Ölkəmizin tranzit imkanları əməkdaşlıq əlaqələrinin genişləndirilməsinə stimul verir

Bakı:

20 °C

88 %

4 m/s

Əlaqə

AZ RU EN

Ana səhifə / YAP xəbərləri / Ölkəmizin tranzit imkanları əməkdaşlıq əlaqələrinin genişləndirilməsinə stimul verir

Ölkəmizin tranzit imkanları əməkdaşlıq əlaqələrinin genişləndirilməsinə stimul verir

31.01.2025 [17:01]

Etibar Hacıyev,

YAP Ağstafa rayon təşkilatının sədri

Yanvarın 28-də nəqliyyat məsələlərinə həsr olunmuş müşavirə keçirildi. Dövlət başçısı İlham Əliyev bu sahədə görülən işlər, qarşıda dayanan hədəflər barədə geniş məlumat verdi. Bakı şəhərinin və onun ətrafında yerləşən ərazilərin nəqliyyat infrastrukturunun inkişafının müzakirəsinə ehtiyac olduğunu önə çəkən cənab İlham Əliyev vurğuladı ki, son illər ərzində bu istiqamətdə bir çox işlər görülmüş, böyük infrastruktur layihələri icra edilmişdir. Lakin buna baxmayaraq Bakı şəhərində tıxac müşahidə olunur və tıxacların sayı ildən-ilə artır. Bunun təbii səbəbləri var. Ölkəmizin, o cümlədən Bakı şəhərinin əhalisi ildən-ilə artır. Son 30 il ərzində Azərbaycan əhalisi 7 milyondan 10 milyona çatıb. Əlbəttə ki, vaxtilə yaradılmış şəhər yol infrastrukturu, o cümlədən metro imkanları bu artımı həzm edə bilmir.

Nəqliyyat məsələləri daim diqqət mərkəzində saxlanılır. Son 15 il ərzində Bakı şəhərində bir çox böyük layihələr icra edildi, yeni metro stansiyaları istifadəyə verildi, yol qovşaqları, tunellər, körpülər inşa edildi, yeni yollar salındı. “Əgər bu işləri görməsəydik, bu gün, ümumiyyətlə, Bakı şəhərində nəqliyyat iflic vəziyyətinə düşərdi. Amma yenə də görürük ki, növbəti böyük bir proqramın qəbul olunmasında böyük fayda olacaq” söyləyən cənab İlham Əliyev onu da qeyd etdi ki, bu məqsədlə bir müddət bundan əvvəl Rəqəmsal İnkişaf və Nəqliyyat Nazirliyinə dövlət proqramının hazırlanmasına dair müvafiq göstərişlər verilib və bir neçə ay ərzində bu proqram üzərində iş aparılıb.

Onu da qeyd edək ki, dövlət başçısı İlham Əliyevin 30 yanvar 2025-ci il tarixli Sərəncamı ilə “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” təsdiqləndi.

Bu gün Avrasiyanın nəqliyyat xəritəsini Azərbaycansız, onun nəqliyyat infrastrukturu olmadan təsəvvür etmək mümkün deyil. Hazırda ərazimizdən Şərq-Qərb və Şimal-Cənub nəqliyyat dəhlizləri keçir. Bu dəhlizlər üzrə daşınan yüklərin həcmi ildən-ilə artır. Yüklərin daha səmərəli daşınması üçün fiziki infrastrukturla yanaşı, digər addımlar da atılır. Qonşu ölkələrlə yeni əməkdaşlıq formatları yaradıldı və müştərək müəssisələr quruldu. Cənab İlham Əliyev müşavirədə bildirdi ki, Azərbaycanı əvəzolunmaz nəqliyyat mərkəzlərinin birinə çevirmişik: “Onu da bildirməliyəm ki, adətən nəqliyyat mərkəzləri statusuna malik olan ölkələr o ölkələrdir ki, onların açıq dənizlərə çıxışı var. Bizim isə dünya okeanlarına çıxışımız yoxdur. Amma buna baxmayaraq, gördüyümüz işlər nəticəsində Azərbaycanı əvəzolunmaz nəqliyyat mərkəzlərinin birinə çevirmişik. İşlər davam edir, həm Şimal-Cənub, həm Şərq-Qərb nəqliyyat dəhlizləri üzrə indi əlavə tədbirlər görülür. Çünki vaxtilə hesablanmış yüklərin həcmi artıq onu göstərir ki, daha böyük həcmdə yüklər keçəcək. Bu, müxtəlif səbəblərə bağlı olan məsələdir. Ancaq fakt odur ki, indi bu dəhlizlərin aşırma qabiliyyətini artırmaq üçün əlavə sərmayə cəlb etmişik və edəcəyik”.

“Azərbaycanda nəqliyyat infrastrukturu sürətlə inkişaf edir” söyləyən cənab İlham Əliyev bunu rəqəmlər əsasında diqqətə çatdırdı. Belə ki, son 20 ildə Azərbaycanda 21 min kilometr avtomobil yolu tikilib və təmir edilib. 335 körpü və yolötürücüsü, 45 tunel, 163 yerüstü və yeraltı keçid tikilib. Əgər bu işlər görülməsəydi, indi ölkəmizin nəqliyyat infrastrukturunun hansı vəziyyətdə olduğunu təsəvvür etmək çətin deyildi.

Göründüyü kimi, nəqliyyat sektoruna göstərilən diqqət və aparılan düşünülmüş siyasət bu reallıqları yaradıb. Bu gün Azərbaycan nəqliyyat sahəsində dünyada lider dövlətlərdən biridir.

Paylaş:

Baxılıb: 433 dəfə