Dövlətçilik tariximizin ən parlaq səhifələrindən biri

Bakı:

21 °C

78 %

10 m/s

Əlaqə

AZ RU EN

Ana səhifə / YAP xəbərləri / Dövlətçilik tariximizin ən parlaq səhifələrindən biri

Dövlətçilik tariximizin ən parlaq səhifələrindən biri

12.11.2025 [19:30]

Toğrul Zeynalov

YAP Ağdam rayon təşkilatının əməkdaşı

9 Noyabr – Azərbaycan Respublikasının Dövlət Bayrağı Günü xalqımızın milli oyanışının, müstəqilliyə olan sarsılmaz iradəsinin və dövlətçilik tariximizin ən parlaq səhifələrindən birini əks etdirir. Bu bayram Azərbaycan xalqının öz milli kimliyinə, azadlıq idealına və dövlət suverenliyinə olan dərin məhəbbətinin rəmzidir. Üçrəngli bayrağımız ilk dəfə 1918-ci ildə Azərbaycan Xalq Cümhuriyyəti tərəfindən qəbul edilərək, dövlət müstəqilliyimizin və milli özünüdərkin təməl rəmzlərindən birinə çevrilmişdir. Mavi rəng türk mənşəyimizi, qırmızı rəng müasirlik və inkişaf yolunu, yaşıl rəng isə islam mədəniyyətinə mənəvi bağlılığımızı ifadə edir. Bu rənglərin və ay-ulduzun vəhdəti xalqımızın tarixində və mənəviyyatında dərin iz buraxmış, Azərbaycanı dünyada müstəqil, müasir və güclü dövlət kimi tanıdan mühüm simvola çevrilmişdir.

Azərbaycanın müstəqilliyini bərpa etməsindən sonra üçrəngli bayrağımız yenidən uca zirvəyə qaldırıldı və dövlət atributları sırasında öz layiqli yerini aldı. Xalqımız üçün bu bayraq sadəcə bir parça deyil, yüz illərlə çəkilən əzabların, milli birliyin, azadlıq uğrunda mübarizənin və qələbənin rəmzidir. Cənab Prezident İlham Əliyevin rəhbərliyi ilə Azərbaycan dövləti bu gün dünyanın ən mötəbər tribunalarında öz bayrağını şərəflə dalğalandırır. Prezident İlham Əliyevin ölkəmizin hər bölgəsində, xüsusilə azad edilmiş torpaqlarda dövlət bayrağının qaldırılması istiqamətində gördüyü işlər xalqımızın qəlbində dərin qürur hissi yaradıb.

44 günlük Vətən müharibəsində əldə olunan tarixi Qələbə nəticəsində Cənab Prezidentin rəhbərliyi ilə üçrəngli bayrağımız illərlə həsrətində olduğumuz Şuşada, Xankəndidə, Laçında, Kəlbəcərdə və digər azad edilmiş torpaqlarda ucaldıldı. Prezidentin “Bu gün Azərbaycan bayrağı Qarabağda dalğalanır, bu, bizim tarixi Zəfərimizdir” sözləri hər bir vətəndaşın yaddaşında silinməz iz buraxdı. Bu, təkcə hərbi deyil, həm də mənəvi qələbə idi – çünki bayrağımızın yenidən doğma torpaqlarda dalğalanması xalqımızın ləyaqətinin, birliyinin və dövlətimizin gücünün göstəricisidir.

Dövlət Bayrağı Günü Cənab Prezident İlham Əliyevin təşəbbüsü ilə 2009-cu ildə rəsmi dövlət bayramı kimi təsis edilmişdir. Bu qərar milli dəyərlərimizin qorunması, gənc nəslin vətənpərvərlik ruhunda tərbiyə olunması və dövlət atributlarına hörmətin gücləndirilməsi baxımından mühüm tarixi hadisə oldu. Prezident İlham Əliyev hər çıxışında vurğulayır ki, dövlət bayrağı Azərbaycan xalqının azadlıq, suverenlik və milli qürur simvoludur.

Bu gün ölkəmizin hər bir bölgəsində, dövlət idarələrində, məktəblərdə və beynəlxalq tədbirlərdə üçrəngli bayrağımız dalğalanır. Bayraq təkcə dövlətin deyil, həm də xalqın birliyini, azad ruhunu və gələcəyə inamını təcəssüm etdirir. Dövlət Bayrağı Günü hər bir Azərbaycan vətəndaşına dövlət müstəqilliyimizin əzəmətini xatırladır, milli kimliyimizə, torpaqlarımıza və dövlətçiliyimizə olan sədaqətimizi möhkəmləndirir. Cənab Prezident İlham Əliyevin apardığı uzaqgörən siyasət nəticəsində bu gün Azərbaycan bayrağı dünyanın hər yerində – beynəlxalq təşkilatlarda, idman arenalarında, sülh və əməkdaşlıq meydanlarında qürurla dalğalanır. Bu, həm müstəqil Azərbaycanın qüdrətinin, həm də xalqımızın birliyinin və əzmkarlığının parlaq təcəssümüdür.

Paylaş:

Baxılıb: 735 dəfə