Qardaşlıq, etimad və ortaq məqsədlər Azərbaycan–Qazaxıstan əlaqələrinin əsasını təşkil edir

Bakı:

4 °C

70 %

7 m/s

AZ RU EN

Ana səhifə / YAP xəbərləri / Qardaşlıq, etimad və ortaq məqsədlər Azərbaycan–Qazaxıstan əlaqələrinin əsasını təşkil edir

Qardaşlıq, etimad və ortaq məqsədlər Azərbaycan–Qazaxıstan əlaqələrinin əsasını təşkil edir

24.10.2025 [13:59]

Azərbaycan və Qazaxıstan tarixdən gələn qardaşlıq bağları, ortaq mədəni irs və strateji məqsədlər əsasında münasibətlərini daim inkişaf etdirən iki dost dövlətdir. İki ölkə arasında siyasi dialoqun yüksək səviyyəsi son illərdə dövlət başçılarının intensiv görüşləri ilə daha da möhkəmlənib. Son üç ildə Prezident İlham Əliyevin Qazaxıstana yeddi, Prezident Kasım-Jomart Tokayevin isə Azərbaycana altı dəfə səfəri bu əlaqələrin yalnız rəsmi deyil, həm də dərin etimad üzərində qurulduğunu göstərir.

Prezident İlham Əliyevin 2025-ci ilin oktyabrında Qazaxıstana dövlət səfəri münasibətlərin yeni mərhələyə qədəm qoyduğunu təsdiqlədi. Astanada Azərbaycan-Qazaxıstan Ali Dövlətlərarası Şuranın ikinci iclasının keçirilməsi və mühüm sənədlərin imzalanması siyasi, iqtisadi və təhlükəsizlik müstəvisində əməkdaşlığın genişləndirilməsi niyyətinin real ifadəsidir. İmzalanmış sənədlər strateji tərəfdaşlığın yalnız kağız üzərində deyil, konkret fəaliyyət planları ilə dəstəkləndiyini nümayiş etdirir. Dövlət başçıları mətbuata bəyanatlarında xalqlarımızı birləşdirən qardaşlıq dəyərlərinə xüsusi toxundular. Prezident İlham Əliyevin “Bizim münasibətlərimiz xalqlarımızın təbiətindən gələn bağlılıqdır” fikri Azərbaycanın Qazaxıstanla əlaqələrə verdiyi yüksək qiymətin rəmzidir. Qazaxıstanın da hər zaman ölkəmizə mənəvi dəstək göstərməsi bu qardaşlığın sarsılmaz olduğunu sübut edir. 44 günlük Vətən müharibəsi zamanı Qazaxıstanın beynəlxalq platformalarda Azərbaycanın haqq işinə verdiyi dəstək bunun bariz nümunəsidir.

İqtisadi əlaqələrin genişləndirilməsi səfərdə önəmli gündəm mövzusu oldu. Ticarət dövriyyəsinin yaxın illərdə 1 milyard dollar həddinə çatdırılması hədəfi, enerji və nəqliyyat şəbəkələrinin əlaqələndirilməsi, yeni investisiya layihələri inkişafın əsas istiqamətlərini müəyyənləşdirir. Orta Dəhliz çərçivəsində iki ölkə tranzit-logistika mərkəzi kimi çıxış edir və bu, bütün Avrasiya üçün iqtisadi inteqrasiyanın yeni xəttini yaradır. Zəngəzur dəhlizinin açılması ilə Qazaxıstanın Avropaya çıxışı daha da asanlaşacaq, Azərbaycan isə bölgədə nəqliyyat qovşağı kimi rolunu daha da gücləndirəcək. Səfər zamanı süni intellekt, rəqəmsal iqtisadiyyat və innovasiyalar sahəsində əməkdaşlıq məsələləri də geniş müzakirə edildi. Bu sahədə birgə layihələrin həyata keçirilməsi gələcək nəsillər üçün yeni imkanlar açacaq və tərəfdaşlığın modern texnologiyalar hədəfinə uyğun inkişafını təmin edəcək.

Prezident İlham Əliyev regionda sülhün və təhlükəsizliyin bərqərar olması məsələsinə də diqqət çəkdi. Ermənistanla münasibətlərin normallaşması istiqamətində əldə olunan irəliləyişlər təkcə Azərbaycan üçün deyil, bütövlükdə Cənubi Qafqaz üçün yeni sabitlik modelidir. Dövlət başçısının bəyanatları bir daha göstərdi ki, sülh yalnız silahların susması deyil, iqtisadi inteqrasiya və qarşılıqlı maraqlar üzərindən davamlı əməkdaşlığın qurulmasıdır.

Türk Dövlətləri Təşkilatı çərçivəsində əməkdaşlıq münasibətlərin ideoloji dayaqlarından biridir. Azərbaycan və Qazaxıstan türk dünyasının birliyi və güclənməsi üçün fəal şəkildə birgə fəaliyyət göstərirlər. Bu gün Azərbaycan və Qazaxıstan təkcə strateji tərəfdaş deyil, həm də Avrasiyada yeni geosiyasi nizam yaradan iki güc mərkəzidir. Prezident İlham Əliyevin rəhbərliyi ilə formalaşan siyasət sayəsində Azərbaycan regional sülhün təminatçısı, qlobal iqtisadi layihələrin aparıcı iştirakçısıdır. Qazaxıstanla əlaqələr isə bu mövqenin daha da möhkəmlənməsinə xidmət edir. Azərbaycan–Qazaxıstan münasibətləri təkcə bu günün deyil, gələcəyin də inkişaf xəritəsini müəyyənləşdirir. Tarixi əlaqələrin üzərində yüksələn əməkdaşlıq modeli Türk dünyasının həmrəyliyini gücləndirəcək, Avrasiyanın sabitlik və rifahına əhəmiyyətli töhfələr verəcək.

Namiq Əhmədov

YAP Xəzər rayon təşkilatının sədri

Paylaş:

Baxılıb: 367 dəfə