Tarixi zirvənin mesajları və regional əməkdaşlıqdan qlobal siyasi yönlərə

Bakı:

15 °C

77 %

6 m/s

Əlaqə

AZ RU EN

Ana səhifə / YAP xəbərləri / Tarixi zirvənin mesajları və regional əməkdaşlıqdan qlobal siyasi yönlərə

Tarixi zirvənin mesajları və regional əməkdaşlıqdan qlobal siyasi yönlərə

28.08.2025 [12:04]

Avqustun 22-də Türkmənistanın Türkmənbaşı şəhərində keçirilən Türkmənistan, Azərbaycan və Özbəkistan dövlət başçılarının sammiti regionun siyasi gələcəyində mühüm dönüş nöqtəsi oldu. Azərbaycan Prezidenti İlham Əliyevin bəyanatı bu zirvənin siyasi məzmununu dəqiq ifadə etdi: üç dövlətin əməkdaşlığı artıq tarixi qardaşlıq ənənələrinin davamı olmaqla yanaşı, real siyasi və iqtisadi nəticələr doğuran strateji platformaya çevrilir. Cənab Prezident İlham Əliyevin sözləri ilə, Avazadakı inkişaf prosesləri göstərir ki, ölkə sabit idarəçilik modelinə malikdir. Bu, həm regional sabitliyin təminatı, həm də çoxtərəfli əməkdaşlıq üçün etibarlı zəmin deməkdir. Arxadağ–Füzuli qardaşlaşması sənədi isə tarixi bağların müasir siyasi formasıdır.

Azərbaycan və Türkmənistanın siyasi xəttinin yaxınlığı regionun strateji gələcəyini müəyyənləşdirən amillərdən biridir. Burada söhbət yalnız ikitərəfli münasibətlərdən yox, həm də çoxtərəfli əməkdaşlıq formatlarının möhkəmlənməsindən gedir. Türkmənistanın Füzulidə məscid inşa etməsi dini və mənəvi həmrəyliyin rəmzi olmaqla yanaşı, siyasi dəstəyin də açıq ifadəsidir. Xankəndidə fəaliyyət göstərən tikiş fabriki və Füzulidə açılmış Mirzə Uluqbəy adına məktəb, İlham Əliyevin vurğuladığı kimi, Qarabağın dirçəlişində qardaş dəstəyinin simvoludur. Azərbaycan–Özbəkistan münasibətləri təkcə bəyanatlar yox, konkret layihələrlə möhkəmlənir. Bu, strateji əməkdaşlıq modelinin dayanıqlı təməlidir. Avaza Zirvəsi ilə nəqliyyat, enerji, logistika və mədəniyyət sahələrində üçtərəfli əməkdaşlıq mexanizmi işə salınır. Prezident İlham Əliyevin dediyi kimi, bu, “tarixi gündür” və bölgədə yeni geosiyasi reallıq formalaşır. Zirvə görüşü Türk coğrafiyasında siyasi həmrəyliyin gücləndiyini, qardaşlıq üzərində qurulmuş əməkdaşlığın isə strateji dəyərə çevrildiyini göstərdi. Cənab Prezident İlham Əliyevin bəyanatı həmin prosesin konturlarını cızdı: sabitlik, birlik, əməli qardaşlıq və tərəfdaşlıq. Onu da deyim ki, Avaza Zirvəsi qardaşlıqdan qlobal gücə doğru işıqlı bir yoldur. Türkmənistanın Türkmənbaşı şəhəri bu dəfə diplomatiyanın deyil, tarix yazan birliyin şahidi oldu. Avaza Zirvəsi – Türkmənistan, Azərbaycan və Özbəkistanın qardaşlıq möhürü idi. Cənab Prezident İlham Əliyevin sözləri bu tarixi günün mahiyyətini açıq göstərdi: əsrlərin qardaşlığı artıq dövlətlərin strateji gücünə çevrilir. Arxadağ və Füzuli qardaşlaşması isə kağız üzərində deyil, xalqların yaddaşında həkk olunan bir hadisədir. Türkmən və Azərbaycan xalqları əsrlər boyu qardaş kimi yaşayıblar, indi isə dövlət kimi eyni yolda addımlayırlar. Bakı və Aşqabadın mövqelərinin üst-üstə düşməsi sadəcə siyasi yaxınlıq deyil, ortaq gələcəyin təməlidir. “Çiyin-çiyinə irəliyə gedəcəyik”, – deyən Prezident İlham Əliyev əslində bölgəyə siyasi sabitlik mesajı göndərdi. Qarabağın göylərində yüksələcək bu məbəd isə yalnız daş divar olmayacaq, qardaşlıq abidəsi olacaq. Hər minarəsi türkmən-azərbaycan dostluğunu xatırladacaq. Bir daha nəzərə çatdırım ki, Xankəndidə qadınlara iş yeri açan tikiş fabriki, Füzulidə yüzlərlə şagirdin oxuduğu Mirzə Uluqbəy məktəbi – bunlar sadəcə layihə deyil, Qarabağın taleyinə yazılan qardaşlıq dastanıdır. Cənab Prezident İlham Əliyevin dediyi kimi, ən çətin məqamlarda yanımızda dayanan qardaşlarımız olub. Bu, siyasətin deyil, həqiqətin səsidir.

“Bizim bölgəmizdə yeni, çox perspektivli əməkdaşlıq formatı yaradılır.” Əslində bu cümlə yalnız bir bəyanat deyil, gələcəyin yol xəritəsidir. Avaza Zirvəsi ilə Türk dünyası yeni bir güc mərkəzinə çevrilir. Avaza Zirvəsi tarixə qardaşlıqla yazıldı. Bu gün imzalanan sənədlər sabah Türk coğrafiyasını gücləndirəcək. Hər layihə, hər təşəbbüs bir gerçəyi təsdiq edir: biz sözdə yox, əməldə qardaşıq – və bu qardaşlıq bizi gələcəyə aparacaq.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 273 dəfə