Strateji əməkdaşlıqda yeni mərhələ

Bakı:

9 °C

87 %

8 m/s

Əlaqə

AZ RU EN

Ana səhifə / YAP xəbərləri / Strateji əməkdaşlıqda yeni mərhələ

Strateji əməkdaşlıqda yeni mərhələ

17.11.2025 [15:57]

Bayram Aslanov,

YAP İdarə Heyətinin üzvü, YAP Gəncə şəhər təşkilatının sədri

Bu gün Avropanın enerji təhlükəsizliyinə ciddi töhfələr verən Azərbaycan Şərqlə Qərb arasında, o cümlədən Mərkəzi Asiya ölkələri üçün mühüm tranzit ölkə və etibarlı tərəfdaşdır. O cümlədən, günü-gündən inkişaf edən Azərbaycanın Mərkəzi Asiya ölkələri ilə əlaqələri əməkdaşlığımızın gələcəkdə daha da möhkəmlənəcəyini göstərir.

Prezident İlham Əliyevin Özbəkistanın Milli İnformasiya Agentliyinə (UzA) verdiyi müsahibəsində qeyd etdiyi kimi, Azərbaycan və Mərkəzi Asiya ölkələri artan strateji əhəmiyyətə malik vahid tarixi, mədəni, coğrafi və geosiyasi məkanı formalaşdırır. İlk baxışda Azərbaycanı Mərkəzi Asiya ölkələrindən fiziki olaraq ayırsa da, Xəzər dənizi, əslində, mühüm birləşdirici amildir. Bu gün Xəzər dənizi, sadəcə, coğrafi anlayış deyil, o, hər şeydən əvvəl xalqlarımızın strateji birliyinin, iqtisadi potensialının və tarixi əməkdaşlığının rəmzidir.

Eyni soy-kökə, tarixə söykənən Azərbaycan Cənubi Qafqazda yerləşsə də Mərkəzi Asiya ölkələri arasındakı əlaqələr bu gün yeni dövrün reallıqlarına uyğun olaraq sürətlə inkişaf etdirilir. Hazırda ölkələrimiz arasında bütün sahələri əhatə edən strateji və çoxşaxəli əməkdaşlıq getdikcə dərinləşir, münasibətlərin gələcək inkişafı üçün möhkəm təmələ çevrilir.

Prezident İlham Əliyevin noyabr ayının 15-də Özbəkistana rəsmi səfəri səfər Mərkəzi Asiya ölkələri arasındakı siyasi, iqtisadi və nəqliyyat-logistika əməkdaşlığının daha da dərinləşdirilməsinə mühüm təkan verib. Səfər zamanı regional platformalarda aparılan görüşlər strateji tərəfdaşlıq xəttinin daha möhkəm əsaslar üzərində qurulduğunu göstərir.

Prezident İlham Əliyevin Özbəkistan səfəri zamanı Mərkəzi Asiya Dövlət Başçılarının Məsləhətləşmə Görüşündə iştirakı ölkəmizin Mərkəzi Asiya regionunda artan siyasi nüfuzunu və fəallığını nümayiş etdirir. Son illərə nəzər salsaq, görərik ki, Mərkəzi Asiya dövlətlərinin başçıları Azərbaycana təxminən 30 səfər ediblər, Prezident cənab İlham Əliyev qardaş ölkələrdə 13 dəfə səfərdə olub. Belə ki, Orta Dəhlizin artan əhəmiyyəti əməkdaşlığımızın genişləndirilməsi üçün əhəmiyyətli imkanlar yaradır. Mərkəzi Asiya Dövlət Başçılarının 7-ci Məşvərət görüşü öz növbəsində, qardaş xalqlar arasında əsrlər boyu davam edən dostluğun möhkəmləndirilməsində, siyasi, iqtisadi, nəqliyyat, investisiya, enerji, mədəni, humanitar və rəqəmsal transformasiya sahələrində çoxsəviyyəli əməkdaşlığın genişləndirilməsində əhəmiyyətli mərhələ olacaq.

Özbəkistan və Azərbaycana gəldikdə isə qısaca deyək ki, bunlar bir-birinə qardaş ölkə və etibarlı müttəfiqdir.İki ölkə arasında imzalanan mühüm sənədlər, Bakıda “Özbəkistan” parkının təməlinin qoyulması, Özbəkistan səfirliyinin yeni binasının açılışı bir daha təsdiq edir ki, dövlətlərarası münasibətlər möhkəm təməl üzərində inkişaf edir.

Məramı, məqsədi regionda sülhün, təhlükəsizliyin, sabitliyin qorunub saxlanması olan Azərbaycanın Mərkəzi Asiyanın aparıcı ölkələrindən olan Özbəkistan ilə gündən-günə daha da möhkəmlənən əməkdaşlığı həm ölkələrimizin və xalqlarımızın, həm də bütün Türk dünyasının inkişafına əhəmiyyətli töhfələr verməkdədir. Şübhəsiz ki, ölkələrimiz arasındakı qarşılıqlı etimada söykənən və əsrlərdir davam edən dostluq və qardaşlıq əlaqələri bundan sonra da inkişaf edəcək, xalqlarımızın rifahının yaxşılaşmasına xidmət göstərəcək

Özbəkistan səfəri qardaş ölkələr arasında münasibətlərin strateji və uzunmüddətli xarakter daşıdığını bir daha sübut etdi.

Paylaş:

Baxılıb: 394 dəfə