Azərbaycan–İtaliya strateji tərəfdaşlığı dostluqdan güc alan əməkdaşlıqdır

Bakı:

27 °C

50 %

2 m/s

Əlaqə

AZ RU EN

Ana səhifə / YAP xəbərləri / Azərbaycan–İtaliya strateji tərəfdaşlığı dostluqdan güc alan əməkdaşlıqdır

Azərbaycan–İtaliya strateji tərəfdaşlığı dostluqdan güc alan əməkdaşlıqdır

06.10.2025 [19:26]

Azərbaycanın müasir tarixində hər bir yüksək səviyyəli səfər yeni əməkdaşlıq səhifəsi açır. İtaliya Prezidentinin Bakıya dövlət səfəri də məhz bu baxımdan xüsusi əhəmiyyət daşıyır. Bu səfər təkcə iki ölkə arasında mövcud münasibətləri daha da dərinləşdirməklə kifayətlənmir, həm də Avropa ilə Qafqaz arasında körpü rolunu möhkəmləndirir. Cənab Prezident İlham Əliyevin bəyanatı isə bir daha təsdiq etdi ki, Azərbaycan–İtaliya əlaqələri sarsılmaz etimada, qarşılıqlı maraqlara və strateji vizyona əsaslanır. Azərbaycan və İtaliya arasında əməkdaşlığın ən mühüm sütunlarından biri enerji sahəsidir. Cənub Qaz Dəhlizi və onun Avropaya çıxışı olan TAP boru kəməri, əslində, təkcə iqtisadi layihə deyil, həm də qlobal enerji təhlükəsizliyinin təminatıdır. Cənab Prezident İlham Əliyev bu əməkdaşlığı yüksək qiymətləndirərək bildirdi:

“İtaliya Azərbaycanın Avropada əsas tərəfdaşlarından biridir. Enerji sahəsindəki əməkdaşlığımız Avropanın enerji xəritəsini dəyişib və sabitliyə mühüm töhfə verir.” Bu tərəfdaşlıq artıq yeni mərhələyə qədəm qoyur. Azərbaycanın bərpa olunan enerji potensialı və Avropanın yaşıl keçid siyasəti İtaliya ilə birgə daha böyük layihələr üçün zəmin yaradır. Bu, həm iqtisadi maraqlara xidmət edir, həm də qlobal ekoloji çağırışlara cavab verir. Azərbaycan iqtisadiyyatının şaxələndirilməsi siyasəti və həyata keçirilən islahatlar İtaliya şirkətləri üçün yeni imkanlar açır. İnfrastruktur, kənd təsərrüfatı, texnologiya və sənaye sahələrində əməkdaşlıq perspektivləri sürətlə genişlənir. Cənab Prezident İlham Əliyevin sözləri ilə desək: “Azərbaycan və İtaliya əlaqələri enerji ilə məhdudlaşmır. İqtisadiyyatın bütün sahələrində geniş əməkdaşlıq imkanlarımız var.” Azərbaycan bazarı İtaliya investisiyaları üçün əlverişli mühitdir, İtaliya isə öz növbəsində, Azərbaycanın Avropa ilə iqtisadi əlaqələrini möhkəmləndirən etibarlı tərəfdaşdır.
Azərbaycan–İtaliya münasibətləri yalnız iqtisadi və enerji müstəvisində deyil, həm də siyasi sabitlik və diplomatik etimad üzərində qurulub. İki ölkə arasında siyasi dialoq qarşılıqlı hörmətə əsaslanır, beynəlxalq təşkilatlar çərçivəsində əməkdaşlıq isə ortaq mövqeləri gücləndirir. Bundan başqa, xalqlar arasında mədəni yaxınlıq da bu tərəfdaşlığın təməl daşlarındandır. İtaliya mədəniyyəti Azərbaycanda böyük maraqla qarşılanır, Azərbaycan incəsənəti isə İtaliyada tanıdılır. Bu mədəni körpülər siyasi və iqtisadi əməkdaşlığı daha da möhkəmləndirir. İtaliya Prezidentinin Bakıya səfəri yalnız rəsmi protokol hadisəsi deyil, iki ölkə arasında etimadın, dostluğun və strateji tərəfdaşlığın güclənməsi baxımından tarixi bir mərhələdir.

Cənab Prezident İlham Əliyevin dediyi kimi: “Azərbaycan–İtaliya münasibətləri strateji tərəfdaşlıq səviyyəsinə çatıb və biz birlikdə gələcəyə addımlayırıq.” Bu səfər göstərdi ki, Azərbaycan və İtaliya yalnız bu günü deyil, sabahı da düşünən tərəfdaşlardır. Onların əməkdaşlığı Avropanın enerji təhlükəsizliyinə, iqtisadi inkişafına, beynəlxalq sabitliyə və xalqların rifahına xidmət edir. Azərbaycan və İtaliya dostluğun sınaqlardan keçmiş dayaqları üzərində qurulmuş, gələcəyə ümidlə baxan iki strateji tərəfdaşdr. Azərbaycan və İtaliya əlaqələri bu gün yalnız diplomatik sənədlərdə deyil, tarixdə və gələcəyin yol xəritəsində də öz təsdiqini tapır. Bu münasibətlər dostluğun səmimiyyətindən, strateji tərəfdaşlığın gücündən doğur. İki ölkə arasında qurulan əməkdaşlıq qlobal çağırışlara cavab verən nümunədir – enerji təhlükəsizliyindən tutmuş elmə, təhsilə, mədəniyyətə qədər. Cənab Prezident İlham Əliyevin bəyan etdiyi kimi: “Əgər qarşılıqlı inam və səmimi münasibətlər olmasaydı, bu qədər nəhəng layihələrin icrası mümkün olmazdı.” Bu gün Bakı ilə Roma arasındakı münasibətlər sadəcə iqtisadi maraqların diktəsi deyil, xalqlarımızın ortaq iradəsi və gələcək nəsillərə miras qalacaq bir dostluq nümunəsidir. Azərbaycan–İtaliya tərəfdaşlığı həm də təkcə iki ölkənin deyil, bütövlükdə Avropanın və regionun sabitliyi, inkişafı üçün güc mənbəyinə çevrilib. Və bu güc bizi daha böyük üfüqlərə aparır. Bu səfərin və bəyanatların verdiyi əsas mesaj is birdir: Azərbaycan və İtaliya birlikdə gələcəyə doğru addımlayır. Təbii ki, bu addımlar bizi davamlı inkişaf yoluna, sarsılmaz dostluq və strateji əməkdaşlığın yeni mərhələsinə aparacaq.

David İbramxəlilov,
YAP Qusar rayon təşkilatının sədri

Paylaş:

Baxılıb: 682 dəfə