Azərbaycan–Qazaxıstan münasibətləri yeni mərhələyə yüksəldi

Bakı:

14 °C

67 %

4 m/s

Əlaqə

AZ RU EN

Ana səhifə / YAP xəbərləri / Azərbaycan–Qazaxıstan münasibətləri yeni mərhələyə yüksəldi

Azərbaycan–Qazaxıstan münasibətləri yeni mərhələyə yüksəldi

23.10.2025 [21:19]

Qazaxıstanda səslənən hər kəlmə təkcə diplomatik jest deyildi – bu bəyanat Cənubi Qafqazın gələcəyinə, Türk dünyasının birliyinə və beynəlxalq sabitliyin yeni mərhələsinə yönəlmiş Azərbaycan strateji düşüncəsinin proqram sənədi kimi səsləndi.

Cənab Prezident İlham Əliyevin çıxışı həm siyasi uzaqgörənlik, həm də sülh və tərəfdaşlıq fəlsəfəsi ilə diqqət çəkdi. O, bir daha nümayiş etdirdi ki, Azərbaycanın xarici siyasəti müstəqil qərarların, ədalətli mövqenin və milli maraqların təntənəsidir. Cənab Prezident İlham Əliyevin bəyanatının mərkəzində Azərbaycan–Qazaxıstan dostluğunun illərlə sınaqdan çıxmış və bu gün strateji məna kəsb edən mahiyyəti dayanırdı. O vurğuladı ki, Qazaxıstan bütün beynəlxalq platformalarda Azərbaycanı dəstəkləyib, ədalətin yanında olub. Hər iki dövlət bu gün Avrasiyanın siyasi və iqtisadi sabitliyinin dayaqlarıdır. Onların münasibətləri xalqların mədəni yaxınlığı, ortaq tarixi dəyərləri və qarşılıqlı etimadı üzərində qurulub. Bu birliyin real göstəricisi kimi, son üç ildə keçirilən dövlət başçılarının səfərləri və əldə olunan razılaşmalar qeyd olundu.

