Bu gün dünyada 50 milyondan çox insan üçün Azərbaycan dili ana dilidir

Bakı:

21 °C

83 %

0 m/s

Əlaqə

AZ RU EN

Ana səhifə / YAP xəbərləri / Bu gün dünyada 50 milyondan çox insan üçün Azərbaycan dili ana dilidir

Bu gün dünyada 50 milyondan çox insan üçün Azərbaycan dili ana dilidir

31.07.2025 [20:54]

Mansur Quliyev,

YAP Ağdam rayon təşkilatının sədri

“Bu gün dünyada 50 milyondan çox insan üçün Azərbaycan dili ana dilidir” – Azərbaycan Respublikasının Prezidenti cənab İlham Əliyevin bu fikri təkcə statistikanı deyil, dilin arxasında dayanan böyük tarixi, mədəni və milli mənəvi yükü ifadə edir. Azərbaycan dili bu gün təkcə Azərbaycanın dövlət dili deyil, eyni zamanda, dünyanın müxtəlif qitələrində yaşayan milyonlarla soydaşımızın qürurla danışdığı, düşündüyü və öz kimliyini qoruduğu müqəddəs dildir.

Azərbaycan dili bizim varlığımızın, mənəviyyatımızın, milli birlik və həmrəyliyimizin əsas dayaqlarından biridir. Bu dilin səsi minilliklərin dərinliyindən gəlir, xalqımızın zəngin tarixini, ədəbiyyatını, irsini və mədəniyyətini özündə yaşadır. Bu dil Nizami Gəncəvinin, Füzulinin, Molla Pənah Vaqifin, Mirzə Fətəli Axundzadənin və Üzeyir Hacıbəylinin yaradıcılığında ölümsüzləşib. Ana dilimiz həm də bugünkü müstəqil Azərbaycanın səsidir – vətəndaşlarımızın gündəlik həyatında, elm və təhsildə, diplomatiyada, mədəniyyət və informasiya məkanında qürurla səslənən bir dildir.

Məhz ümummilli lider Heydər Əliyevin uzaqgörən siyasəti nəticəsində Azərbaycan dili ötən əsrin sonlarında özünün əsl dövlətçilik statusunu qazandı. 1978-ci il Konstitusiyasında Azərbaycan dilinin rəsmi status alması və müstəqillik dövründə bu statusun daha da möhkəmləndirilməsi Heydər Əliyevin dil siyasətinin real nəticələridir. Onun “Hər bir azərbaycanlı öz ana dilini qorumalı, ona hörmət etməli və gələcək nəsillərə çatdırmalıdır” fikri bu gün də dəyərini və aktuallığını qoruyur.

Cənab Prezident İlham Əliyevin liderliyi ilə aparılan dövlət dil siyasəti bu strateji xəttin davamıdır. Azərbaycan dili bu gün nəinki ölkə daxilində, həm də diaspor təşkilatlarımızın fəaliyyəti vasitəsilə beynəlxalq miqyasda təbliğ olunur. Xaricdə fəaliyyət göstərən Azərbaycan məktəblərində dilimiz öyrədilir, mədəniyyət mərkəzlərimizdə Azərbaycan dilinin kursları təşkil olunur, milli mətbuat vasitəsilə Azərbaycan dili yaşadılır və inkişaf etdirilir.

50 milyondan çox azərbaycanlının eyni dilin bayrağı altında birləşməsi milli birliyin, mədəni bütövlüyün və ortaq dəyərlərin təntənəsidir. Bu, həm də dünya azərbaycanlılarının informasiya cəbhəsində vahid mövqedən çıxış etməsi, tarixi həqiqətlərimizi dünyaya öz dilimizdə çatdırmaq imkanı deməkdir. Prezident İlham Əliyevin bu fikri hər birimizin məsuliyyətini artırır: biz bu dili qorumağa, onu sevməyə və gələcək nəsillərə daha da zənginləşmiş şəkildə ötürməyə borcluyuq.

Nəticə etibarilə, Azərbaycan dili artıq təkcə coğrafi sərhədlərlə məhdudlaşmır. O, qlobal miqyasda bir mədəniyyət daşıyıcısı, bir kimlik göstəricisi, həm də qürur mənbəyidir. Bu dilin əhatə dairəsi nə qədər genişlənirsə, Azərbaycan xalqının səsi və mövqeyi də bir o qədər güclü eşidilir.

Gəlin bu dili qoruyub yaşadaq – çünki Azərbaycan dili bizim millət olaraq sonsuz varlığımızın təməlidir.

Paylaş:

Baxılıb: 577 dəfə