qafqazda sülh və sabitliyin təmin olunması, həmçinin münaqişədən sonrakı dövrdə regionda yeni əməkdaşlıq imkanları da müzakirə edildi. Prezident İlham Əliyev Azərbaycanın ərazi bütövlüyünü və suverenliyini tam bərpa etdiyini qeyd edərək regionda davamlı sülhün qurulması üçün ölkəmizin konstruktiv mövqe nümayiş etdirdiyini vurğuladı.

Antonio Koşta isə öz növbəsində Azərbaycan ilə Avropa İttifaqı arasında münasibətlərin inkişafından məmnunluğunu ifadə edərək bildirdi ki, tərəfdaşlıq gələcək illərdə daha da genişlənəcək. O qeyd etdi ki, enerji, nəqliyyat, yaşıl enerji və iqtisadi əməkdaşlıq sahələrində yeni layihələr iki tərəf arasında əlaqələri daha da gücləndirəcək.

Birgə mətbuat bəyanatı göstərdi ki, Azərbaycan Avropa ilə münasibətlərində etibarlı və strateji tərəfdaş kimi çıxış edir. Bu münasibətlər qarşılıqlı maraqlara, siyasi dialoqa və ortaq inkişaf məqsədlərinə əsaslanır. Azərbaycanın həyata keçirdiyi uğurlu xarici siyasət nəticəsində ölkəmiz regionda sabitliyin və əməkdaşlığın əsas mərkəzlərindən birinə çevrilmişdir.

Beləliklə, Prezident İlham Əliyev ilə Antonio Koşta arasında keçirilən görüş və birgə mətbuat bəyanatı Azərbaycan ilə Avropa İttifaqı arasında münasibətlərin yeni mərhələyə qədəm qoyduğunu göstərir. Bu əməkdaşlıq gələcəkdə siyasi, iqtisadi və humanitar sahələrdə daha geniş imkanlar yaradacaq və tərəflər arasında strateji tərəfdaşlığın daha da möhkəmlənməsinə xidmət edəcək.

Paylaş:

Baxılıb: 346 dəfə