Azərbaycan Ordusunun gücü Qarabağda azad həyatın zəmanətidir

Bakı:

22 °C

65 %

9 m/s

Əlaqə

AZ RU EN

Ana səhifə / YAP xəbərləri / Azərbaycan Ordusunun gücü Qarabağda azad həyatın zəmanətidir

Azərbaycan Ordusunun gücü Qarabağda azad həyatın zəmanətidir

24.06.2025 [20:13]

Azərbaycan tarixində elə günlər var ki, o günlər təkcə təqvimdə yox, xalqın qəlbində yazılıb. 26 İyun – Silahlı Qüvvələr Günü də məhz belə bir gündür – ordumuzun gücünün, xalqımızın iradəsinin, dövlətimizin müstəqillik uğrunda göstərdiyi qətiyyətin simvoludur. Bu tarix bizə 1918-ci ili – Azərbaycan Xalq Cümhuriyyətinin milli ordu yaratmaq barədə verdiyi tarixi qərarı xatırladır. Müstəqilliyini yenicə elan etmiş cümhuriyyətin ilk addımlarından biri ordu quruculuğu oldu. Çünki dövlət qurmaq olar, amma onu qorumaq üçün güclü orduya sahib olmaq vacibdir. O gün yaradılan ordu hissələri zamanla bir dövlətin özünü qoruma instinktinin rəmzinə çevrildi. Amma tarix hər zaman xalqımız üçün asan olmadı. 1920-ci ildə sovet işğalı bu ordu prosesini yarımçıq qoydu. Lakin azadlıq ideyası yaddaşımızdan heç vaxt silinmədi. 1991-ci ildə müstəqillik yenidən qazanıldıqda Azərbaycan dövləti öz milli ordusunu bərpa etməyə başladı. Qarşıda bizi ağır sınaqlar gözləyirdi. Ermənistanın işğalçı siyasəti, torpaqlarımızın 20 faizinin itirilməsi, daxildəki siyasi xaos və qeyri-sabitlik – bütün bunlar ordunun tam formalaşmasına ciddi əngəllər yaratdı. Və tarix bir daha dönüm nöqtəsi yaşadı. 1993-cü ildə xalqın tələbi ilə hakimiyyətə qayıdan Ümummilli lider Heydər Əliyev, dövlətin sütunu olan ordunu gücləndirməyi prioritet etdi. Peşəkar ordu quruculuğu başladı, hərbi sənaye formalaşdı, beynəlxalq əməkdaşlıqlar quruldu. Elə bu mərhələnin məntiqi davamı olaraq 1998-ci ildə 26 İyun – Silahlı Qüvvələr Günü rəsmi bayram kimi təsis edildi. Bu gün həmin siyasətin davamı və ən ali nəticələri göz önündədir. 2020-ci ilin 27 sentyabrında başlayan Vətən müharibəsi, Azərbaycan Ordusunun tarixdəki yerini tamamilə yenidən müəyyənləşdirdi. 44 gün ərzində döyüş meydanlarında göstərilən rəşadət, azad edilən hər kənd, hər şəhər, hər zirvə bizim gücümüzün, birliyimizin, iradəmizin sübutuna çevrildi. Şuşanın azadlığı isə bu salnamənin zirvəsi oldu. Prezident, Müzəffər Ali Baş Komandan İlham Əliyevin 8 Noyabr müraciəti bu zəfəri təkcə elan etmədi – onu tarixləşdirdi. Lakin mübarizə bununla bitmədi. 2023-cü ilin sentyabrında keçirilən lokal antiterror tədbirləri ilə Qarabağdakı separatçı silahlı birləşmələr tərksilah olundu, Xankəndi, Xocalı və digər ərazilərdə Azərbaycanın suverenliyi tam bərpa edildi. Bu, yalnız hərbi qələbə deyildi – bu, hüququn, dövlətçiliyin, milli birliyin qələbəsi idi. Bu gün Azərbaycan Ordusu təkcə regionda deyil, beynəlxalq müstəvidə də nüfuzlu və güclü silahlı qüvvələrdən biri kimi tanınır. Məhz bu ordu sayəsində bu gün Qarabağda Azərbaycan vətəndaşları azad, təhlükəsiz və suveren dövlətin himayəsi altında yaşayırlar. Bir zamanlar işğal altında qalan, viran qoyulmuş şəhər və kəndlərdə indi yenidən həyat qayıdır, uşaq səsləri gəlir, bayraqlar dalğalanır. Azərbaycan əsgərinin yaratdığı sabitlik və sülh mühiti bu bölgənin gələcəyini ümidlərlə doldurur. Artıq Qarabağda qorxu yox, güvən var; qeyri-müəyyənlik yox, dövlət var; sülh var, əmin-amanlıq var. Bəli, 26 İyun bizim gücümüzü xatırladan gündür. Bu gün bizi həm tarixlə bağlayır, həm gələcəyə inam verir. Ordumuzla fəxr edirik. Qazandığımız zəfərlə qürur duyuruq. Qarabağda azad, sülh içində yaşayan xalqımız – bu Zəfərin ən böyük rəmzidir.

Gəray Zeynallı,

YAP Laçın rayon təşkilatının fəal üzvü

Paylaş:

Baxılıb: 380 dəfə