Azərbaycanla Mərkəzi Asiya dövlətləri arasında münasibətlər xüsusi xarakter daşıyır

Bakı:

23 °C

78 %

6 m/s

Əlaqə

AZ RU EN

Ana səhifə / YAP xəbərləri / Azərbaycanla Mərkəzi Asiya dövlətləri arasında münasibətlər xüsusi xarakter daşıyır

Azərbaycanla Mərkəzi Asiya dövlətləri arasında münasibətlər xüsusi xarakter daşıyır

18.11.2025 [23:51]

Noyabrın 16-da Özbəkistanın paytaxtı Daşkənddə Mərkəzi Asiya Dövlət Başçılarının 7-ci Məşvərət Görüşü keçirilmişdir. Görüşdə çıxış edən Azərbaycan Respublikasının Prezidenti İlham Əliyev qeyd etmişdir ki, Azərbaycan ilə Mərkəzi Asiya dövlətləri arasında münasibətlər xüsusi xarakter daşıyır. Bizi çoxəsrlik ortaq tarix, mənəvi və mədəni irs, qardaşlıq, dostluq və həmrəylik kimi dəyərlər birləşdirir. Bu əlaqələrin inkişafı nəticəsində münasibətlər artıq strateji tərəfdaşlıq səviyyəsinə yüksəlmişdir.

Azərbaycan ilə Mərkəzi Asiya ölkələri arasında siyasi, iqtisadi, humanitar, enerji və nəqliyyat sahələrində əməkdaşlıq əlaqələri genişlənməkdədir. Prezident İlham Əliyevin Mərkəzi Asiya dövlət başçılarının görüşlərində mütəmadi iştirakı bu əməkdaşlığın inkişafına mühüm töhfə verir. Daşkənddə keçirilmiş 7-ci Məşvərət Görüşü də bu baxımdan tarixi hadisə kimi yadda qalmışdır.

Azərbaycanın artıq Mərkəzi Asiya Dövlət Başçılarının Məşvərət Görüşündə tamhüquqlu iştirakçı statusu qazanması ölkəmizin xarici siyasət prioritetləri, geostrateji mövqeyinin möhkəmlənməsi və region ölkələri ilə əlaqələrin daha da genişlənməsi baxımından mühüm əhəmiyyət daşıyır. Azərbaycanın Qara dənizə tranzit çıxış imkanları və Xəzər hövzəsində strateji yerləşməsi regional əməkdaşlığa əlavə imkanlar yaradır.

Azərbaycan və Mərkəzi Asiya ölkələrini xalqlarımızın çoxəsrlik qardaşlıq telləri bağlayır. Ortaq mədəni köklər dövlətlərarası münasibətlərin möhkəm əsasını təşkil edir. Prezident İlham Əliyevin çıxışında vurğulanan əsas məqamlar ölkələrimiz arasında strateji əməkdaşlığın yüksələn xətt üzrə inkişaf etdiyini bir daha sübut edir.

Dostluq və qardaşlıq prinsiplərinə əsaslanan bu əməkdaşlıq müdafiə və təhlükəsizlik sahəsində qarşılıqlı fəaliyyət, enerji və nəqliyyat layihələrinin reallaşdırılması, investisiya təşəbbüslərinin genişləndirilməsi və beynəlxalq səviyyədə birgə fəaliyyət sayəsində regionda sülh və sabitliyin möhkəmləndirilməsinə töhfə verir. Əminliklə demək olar ki, Azərbaycan ilə Mərkəzi Asiya ölkələri arasında əlaqələrin daha da möhkəmləndirilməsi regional və qlobal miqyasda böyük əhəmiyyət kəsb edəcəkdir.

Azərbaycan regionun 11 ölkəsini və 6 beynəlxalq maliyyə qurumunu birləşdirən, nəqliyyat, ticarət və enerji sahələrini prioritetləşdirən Mərkəzi Asiya Regional İqtisadi Əməkdaşlıq (CAREC) Proqramının üzvüdür. Bununla yanaşı, Azərbaycan təsir dairəsi sürətlə genişlənən Türk Dövlətləri Təşkilatında da mühüm rol oynayır. Ölkəmiz Qafqaz, Xəzər hövzəsi və Mərkəzi Asiyanı birləşdirən strateji körpü funksiyasını uğurla yerinə yetirir.

Azərbaycanın Xəzər dənizi və Cənubi Qafqaz vasitəsilə malik olduğu nəqliyyat infrastrukturu Mərkəzi Asiyanı ənənəvi marşrutlardan kənar olaraq Avropa və Türkiyə ilə birləşdirən alternativ və səmərəli logistik imkanlar təmin edir. Bu baxımdan Daşkənddə keçirilmiş görüş və yeni məsləhətləşmə formatının yaradılması tranzit potensialının gücləndirilməsi, Şərq-Qərb iqtisadi inteqrasiyasının dərinləşdirilməsi və təsir dairələrinin genişləndirilməsi baxımından strateji addım kimi qiymətləndirilir.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 753 dəfə