19-20 Sentyabr 2023-cü il Antiterror Əməliyyatı və onun tarixi əhəmiyyəti

Bakı:

12 °C

94 %

3 m/s

Əlaqə

AZ RU EN

Ana səhifə / YAP xəbərləri / 19-20 Sentyabr 2023-cü il Antiterror Əməliyyatı və onun tarixi əhəmiyyəti

19-20 Sentyabr 2023-cü il Antiterror Əməliyyatı və onun tarixi əhəmiyyəti

19.09.2025 [15:02]

Azərbaycan Respublikasının ərazi bütövlüyü və suverenliyinin tam bərpası istiqamətində mühüm mərhələ olan 2023-cü il sentyabrın 19-20-də keçirilmiş lokal antiterror tədbirləri, xalqımızın tarixində yeni bir şanlı Zəfər səhifəsi kimi əbədi yer aldı.

2023-cü il sentyabrın 19-da Azərbaycanın Qarabağ iqtisadi rayonunda Ermənistan silahlı birləşmələrinin qalıqları tərəfindən törədilmiş genişmiqyaslı təxribatların qarşısını almaq, həmin qanunsuz silahlı dəstələri tərksilah etmək və Azərbaycan Respublikasının konstitusiya quruluşunu bərpa etmək məqsədilə lokal xarakterli antiterror tədbirlərinə başlanıldı. Cəmi 23 saat davam edən bu yüksək peşəkarlıqla icra olunan əməliyyat nəticəsində Azərbaycan Ordusu qarşısına qoyulmuş bütün tapşırıqları uğurla yerinə yetirdi.

Bu əməliyyatın nəticəsi olaraq, Azərbaycan Respublikasının suverenliyi tam şəkildə bərpa olundu və ölkəmizin bayrağı Qarabağın hər bir guşəsində əzəmətlə dalğalanmağa başladı. Bu tarixi Qələbənin əlaməti olaraq Prezident İlham Əliyev 2024-cü il sentyabrın 19-da imzaladığı sərəncamla 20 Sentyabr – Dövlət Suverenliyi Günü elan edildi.

Azərbaycan tərəfi illər boyu dialoq və inteqrasiya imkanlarını təklif etsə də, Qarabağda yaşayan erməni icmasının nümayəndələri bu təklifləri davamlı şəkildə rədd edirdi. Lakin sentyabrın 19-da başlayan və 20-də başa çatan antiterror tədbirlərindən sonra onlar Azərbaycanın Yevlax şəhərində rəsmi görüşə gəlməyə məcbur oldular. Bu, onların vəziyyətin reallıqlarını qəbul etməsi və Azərbaycanın ərazi bütövlüyünü tanımağa məcbur qalmasının bariz nümunəsi idi.

Nəhayət, sentyabrın 28-də Qarabağdakı qondarma separatçı rejimin rəhbəri Samvel Şahramanyan qanunsuz "rejimin ləğvi" ilə bağlı sənəd imzaladı. Bu sənəd, Azərbaycan torpaqlarında illərlə davam edən qanunsuz separatçılığın rəsmi sonu demək idi.

Tarixi Zəfərin davamı olaraq, 2023-cü il oktyabrın 15-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev Xankəndi, Xocalı, Xocavənd və Ağdərə şəhərlərinə səfər edərək, bu şəhərlərdə Azərbaycan Respublikasının Dövlət Bayrağını ucaltdı. Bu addım, dövlət suverenliyimizin real şəkildə təmin olunduğunun və bu torpaqlarda artıq yalnız bir dövlətin – Azərbaycanın – hökmranlığının olduğunu rəmzi şəkildə nümayiş etdirdi.

19-20 sentyabr 2023-cü il tarixli antiterror əməliyyatı yalnız hərbi deyil, həm də siyasi və milli əhəmiyyət daşıyan tarixi bir dönüş nöqtəsi oldu. Azərbaycan, hüquqi və beynəlxalq norma çərçivəsində öz torpaqlarında suverenliyini bərpa etdi, separatçılığa son qoydu və ölkə daxilində tam dövlət nəzarətini təmin etdi. Bu Qələbə, yalnız bu günün deyil, gələcək nəsillərin də qürur duyacağı şanlı tariximizin bir parçasıdır.

Kənan Quliyev,

YAP Laçın rayon təşkilatının məsləhətçisi

Paylaş:

Baxılıb: 420 dəfə