2 Fevral – Azərbaycan Gəncləri Günü: dövlət gənclər siyasətinin strateji prioritetləri və həyata keçirilməsi

Bakı:

14 °C

77 %

9 m/s

AZ RU EN

Ana səhifə / YAP xəbərləri / 2 Fevral – Azərbaycan Gəncləri Günü: dövlət gənclər siyasətinin strateji prioritetləri və həyata keçirilməsi

2 Fevral – Azərbaycan Gəncləri Günü: dövlət gənclər siyasətinin strateji prioritetləri və həyata keçirilməsi

02.02.2026 [23:12]

Azərbaycan Respublikasında gənclər siyasəti dövlətin uzunmüddətli inkişaf strategiyasının ayrılmaz hissəsi kimi qəbul edilir. Gənclərin bilik və bacarıqlarının artırılması, sosial müdafiəsinin təmin olunması, eləcə də onların cəmiyyətin bütün sahələrində fəal iştirakı dövlət siyasətinin prioritet istiqamətlərindən biridir. Bu kontekstdə 2 Fevral – Azərbaycan Gəncləri Günü yalnız təqvimdəki rəsmi qeyd deyil, həm də gənclərin dövlətin diqqət və qayğısı çərçivəsində formalaşan sosial statusunun və əhəmiyyətinin simvolik ifadəsidir.

Azərbaycan gənclər siyasətinin təməl prinsipləri Ümummilli Lider Heydər Əliyev tərəfindən müəyyən edilmişdir. Ulu Öndər gənclərin hərtərəfli inkişafına xüsusi önəm verərək onların təhsilinə, sağlamlıq və mənəvi tərbiyəsinə diqqət ayırmış, institusional mexanizmlərin formalaşmasına nail olmuşdur. Bu siyasət uzun illər boyunca dövlətin strateji inkişaf planlarının ayrılmaz komponenti olmuşdur.

Hazırkı dövrdə Azərbaycan Respublikasının Prezidenti cənab İlham Əliyev tərəfindən bu xətt davam etdirilir və gənclərin cəmiyyətin bütün sahələrində aktiv rolunu təmin edən genişmiqyaslı tədbirlər həyata keçirilir. Dövlət proqramları və konsepsiyalar gənclərin peşə və intellektual bacarıqlarının artırılmasını, onların sosial rifahının yaxşılaşdırılmasını, eləcə də ictimai proseslərdə iştirakının stimullaşdırılmasını hədəfləyir.

Azərbaycan gəncliyi dövlətin dəstəyi ilə ölkənin iqtisadi, elmi, mədəni və ictimai həyatında mühüm mövqe tutur. Onlar idarəetmə orqanlarında, bələdiyyələrdə, elmi-tədqiqat və mədəniyyət sahələrində aktiv fəaliyyət göstərir, təşəbbüskarlıq nümayiş etdirərək cəmiyyətin inkişafına konkret töhfələr verirlər. Beynəlxalq müstəvidə gənclərin iştirakı Azərbaycanın dünyada nüfuzunun möhkəmləndirilməsinə xidmət edir.

Vətən müharibəsi zamanı Azərbaycan gəncliyi vətənpərvərlik və yüksək məsuliyyət nümunəsi göstərmiş, Ali Baş Komandanın rəhbərliyi altında torpaqlarımızın azad olunmasında fəal iştirak etmişdir. Bu hadisələr gənclərin dövlətçilik və milli maraqlara bağlılığını nümayiş etdirmişdir.

Postmüharibə dövründə gənclərin üzərinə düşən vəzifələr daha da genişlənmiş, azad edilmiş ərazilərin bərpası və yenidən qurulması, regionların sosial-iqtisadi inkişafının təmin olunması prosesində onların bilik və təşəbbüskarlığından səmərəli istifadə dövlət siyasətinin prioritet sahələrindən olmuşdur. Bu proseslər gənclərin vətəndaş mövqeyinin güclənməsinə və ictimai məsuliyyət hissinin artırılmasına xidmət edir.

Qloballaşma və texnoloji inkişaf dövründə gənclər qarşısında yeni çağırışlar yaranmışdır. Azərbaycan dövləti gənclərin rəqəmsal bacarıqlarını inkişaf etdirmək, innovativ təşəbbüslərə cəlb etmək, beynəlxalq təcrübədən yararlanmaq üçün sistemli tədbirlər həyata keçirir. Eyni zamanda, gənclərin milli-mənəvi dəyərlər ruhunda tərbiyəsi və Azərbaycançılıq ideologiyasına sadiqliyi dövlətin strateji siyasətinin ayrılmaz komponentidir.

2 Fevral – Azərbaycan Gəncləri Günü gənclərin cəmiyyətdəki rolunun və dövlət siyasətindəki əhəmiyyətinin təzahürüdür. Bu gün dövlətin gənclərə göstərdiyi diqqət onların üzərinə düşən vəzifələri bir daha aktuallaşdırır, qarşılıqlı etimad və əməkdaşlıq isə sosial sabitliyin möhkəmlənməsinə və inkişafın təminatına xidmət edir.

Gənclər öz fəaliyyətləri ilə ölkənin inkişafına töhfə verərək dövlətin strateji hədəflərinin reallaşmasında mühüm rol oynayırlar. Onların bilik və bacarıqlarının təşviqi, təşəbbüskarlığının dəstəklənməsi və milli-mənəvi dəyərlərə sadiqliyi Azərbaycan gənclər siyasətinin uğurla həyata keçirildiyini təsdiqləyir.

Aidə İsgəndərli

Gədəbəy Şəhər 2 nömrəli tam orta ümumtəhsil məktəbinin ƏTP sədri

Paylaş:

Baxılıb: 364 dəfə