“Dəvət”in qeyri-ciddi tərəfi göründü...

Bakı:

7 °C

81 %

10 m/s

Əlaqə

AZ RU EN

Ana səhifə / Xarici siyasət / “Dəvət”in qeyri-ciddi tərəfi göründü...

“Dəvət”in qeyri-ciddi tərəfi göründü...

14.09.2023 [11:14]

Fehlingerin NATO ilə rəsmi əlaqəsi yox imiş

Bir həftə əvvəl İrəvana dəstək verənlər içərisində NATO-nun da olması ilə bağlı məlumat yayılmışdı. Qəzetimizdə bu “hadisəni” “Qeyri-ciddi “dəvətin” görünməyən tərəfləri...” başlıqlı yazı ilə təhlil etmiş, Avropa NATO İnkişaf Komitəsinin sədri Günter Fehlingerin X sosial şəbəkəsindəki çağırışının absurd olduğunu bildirmişdik. Ermənistan KİV-i isə “Fehlingerin çağırışını” ciddiyə alıb, KTMT-də çıxma məsələsini gündəmə gətirdi, Rusiyanın 102-ci hərbi bazasını ərazidən çıxarmaq üçün müxtəlif versiyalar irəli sürdü...

Ermənistan xarici işlər nazirinin müavini Vahan Kostanyan da Fehlingerin sözlərini şərh edərkən fəxrlə demişdi ki, Ermənistan artıq NATO ilə qarşılıqlı əlaqədədir və əməkdaşlığı davam etdirməyə hazırdır.

Amma məsələ təxmin etdiyimizdən də gülünc obraz alıb. Belə ki, ötən gün NATO-nun Ermənistanı alyansa qoşulma çağırışını təkzib edən məlumat yayıldı. Şimali Atlantika Alyansının nümayəndəsi “İzvestiya”ya deyib ki, Ermənistanın “NATO-ya çağırışçısı”nın alyansla yaxından-uzaqdan əlaqəsi yoxdur: “Cənab Fehlingerin NATO ilə heç bir rəsmi əlaqəsi yoxdur. O, NATO əməkdaşı deyil. Onun fikirləri özünə məxsusdur və alyansın mövqeyini əks etdirmir”, - deyə alyansın nümayəndəsi bildirib.

Alyansın bu qondarma “sədri” X sosial şəbəkəsindəki hesabında “Nikol Paşinyan, mən Ermənistanı NATO-ya üzv olmağa çağırıram. Co Bayden, Ermənistanı qoruyun” yazmaqla həm özünün, həm də “dəvətinin” qeyri-ciddiliyini ortaya qoyurdu. Çünki, hansısa dövlətin NATO-ya dəvəti işçi səviyyəsində çağırışla həyata keçmir. Ya Günter Fehlinger prosedur qaydalarını unudub(?!), ya da onlardan xəbəri yoxdur. Elə bu səbəbdən gülüş obyektinə çevrilməyi “haqq edir”.

Digər tərəfdən, Ermənistan hansı ordusu ilə NATO-ya üzv olmağa “dəvət edilir”? Axı günterlər də, bütün dünya da Ermənistan ordusunun 2020-ci ildə yerlə-yeksan olduğu barədə məlumatlıdırlar. Hərbi gücü olmayan bir ölkə NATO-ya nə verə bilər?

Paşinyan hakimiyyəti isə perspektivi olmayan bu “çağırışa” inanmışdı. İnanmışdı ki, KTMT məngənəsindən yaxa qurtaracaq, forpost sözünü üzərindən həmişəlik siləcək... Amma necə deyərlər, “sən saydığını say...” .

Belə fərz edək ki, NATO bölgədə Rusiya izini silmək üçün belə bir addım planlaşdırdı. NATO-da, İrəvan da alyansda Türkiyə amilinin olduğunu bilirlər. Aylardır ki, haqlı tələbləri ilə İsveçin NATO-ya daxil olmasını mümkünsüz edən Türkiyə Ermənistanın Alyans üzvü olmasına icazə verərmi? Və ya Alyansın gücündən Azərbaycana qarşı istifadə olunmasına şərait yaradarmı? Axı, dolayısı ilə bu gün Şimali Atlantika Bloku Azərbaycanla müttəfiq sayılır - Şuşa Bəyənnaməsi ilə Azərəbaycanın strateji müttəfiqi olan Türkiyə rəsmi Bakının maraqlarını qorumaq üçün hərbi gücdən belə istifadə etməkdə sərbəstdir. Bu isə o deməkdir ki, Türkiyənin hər hansı bir aktiv hərbi əməliyyatlara başlaması ilə NATO ona qanuni dəstək verməlidir.

Beləliklə, Ermənistanın yeganə çıxış yolu öncə Azərbaycanla sülh müqaviləsi imzalamaq, Türkiyə ilə münasibətləri yaxşılaşdırmaqdan keçir.

P.İSMAYILOV

Paylaş:

Baxılıb: 897 dəfə