Prezident İlham Əliyevin "Kazinform"a müsahibəsində əsas məqamlar

Bakı:

12 °C

87 %

4 m/s

Əlaqə

AZ RU EN

Ana səhifə / YAP xəbərləri / Prezident İlham Əliyevin "Kazinform"a müsahibəsində əsas məqamlar

Prezident İlham Əliyevin "Kazinform"a müsahibəsində əsas məqamlar

22.10.2025 [12:26]

2025-ci il oktyabrın 18-də Azərbaycan Respublikasının Prezidenti İlham Əliyev Qazaxıstanın rəsmi informasiya agentliyi olan “Kazinform”a geniş müsahibə verib. Dövlət başçısı müsahibə zamanı Azərbaycan–Qazaxıstan münasibətlərinin siyasi, iqtisadi və humanitar aspektlərinə toxunub, eyni zamanda regional əməkdaşlıq və çağırışlarla bağlı fikirlərini bölüşüb.

Prezident İlham Əliyev bildirib ki, Azərbaycan ilə Qazaxıstan arasında münasibətlər yüksək səviyyədədir və strateji tərəfdaşlıq prinsiplərinə əsaslanır. O, iki ölkə arasında mövcud olan siyasi etimadın, tarixi və mədəni yaxınlığın qarşılıqlı əlaqələrin möhkəmlənməsində əsas rol oynadığını vurğulayıb. Azərbaycanın Qazaxıstanla bütün sahələrdə əməkdaşlığı genişləndirməkdə maraqlı olduğunu bildirən Prezident, qarşılıqlı səfərlərin intensivliyini də əlaqələrin səmərəli inkişafının göstəricisi kimi dəyərləndirib.

Müsahibə zamanı Prezident Əliyev iqtisadi münasibətlərə xüsusi diqqət ayırıb. O qeyd edib ki, hazırda Azərbaycanın Qazaxıstan iqtisadiyyatına yatırdığı investisiyaların həcmi 225 milyon ABŞ dollarını keçib. Eyni zamanda Qazaxıstanın da Azərbaycandakı sərmayələri 136 milyon dollara çatıb. İki ölkə arasında ticarət dövriyyəsində də nəzərəçarpacaq artım müşahidə olunur: 2024-cü ildə bu rəqəm 470 milyon dollar olduğu halda, 2025-ci ilin ilk səkkiz ayında artıq 547 milyon dolları ötüb.

Prezident İlham Əliyev Orta Dəhliz layihəsinin iki ölkə arasında nəqliyyat-logistika əməkdaşlığında mühüm yer tutduğunu bildirib. Azərbaycanın bu dəhliz çərçivəsində həyata keçirdiyi infrastruktur layihələri, tranzit imkanlarının genişləndirilməsi və yeni logistik marşrutların yaradılması istiqamətində atdığı addımlar, Qazaxıstanla əməkdaşlığı daha da dərinləşdirir.

Humanitar sahədə əməkdaşlıq da diqqət mərkəzində olub. Prezident bildirib ki, Azərbaycan və Qazaxıstan xalqları arasında mədəni yaxınlıq və ortaq dəyərlər əsasında formalaşan münasibətlər, təhsil, mədəniyyət və elmi sahələrdə birgə layihələr vasitəsilə daha da möhkəmləndirilir. Son illər ərzində qarşılıqlı mədəniyyət günləri, ortaq tədbirlər və sərgilər bu sahədə fəallığın artdığını göstərir.

Dövlət başçısı Xəzər dənizinin ekoloji vəziyyəti ilə bağlı da narahatlığını ifadə edib. O, Xəzərin səviyyəsinin azalmasının ciddi fəsadlar törədə biləcəyini qeyd edərək, bu problemin yalnız regional deyil, qlobal səviyyədə diqqət mərkəzində saxlanılmalı olduğunu vurğulayıb. Prezident ölkələrin birgə elmi tədqiqatlar aparmasının və müvafiq tədbirlər görməsinin vacibliyini önə çəkib.

Müsahibə zamanı Türk Dövlətləri Təşkilatı çərçivəsində əməkdaşlıq məsələlərinə də toxunulub. Prezident İlham Əliyev qeyd edib ki, Azərbaycan və Qazaxıstan bu təşkilatın fəal üzvləri kimi türk dünyasında inteqrasiyanın dərinləşməsində mühüm rol oynayırlar.

Müsahibədə səsləndirilən fikirlər iki ölkə arasında strateji tərəfdaşlığın daha da möhkəmləndirilməsinə xidmət etməklə yanaşı, regional sabitlik və inkişaf üçün də önəmli mesajlar verir.

Elşən Səfərov

YAP Ağcabədi rayon təşkilatının məsləhətçisi

Paylaş:

Baxılıb: 377 dəfə