“YAP gənclərin gözü ilə”

Bakı:

16 °C

88 %

6 m/s

Əlaqə

AZ RU EN

Ana səhifə / YAP xəbərləri / “YAP gənclərin gözü ilə”

“YAP gənclərin gözü ilə”

20.10.2012 [18:47]

Partiyanın Suraxanı rayon təşkilatında bu mövzuda konfrans keçirilib
Yeni Azərbaycan Partiyası (YAP) Suraxanı rayon təşkilatı Gənclər Birliyinin təşəbbüsü ilə partiyanın yaranmasının 20-ci ildönümünə həsr olunmuş “YAP gənclərin gözü ilə” mövzusunda elmi-praktiki konfrans keçirilib. Konfransda YAP Suraxanı rayon təşkilatının İdarə Heyətinin üzvləri, partiyanın fəal gəncləri iştirak ediblər.
Tədbirdə çıxış edən YAP Suraxanı rayon təşkilatının aparat rəhbəri Fərman Rəsulov bildirib ki, Azərbaycan xalqı bu günlərdə müstəqilliyinin bərpasının 21-ci və Yeni Azərbaycan Partiyasının yaranmasının 20-ci ildönümünü böyük qürur və sevinc hissi ilə qeyd etməkdədir. Müstəqilliyimizin bərpa olunmasında Ümummilli lider Heydər Əliyevin əvəzsiz xidmətlərinin olduğunu deyən F.Rəsulovun sözlərinə görə, Ulu öndər hələ Sovet dövründə Azərbaycana rəhbərlik edən zamanlardan ölkəmizin müstəqilliyi üçün zəmin hazırlayıb. O, Ulu öndər Heydər Əliyevin qurucusu olduğu Yeni Azərbaycan Partiyasının ölkəmizin həyatında xüsusi rol oynadığını qeyd edib.
YAP Suraxanı rayon təşkilatı Gənclər Birliyinin sədri Zəkiyyə Musayeva bildirib ki, bu günün gənci baş verən hər bir hadisəyə reallıq müstəvisində yanaşır: “Bu reallıq Azərbaycanın inkişafı və tərəqqisidir. Bizlər məhz bu inkişafın, bu tərəqqinin davamlı olması üçün, hər zaman fəallığımızı nümayiş etdirməliyik. Eyni zamanda, bildirmək istərdim ki, Yeni Azərbaycan Partiyasının hər bir qələbəsində gənclərin də payı var”.
Suraxanı rayon Gənclər və İdman İdarəsinin rəisi Amil Bağırov isə qeyd edib ki, Ümummilli lider Heydər Əliyev xalqımızın müstəqillik qazanması istiqamətində yorulmadan fəaliyyət göstərib. “Azərbaycan bütün sahələrdə inkişaf etməklə bir daha dünyaya sübut etdi ki, müstəqilliyimiz əbədidir. Qeyd etmək istərdim ki, bu gün Azərbaycan həm də idman sahəsində uğurlu inkişaf yolunu keçməkdədir. London Olimpiya Oyunlarındakı uğurlu çıxışlar bunu bir daha deməyə əsas verir”.
YAP Suraxanı rayon təşkilatı Qadınlar Şurasının sədri Tünzalə Əliyeva isə çıxışında bildirib ki, bu gün Azərbaycanda gedən yüksək inkişaf hər bir vətəndaşda qürur hissi yaradır: “Əlbəttə ki, bizim hər birimiz Ulu öndər Heydər Əliyevin siyasi kursunu uğurla davam etdirən Prezident İlham Əliyevin siyasətini daim dəstəkləyəcək, Onun ətrafında daha sıx birləşəcəyik”.
Daha sonra çıxış edən fəal gənclər Sevinc Qasımlı, Ceyhun Şiriyev, Kənan Kərimov, eləcə də, rayon İcra Hakimiyyətinin baş təlimatçısı Nazim Fətullayev qeyd ediblər ki, Yeni Azərbaycan Partiyasının 20 illik uğurlu fəaliyyəti məhz Azərbaycan dövlətinin və xalqının uğuru kimi qiymətləndirilir.
Konfransın sonunda bir qrup gənc partiya sıralarına qəbul edilib.

Paylaş:

Baxılıb: 1635 dəfə