20 Yanvar həqiqətlərinin dünya ictimaiyyətinə çatdırılmasında Ümummilli lider Heydər Əliyevin rolu

Bakı:

10 °C

93 %

3 m/s

AZ RU EN

Ana səhifə / YAP xəbərləri / 20 Yanvar həqiqətlərinin dünya ictimaiyyətinə çatdırılmasında Ümummilli lider Heydər Əliyevin rolu

20 Yanvar həqiqətlərinin dünya ictimaiyyətinə çatdırılmasında Ümummilli lider Heydər Əliyevin rolu

19.01.2026 [19:41]

Arif Qasımov
YAP Sədərək rayon təşkilatının sədri

20 Yanvar Azərbaycan xalqının məruz qaldığı ən dəhşətli faciələrdən biridir. Biz Qanlı Yanvar faciəsində həmin o müdhiş gecədə vətən, azadlıq və istiqlaliyyət uğrunda həlak olan şəhidlərimizin 36-cı ildönümünü dərin ehtiramla yad edirik.

20 Yanvar 1990-cı il Azərbaycan tarixində faciəli bir gündür. Lakin eyni zamanda, həmin gecə və gün Azərbaycan xalqı öz qəhrəmanlığını, rəşadətini və şəhidlik zirvəsinə ucalmaq qüdrətini bütün dünyaya nümayiş etdirdi. Məhz buna görə də bu gün biz həm dərin kədər, həm də böyük qürur hissi keçiririk. Çünki xalqımız qəhrəman, əyilməz və sınmaz bir xalqdır.

Həmin gün Sovet hərbi maşınının Azərbaycan xalqına qarşı həyata keçirdiyi vəhşi terror aktı insanlığa qarşı törədilən ən ağır cinayətlərdən biri kimi bəşər tarixinə yazıldı. Günahsız insanların qətli və böyük itkilərlə nəticələnən 20 Yanvar faciəsi mərkəzi hakimiyyət başda olmaqla cinayətkar imperiya rəhbərliyinin Azərbaycana qarşı apardığı antihumanist siyasətinə dözməyən xalqımızın azadlıq və müstəqillik uğrunda mübarizə əzmini, məğrurluğunu və qətiyyətini nümayiş etdirdi.

Təəssüf ki, həm SSRİ rəhbərliyi cinayətkarların məsuliyyətə cəlb edilməsi üçün heç bir tədbir görmədilər. Əksinə, bu dəhşətli hadisəni ört-basdır etməyə çalışdılar. Lakin 20 Yanvar faciəsindən bir gün sonra Ümummilli Lider Heydər Əliyevin Azərbaycanın Moskvadakı nümayəndəliyinə gələrək xalqımızın kədərini bölüşməsi və sovet rejiminin Azərbaycanda törətdiyi qanlı cinayəti açıq şəkildə ifşa etməsi o dövrdə xalqımız üçün böyük dayaq və mənəvi təsəlli oldu. Xalq həmin ağır günlərdə tək və köməksiz olmadığını hiss etdi.

Bir müddət sonra Ümummilli Lider Heydər Əliyevin təşəbbüsü və rəhbərliyi ilə Naxçıvan Muxtar Respublikasının Ali Məclisi 1990-cı il noyabrın 21-də 20 Yanvar hadisələrinə ilk siyasi qiyməti verdi. Yalnız Ümummilli Liderin ölkə rəhbərliyinə qayıdışından sonra — 1994-cü ildə — 20 Yanvar faciəsinə siyasi-hüquqi qiymət verildi, cinayəti törədənlərin adları ictimaiyyətə açıqlandı.

Azərbaycanın azadlığı uğrunda canından keçən şəhidlərin xatirəsi daim uca tutulduğu kimi, onların ailə üzvləri də dövlət qayğısı ilə əhatə olunub. Eyni zamanda, 20 Yanvar hadisələri zamanı sağlamlığını itirmiş əlillərin sosial müdafiəsi və pensiya təminatı hər zaman dövlət başçısının diqqət mərkəzində olub. Şəhid ailələrinin və əlillərin sosial müdafiəsinin gücləndirilməsi istiqamətində mütəmadi tədbirlər həyata keçirilib, onların pensiya təminatı, mənzil şəraitinin yaxşılaşdırılması və yaşayış səviyyəsinin yüksəldilməsi üçün möhkəm qanunvericilik bazası formalaşdırılıb. Bu istiqamətdə dövlət başçısı tərəfindən mühüm sərəncam və fərmanlar imzalanıb.

1990-cı ilin yanvarında Sovet İmperiyası qoşun birləşmələrinin Azərbaycan xalqına, dinc əhaliyə qarşı törətdiyi bu cinayətdən illər keçsə də, həmin vəhşilik öz tarixi və siyasi mahiyyətini itirmir. Məhz bunun nəticəsidir ki, 2020-ci il sentyabrın 27-də başlayan 44 günlük Vətən müharibəsi 8 noyabrda Azərbaycanın ərazilərinin Ermənistan tərəfindən təxminən 30 il davam edən işğalına son qoyulması ilə başa çatdı. Bu tarixi Zəfər ilə həm 20 Yanvar, həm də Qarabağ müharibəsi şəhidlərinin qisası alındı.

Ölkə başçısı, Müzəffər Ali Baş Komandan İlham Əliyev cənabları şəhidlərimizin şücaətini daim yüksək qiymətləndirir, onların ruhuna dərin ehtiram göstərir və xatirələrini hər zaman uca tutur.

Paylaş:

Baxılıb: 446 dəfə