Cənab Prezident İlham Əliyev haqlı olaraq bildirdi ki, “Azərbaycan–Qazaxıstan münasibətləri hər görüşdə konkret nəticələrə yönəlir”. Bu, diplomatiyada əməl və nəticə fəlsəfəsinin parlaq nümunəsidir. Bəyanatın ən mühüm hissələrindən biri Azərbaycan və Ermənistan arasında sülh prosesinin uğurla irəliləməsi barədə Prezident İlham Əliyevin verdiyi mesaj idi. Dövlət başçısı xatırlatdı ki, avqustun 8-də Vaşinqtonda Prezident Donald Trampın iştirakı ilə sülh sazişi paraflanıb, bu prosesin beynəlxalq səviyyədə dəstəklənməsi regionda yeni geosiyasi reallıq yaradıb. Azərbaycan Prezidenti xüsusi olaraq Qazaxıstanın bu prosesi dərhal alqışladığını və konstruktiv mövqe sərgilədiyini vurğuladı. Bu, Türk dünyasının sülh diplomatiyasına dəstəyinin bariz nümunəsidir.Ən önəmlisi isə odur ki, Prezident İlham Əliyev praktiki addımların artıq atıldığını bəyan etdi: Azərbaycan Ermənistana yüklərin tranzitinə qoyulan məhdudiyyətləri aradan qaldırıb və ilk dəfə Qazaxıstanın taxıl yükü bu marşrutla Ermənistana daşınıb. Bu fakt sadəcə iqtisadi jest deyil – sülhün praktik başlanğıcı, regionda qarşılıqlı etimadın bərpası deməkdir. Azərbaycanın bu addımı, sözün əsl mənasında, “kağız üzərində deyil, əməldə sülh” prinsipinin təzahürüdür. Beləliklə, Azərbaycan Cənubi Qafqazda sülh modelini real siyasət və inkişafa əsaslanan diplomatik yanaşma ilə qurur. Cənab Prezident İlham Əliyev çıxışında Zəngəzur dəhlizinin reallaşması məsələsinə də xüsusi yer ayırdı. Dövlət başçısı qeyd etdi ki, Azərbaycan ərazisində avtomobil və dəmir yolu hissəsində bütün işlər gələn ilin ortalarınadək tamamlanacaq. Əgər digər ölkələrdə analoji sürətlə addımlar atılsa, dəhliz 2028-ci ilin sonunadək açılacaq. Bu layihə sadəcə regional marşrut deyil, Asiyadan Avropaya strateji enerji və ticarət arteriyası rolunu oynayacaq. Cənab Prezident İlham Əliyevin ifadəsi ilə desək, bu, həm Orta Dəhlizin davamı, həm də TRIPP (Trump Route for International Peace and Prosperity) layihəsinin mühüm tərkib hissəsidir. Yeni Zəngəzur xətti vasitəsilə 15 milyon ton yük dövriyyəsi planlaşdırılır. Bu, Azərbaycanı beynəlxalq logistik mərkəzə çevirəcək və ölkənin tranzit gəlirlərini əhəmiyyətli dərəcədə artıracaq. Ən vacibi, bu layihə regionda sülhün və əməkdaşlığın davamlı təminatına xidmət edir. Yəni Zəngəzur dəhlizi iqtisadi körpü olmaqla yanaşı, siyasi etimad körpüsüdür. Cənab Prezident İlham Əliyevin bəyanatı Türk Dövlətləri Təşkilatının gələcək inkişaf strategiyasına da mühüm istiqamətlər verdi. Azərbaycan və Qazaxıstan bu gün Türk coğrafiyasını vahid iqtisadi, mədəni və nəqliyyat məkanına çevirmə prosesində lider dövlətlər kimi çıxış edir. Gələn il Azərbaycan iki mühüm beynəlxalq tədbirə ev sahibliyi edəcək. İslam Əməkdaşlıq Təşkilatının Sammiti, Asiyada Qarşılıqlı Fəaliyyət və Etimad Tədbirləri Müşavirəsinin Sammiti. Bu tədbirlərdə Türk dövlətlərinin vahid mövqedən çıxış etməsi, Prezident İlham Əliyevin dediyi kimi, artıq “Azərbaycan və Qazaxıstanın beynəlxalq platformalarda eyni dəyərləri təmsil etməsinin təbii nəticəsidir.” Azərbaycan bu gün Türk dünyasının siyasi mərkəzi kimi çıxış edir – həm coğrafi mövqeyinə, həm diplomatik fəallığına, həm də iqtisadi imkanlarına görə. Cənab Prezident İlham Əliyev çıxışında Qarabağın bərpası kontekstində Qazaxıstanın göstərdiyi humanitar dəstəyi xüsusi qeyd etdi.Füzulidə açılan Kurmanqazı adına Uşaq Yaradıcılıq Mərkəzi bu dəstəyin rəmzidir – təkcə təhsil və mədəniyyət ocağı deyil, qardaşlığın canlı simvoludur. Bu, həm də “Böyük Qayıdış” strategiyasının mənəvi dayaqlarından biridir. Qazax xalqının bu nəcib jesti Azərbaycan cəmiyyətində dərin minnətdarlıqla qarşılanır və Türk həmrəyliyinin insani ölçüsünü nümayiş etdirir. Cənab Prezident İlham Əliyevin bəyanatı göstərdi ki, Azərbaycan artıq yalnız regional deyil, qlobal siyasətin aparıcı oyunçusudur.Enerji təhlükəsizliyi, nəqliyyat dəhlizləri, rəqəmsal inteqrasiya və sülh təşəbbüsləri Azərbaycanın beynəlxalq nüfuzunu daha da möhkəmləndirib. Cənab Prezident İlham Əliyevin dediyi kimi, “Azərbaycan artıq hadisələrin ardınca getmir – hadisələri formalaşdırır.” Qazaxıstanda səsləndirilən bəyanat Azərbaycan dövlət siyasətinin liderlik fəlsəfəsini bir daha ortaya qoydu. Bu, həm sülhün, həm inteqrasiyanın, həm də iqtisadi yüksəlişin proqramıdır.

Cənab Prezident İlham Əliyevin Qazaxıstanda səsləndirdiyi fikirlər beynəlxalq siyasətin yeni mərhələsinə Azərbaycan möhürüdür.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 463 dəfə