F-16 qırıcılarına “maneə” aktiv deyil...

Bakı:

20 °C

68 %

7 m/s

Əlaqə

AZ RU EN

Ana səhifə / Xarici siyasət / F-16 qırıcılarına “maneə” aktiv deyil...

F-16 qırıcılarına “maneə” aktiv deyil...

05.10.2023 [10:40]

Antitürk mövqeyində olan Bob Menendezin vəzifədən kənarlaşdırılması bu prosesə müsbət təsir edəcək

Türkiyə ilə ABŞ arasında F-16 qırıcı təyyarələrinə dair müzakirələr hələ də davam edir. Hələ bu ilin iyul ayında iki ölkənin liderləri telefon danışığında müzakirə etmiş və məsələnin həllində irəliləyiş olduğu bildirilmişdi. O zaman ABŞ prezidentinin milli təhlükəsizlik üzrə müşaviri Ceyk Sallivan jurnalistlərə məlumat vermişdi ki, Prezident Co Bayden Türkiyə Prezidenti Rəcəb Tayyib Ərdoğanla telefon danışığı zamanı Türkiyəyə F-16 qırıcılarının tədarükünün Birləşmiş Ştatların maraqlarına uyğun olduğunu deyib. Ankaraya döyüş təyyarələrinin tədarükü ilə bağlı vəziyyəti şərh edən Ceyk Sallivan qeyd edib: “Bayden açıq və ardıcıl şəkildə F-16-nın satışının müttəfiqlik və ikitərəfli ABŞ-Türkiyə münasibətləri üçün məqsədəuyğun olduğunu bildirib. Bu, bizim marağımızdadır”.

Lakin F-16 qırıcılarının Türkiyəyə verilməsində ən böyük maneələrdən biri ABŞ Konqresində antitürk mövqeyində olan qanunvericilərin mövcudluğudur. Qatı antitürk olan ABŞ Senatının Xarici Əlaqələr Komitəsinin sədri Bob Menendez həmişə bu prosesə əngəl olub. Amma onun bu yaxınlarda korrupsiyada ittiham olunaraq tutduğu vəzifəsindən istefa verməsi F-16-ların Ankaraya satışına yol aça bilər. Bu barədə ABŞ-da fəaliyyət göstərən “Atlantic Council” beyin mərkəzinin təhlilində F-16 müqaviləsinin ABŞ-Türkiyə münasibətləri üçün strateji əhəmiyyət kəsb etdiyinə və Menendezin Senatdan getməsi ilə Vaşinqton-Ankara əlaqələrinin inkişaf edə biləcəyi vurğulanıb. Təhlildə Vaşinqtonun Ankaraya F-16 satması ilə Türkiyənin İsveçin NATO üzvlüyünə razılıq verməsinin bir-biri ilə əlaqəli olduğu vurğulanıb, ən böyük riskin “Türkiyə və Konqresin sözügedən məsələlərdə qarşılıqlı fəaliyyət gözləntilərinin çıxılmaz vəziyyətə düşməsi” olduğu qeyd edilib: “Menendez qalmaqalı potensial dəyişiklik deməkdir, çünki Senatın Xarici Əlaqələr Komitəsinin sədri kimi o, xarici ölkələrə silah satışına təsirli veto hüququna malik idi və F-16-ların Türkiyəyə satışına qarşı olduğunu dilə gətirirdi”.

Məqalədə Bayden administrasiyasına çağırış və xəbərdarlıq edilib ki, “Türkiyə F-16-ların təhlükəsizliyini təmin edə bilməsə və döyüş təyyarələrini başqa yerdən almağa çalışsa, ABŞ və Türkiyə bir nəsil və ya daha uzun müddət davam edə biləcək müdafiə əlaqələrində daha geniş qırılma ilə üzləşə bilər”.

Onu da qeyd edək ki, ABŞ Senatının Xarici Əlaqələr Komitəsinin sədri vəzifəsində Menendesi əvəz edən demokrat senator Ben Kardin də Türkiyəyə F-16 satışı ilə bağlı açıqlamalar verib. Kardin məsələ ilə məşğul olacağını bildirib və komitənin F-16 satışı ilə bağlı qərarına Türkiyənin İsveçin NATO üzvlüyünü qəbul etməsindən başqa mövzuların da təsir edəcəyini bildirib. Bütün bunlar onu deməyə əsas verir ki, ABŞ F-16 qırıcılarını hələ də Türkiyəyə verməməsinin əsas səbəblərindən biri süni əngəldir. Türkiyə regionda ABŞ-ın əsas NATO müttəfiqidir. Belə olan halda, erməni lobbisinin Konqresdəki nümayəndələrinin pozuculuq fəaliyyəti müttəfiqliyə böyük zərbə vururdu. Bu mənada, Bob Menendezin vəzifədən kənarlaşdırılması F-16 qırıcılarının Türkiyəyə verilməsi prosesini sürətləndirə bilər.

N.BAYRAMLI

Paylaş:

Baxılıb: 820 dəfə