Qırmızı xətlər aşıldı...

Bakı:

35 °C

31 %

2 m/s

Əlaqə

AZ RU EN

Ana səhifə / Xarici siyasət / Qırmızı xətlər aşıldı...

Qırmızı xətlər aşıldı...

07.12.2021 [10:17]

Ukrayna məsələsində gərginlik artır

Putin-Bayden görüşü müharibənin qarşısını alacaqmı?

Pərviz Sadayoğlu

Rusiyanın Ukrayna sərhədinə ordu çıxarması bu ölkə ilə ABŞ arasındakı gərginliyi daha da artırıb. Ekspertlər qeyd edirlər ki, iki dövlət arasındakı mövcud problemlərin danışıqlar yolu ilə həlli daha da çətinləşib. Artıq hər iki dövlət qarşı tərəflə ultimatum dili ilə danışmağa üstünlük verir. Bu arada, Rusiya və ABŞ prezidentləri Vladimir Putin və Co Bayden arasındakı görüşün də detalları tam bəlli olub. Dövlət başçıları Ukrayna məsələsi ilə əlaqədar gərginliyi, NATO-nun Rusiya Federasiyası sərhədlərinə irəliləməsini və Rusiya liderinin təhlükəsizlik zəmanətləri haqqında təşəbbüsünü müzakirə edəcəklər. Bununla bağlı Kremlin mətbuat katibi Dmitri Peskov məlumat verib.

Məsələ ilə bağlı fikirlərini bölüşən Bakı Politoloqlar Klubunun sədri Zaur Məmmədov bildirib ki, Rusiya - NATO qarşıdurması, əslində Rusiya-ABŞ qarşıdurması kimi anlaşılmalıdır. Ukrayna ilə bağlı məsələlərin gərgin fazaya qədəm qoyduğunu söyləyən politoloq vurğulayıb ki, bu, iki ölkə arasında müharibəyə gətirib çıxara bilər. Bunda isə dünya birliyinin də günahı yox deyil: “Dünya birliyi illərdir ki, Ukraynanın Şərqində baş verənlərlə bağlı qəti addımlar atmır, Ukrayna ilə Rusiya arasında vasitəçilik missiyasını lazımi şəkildə yerinə yetirə bilmir. Beynəlxalq aləm vaxtilə Azərbaycanda olduğu kimi, Ukraynada da status-kvonun saxlanmasını istəyir. Artıq proses o yerə gəlib çatıb ki, Qara dəniz ətrafında toqquşmaların olması gözləniləndir. Faktiki olaraq ABŞ-ın, NATO-nun hərbi gəmilərinin və təyyarələrinin Rusiya sərhədlərinin yaxınlığında hərəkətinin şahidi oluruq. Bu isə ABŞ və Rusiya arasında hərbi toqquşmanı labüd edir. Düşünürəm ki, Rusiya və ABŞ liderləri arasında davam edən dialoq və baş tutacaq telefon danışığı bir çox məsələlərin aydınlığa qovuşmasına kömək göstərəcək. Bu məsələlərə aydınlıq gələndən sonra tərəflər arasında münasibətlərin mülayimləşməsinin şahidi ola bilərik”.

Z.Məmmədovun fikrincə, ABŞ-ın, NATO-nun Şərqi Avropada güclənməsindən sonra növbənin Qara dəniz ətrafı bölgələrə çatacağı gözlənilən idi. Belə ki, NATO-nun öz silahlarının bir qismini Almaniyadan çıxarıb Polşada yerləşdirməsi, Polşanı və Baltikyanı ölkələri Rusiyaya qarşı böyük bir cəbhəyə çevirməsi onun göstəricisi idi. “Artıq növbə Qara dənizin şimal və şərq hüdudlarına çatır. Yaxın vaxtlarda, hətta Cənubi Qafqazda da bu qarşıdurmanın təsirlərini hiss edə bilərik. Çünki Ukrayna məsələsi daha da aktivləşir. Hər iki dövlətin, eyni zamanda, separatçıların da öz qüvvələrini bölgəyə yığması ilə bağlı məlumatlar müharibənin hər an başlaya biləcəyini deməyə əsas verir. Rusiya tərəfinin açıqlamaları da onu göstərir ki, artıq Ağ Evə verilən qırmızı xətt keçilib”.

Paylaş:

Baxılıb: 1437 dəfə