Qardaşlığın və gələcəyə inamın manifesti

Bakı:

15 °C

88 %

0 m/s

Əlaqə

AZ RU EN

Ana səhifə / YAP xəbərləri / Qardaşlığın və gələcəyə inamın manifesti

Qardaşlığın və gələcəyə inamın manifesti

04.06.2025 [21:38]

2025-ci il mayın 28-də Laçın şəhəri unudulmaz və simvolik bir hadisəyə ev sahibliyi etdi. Azərbaycan Prezidenti İlham Əliyevin təşəbbüsü ilə baş tutan Üçlü Zirvə görüşündə Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərif də iştirak etdilər. Bu mühüm görüş, yalnız diplomatik bir toplantı olmaqla kifayətlənməyib, həm də üç qardaş ölkə arasında dərin tarixi bağların, ortaq dəyərlərin və qarşılıqlı etimadın bir daha təsdiqi oldu. Prezident İlham Əliyevin Zirvədəki açılış çıxışı səmimi tonu, emosional məqamları və strateji baxışları ilə xüsusi diqqət çəkdi. Onun nitqində əsas vurğu Azərbaycan, Türkiyə və Pakistan arasındakı möhkəm qardaşlıq əlaqələrinin siyasi və mənəvi gücünə yönəlmişdi. Dövlət başçısı bu üçlü ittifaqın yalnız region üçün deyil, daha geniş coğrafiya üçün də sabitlik və inkişaf vədi verdiyini açıq şəkildə ifadə etdi. Prezidentin çıxışında Laçının rəmzi məkanı kimi seçilməsi təsadüfi deyildi. 30 il düşmən işğalında qalmış bu torpağın azad olunaraq beynəlxalq tədbirlərə ev sahibliyi etməsi, Azərbaycanın suverenliyinin və ədalətin bərpası kimi dəyərlərin təntənəsidir. Dövlət başçısı beynəlxalq hüququn qorunmasının və milli ərazi bütövlüyünün təmin olunmasının önəmini vurğulayaraq, Azərbaycanın haqlı mövqeyinə Türkiyə və Pakistanın göstərdiyi prinsipial dəstəyə xüsusi təşəkkür etdi. Çıxışda həmçinin üç ölkənin həmrəyliyinin sadəcə sözlərlə deyil, konkret dəstəklərlə sübut olunduğu qeyd edildi. Bu dəstək xüsusilə Vətən müharibəsi zamanı özünü qabarıq şəkildə göstərmiş və Azərbaycanın regiondakı mövqeyini daha da möhkəmləndirmişdir. Prezident, həmçinin bu həmrəyliyin beynəlxalq miqyasda yeni reallıqlar formalaşdırdığını vurğuladı. Tarixə qısa ekskurs edən Prezident İlham Əliyev Azərbaycan Xalq Cümhuriyyətinin ömrünün qısa olmasına, Qərbi Zəngəzurun Ermənistana verilməsinə və Azərbaycan xalqının əsrlər boyunca qarşılaşdığı ədalətsizliklərə toxundu. Bu kontekstdə, o, xalqın mübarizə əzminin, milli yaddaşın və dövlətçilik ideyalarının heç zaman sarsılmadığını bir daha xatırlatdı. Ermənistanın işğalçılıq siyasətinin yaratdığı fəsadlar, xüsusilə də Xocalı soyqırımı kimi dəhşətli cinayətlər ön plana çıxarıldı. Prezident İlham Əliyev 44 günlük İkinci Qarabağ müharibəsinin nəticələrinə də xüsusi yer ayırdı. O, bu zəfərin yalnız hərbi uğur deyil, eyni zamanda siyasi və mənəvi qalibiyyət olduğunu bildirdi. Şuşanın azad olunması, separatizmin tamamilə ləğv edilməsi və Azərbaycanın öz ərazi bütövlüyünü bərpa etməsi dövlətin gücünün və xalqın iradəsinin bariz təzahürü kimi təqdim edildi. Eyni zamanda Prezident, azad olunmuş ərazilərdə aparılan bərpa və yenidənqurma işlərinə də diqqət çəkdi. Qayıdış prosesinin sürətlə getdiyini, müasir infrastrukturun qurulduğunu və həyatın bu torpaqlara geri döndüyünü vurğuladı. Bu inkişaf Azərbaycanın gələcək strategiyasının bir parçası kimi qiymətləndirildi. Çıxışın sonunda verilən əsas mesajlardan biri də gələcəyə inamla bağlı idi. Prezident İlham Əliyev Azərbaycanın dost və qardaş ölkələrlə olan münasibətlərinin regional sabitliyin və rifahın əsasını təşkil etdiyini bildirdi. Üç dövlətin bu dərəcədə güclü birlik nümayiş etdirməsi, dünya miqyasında mühüm siyasi mesaj kimi qəbul olundu. Bu birlik təkcə emosional bağlar üzərində qurulmayıb, həm də strateji maraqların, ortaq tarix və gələcək hədəflərin vəhdətindən qaynaqlanır.

Misir Məmmədov,

Yeni Azərbaycan Partiyası Laçın rayon təşkilatının fəal üzvü

Paylaş:

Baxılıb: 545 dəfə