İlham Əliyev - Qalib xalqın Qalib Lideri

Bakı:

4 °C

87 %

10 m/s

Əlaqə

AZ RU EN

Ana səhifə / YAP xəbərləri / İlham Əliyev - Qalib xalqın Qalib Lideri

İlham Əliyev - Qalib xalqın Qalib Lideri

22.12.2025 [14:26]

Azərbaycanın son 20 ili nə sadəcə xronologiyadır, nə də rəsmi sənədlərin quru göstəriciləri. Bu illər xalqın taleyinə yazılmış bir yüksəliş dastanıdır. Bu dastanın baş qəhrəmanı isə bir şəxsdir – Prezident İlham Əliyev. Onun rəhbərliyi altında Azərbaycan təkcə dəyişmədi, həm də özünü yenidən yaratdı. Bu gün hər sahədə gördüyümüz uğurun arxasında bir liderin dəmir məntiqi, uzaqgörənliyi və xalqına arxalanan iradəsi dayanır. Aparılan genişmiqyaslı siyasətin mərkəzində elmi dərinlik, diplomatiyanın strateji xətti və dövlətçilik ideyasının pafoslu ruhu dayanır. “Azərbaycan dövlətinin inkişaf fəlsəfəsi milli gücə, müstəqil siyasətə və xalqın rifahına əsaslanır.” Bu sadə görünən cümlə əslində böyük dövlətin uğur resurslarını açıqlayır. Bunu gündəlik həyatda necə görürük? Yol çəkilir – o, təkcə asfalt deyil, bu ölkənin sabahına atılan addımdır. Şəhər qurulur – bu, sadəcə bina deyil, xalqın öz torpağına dönüşünün bir abidəsidir. Fabrik açılır – bu, iqtisadiyyatın yeni nəfəsidir. Diplomatik addım atılır – bu, Azərbaycanın sözünün dünya miqyasında çəkisinin artmasıdır. Cənab Prezident İlham Əliyev siyasətini elə bu sadə həqiqətlərin üzərində qurur: xalq güclənməlidir ki, dövlət yüksəlsin; dövlət yüksəlməlidir ki, xalq daha xoşbəxt yaşasın.

2020-ci ilin Zəfəri təkcə torpaqların azad olunması deyildi. Bu Zəfər Azərbaycanın gücünü, xalqın birliyini və cənab Prezidentin qətiyyətini dünyaya göstərdi. Bu il həmin tarixi qələbənin 5-ci ildönümüdür. Beş il əvvəl Azərbaycanın ordusu düşmən üzərində qələbə qazandısa, son beş ildə Azərbaycan dövləti də Qarabağ üzərində quruculuq mübarizəsinin qalibi oldu. Füzuli hava limanı açıldı, Zəngilan iqtisadi mərkəzə çevrilir, Şuşa mədəniyyət paytaxtına qayıtdı, Böyük Qayıdış başlayıb, artıq həyat geri dönür. Bu beş il göstərdi ki, Azərbaycan yalnız müharibəni yox, sülh və quruculuq dövrünü də qələbə ilə idarə edə bilir. Və bütün bunlar bir liderin, cənab Prezident İlham Əliyevin iradəsi ilə strategiyaya çevrilib. Bu gün Azərbaycan regionda yeni siyasi reallıqlar yaradır. ABŞ-da gözlənilən sülh müqaviləsi əldə edilən razılaşma da həmin reallığın mühüm hissəsidir. Bu müqavilənin mahiyyəti sadə dildə belədir. Ermənistan Azərbaycanın ərazi bütövlüyünü tanıyır, Region sabitliyə qovuşur, Yeni iqtisadi dəhlizlər açılır, Müharibələr dövrü bitir, Qafqazda yeni sistem formalaşır. Bu sənəd həm diplomatik qələbədir, həm də Azərbaycanın gücünün dünyada qəbul edilməsinin göstəricisidir. Diplomatiyada heç nə təsadüfən baş vermir. Bu proseslərin arxasında Azərbaycan Prezidentinin çoxillik siyasi xətti, qətiyyəti və dəqiq dəyərləndirmələri dayanır. Bu gün Azərbaycan göz qabağındadır. Və bu görünən işlərin hamısı bir böyük ideyaya söykənir: “Azərbaycan müstəqil və güclü olmalıdır.” Cənab Prezdent İlham Əliyev dövrünün mahiyyəti sadəcə inkişaf deyil. Bu dövr dövlətin xarakterinin sərtləşməsi, siyasətin prinsipiallaşması, diplomatiyanın güclənməsi, iqtisadiyyatın genişlənməsi, ordunun yenilənməsi, xalqın özünə inamının yüksəlməsidir. Bu model dünyanın bir çox ölkəsinə nümunə ola biləcək bir idarəçilik sistemidir: həm iradəli, həm humanist, həm realist, həm də uzaqgörən. Cənab Prezident İlham Əliyevin fəaliyyətinə baxanda belə görünür: O, xalqın gücünə güvənən, öz sözünü kimsədən çəkinmədən deyən, millətin maraqlarını hər şeydən üstün tutan bir Prezidentdir. Siyasi baxışla yanaşanda isə beynəlxalq aləmdə güc balansını hiss edən, regionda yeni reallıqlar yaradan, böyük güclərlə bərabər statuslu danışıqlar aparan, diplomatiyada yeni xətt formalaşdıran strateqdir. Bu isə böyük dövlətçilik fəlsəfəsidir və Azərbaycanı bu gün regionun, sabah isə daha geniş coğrafiyanın aparıcı güclərindən birinə çevirir. Azərbaycan Prezidenti cənab İlham Əliyev və Türkiyə Prezidenti Rəcəb Tayyib Ərdoğan arasında 2021-ci il iyunun 15-də Şuşada imzalanmış Bəyannamə iki ölkə və onun xalqları arasındakı dostluq və qardaşlıqdan çıxış edərək Azərbaycan Respublikası və Türkiyə Respublikası arasındakı münasibətləri keyfiyyətcə yeni, müttəfiqlik səviyyəsinə qaldırmışdır. Bəyannaməyə əsasən tərəflər xarici siyasət sahəsində əlaqələndirməni və müntəzəm ikitərəfli siyasi məsləhətləşmələri həyata keçirir, həmçinin bu istiqamətdə Azərbaycan Respublikası ilə Türkiyə Respublikası arasında Yüksək Səviyyəli Strateji Əməkdaşlıq Şurası çərçivəsində birgə fəaliyyət göstərir. Tərəflər aktual xarakter kəsb edən, qarşılıqlı maraq doğuran beynəlxalq məsələlər üzrə həmrəylik və qarşılıqlı dəstək nümayiş etdirərək yaxın və ya üst-üstə düşən mövqedən çıxış etməklə ikitərəfli əməkdaşlığı dərinləşdirəcəklər və BMT, ATƏT, Avropa Şurası, Türk Dövlətləri Təşkilatı, İslam Əməkdaşlıq Təşkilatı daxil olmaqla beynəlxalq və regional təşkilatlar çərçivəsində bir-birinə qarşılıqlı dəstək göstərəcəklər.

Son 20 ilin reallığı bir həqiqəti təsdiqləyir. Azərbaycanı dəyişən, gücləndirən və qlobal siyasətdə söz sahibi edən lider cənab Prezident İlham Əliyevdir. Onun dövrünün uğurları sadalanmaqla bitməz. Azərbaycanın hərtərəfli dinamik uğurları onun qətiyyəti ilə indi yeni mərhələyə qədəm qoyur. Sülh müqaviləsi, Zəfərin quruculuq ili, Yeni iqtisadi yüksəliş, Türk dünyasının inteqrasiyası, Qlobal enerji siyasətində aparıcı rol yeni başlanan yoldan xəbər verir. .Azərbaycan bu gün liderin iradəsi ilə daha güclü, daha qürurlu və daha sabit gələcəyə addımlayır. Bu, cənab Prezident İlham Əliyev dövrünün Azərbaycanıdır – qalib, müasir və yenilməz dövlətin adıdır.

David İbramxəlilov,
YAP Qusar rayon təşkilatının sədri

Paylaş:

Baxılıb: 315 dəfə