Milli Məclisin Qırğızıstan-Azərbaycan parlamentlərarası əməkdaşlıq üzrə Dostluq Qrupunun üzvləri Qırğızıstan səfirliyində olublar

Bakı:

27 °C

57 %

4 m/s

AZ RU EN

Ana səhifə / Xarici siyasət / Milli Məclisin Qırğızıstan-Azərbaycan parlamentlərarası əməkdaşlıq üzrə Dostluq Qrupunun üzvləri Qırğızıstan səfirliyində olublar

Milli Məclisin Qırğızıstan-Azərbaycan parlamentlərarası əməkdaşlıq üzrə Dostluq Qrupunun üzvləri Qırğızıstan səfirliyində olublar

19.05.2016 [10:24]

Dünən Qırğızıstan Respublikasının ölkəmizdəki fövqəladə və səlahiyyətli səfiri Ayciqit Baymuxammadoviç Buranovun dəvəti ilə Azərbaycan Respublikası Milli Məclisinin Qırğızıstan-Azərbaycan parlamentlərarası əməkdaşlıq üzrə Dostluq Qrupunun rəhbəri Musa Urud və qrupun üzvləri Qırğızıstan səfirliyində olublar. Görüşdə Qırğızıstan-Azərbaycan parlamentlərarası əməkdaşlıq üzrə Dostluq Qrupunun rəhbəri Musa Urud qeyd edib ki, iki ölkə arasında tarixi köklərə malik olan dostluq və qardaşlıq münasibətləri mövcuddur. Diqqətə çatdırılıb ki, Qırğızıstanla Azərbaycan arasında münasibətlər ikitərəfli və çoxtərəfli əməkdaşlıq müstəvisində, o cümlədən beynəlxalq təşkilatlar çərçivəsində uğurla inkişaf edir. Bildirilib ki, iki ölkə arasındakı münasibətlərin mühüm istiqamətlərindən birini mədəni, humanitar əlaqələr təşkil edir. Təsadüfi deyil ki, 2008-ci ildə türk dünyasının böyük mütəfəkkiri, görkəmli qırğız yazıçısı Çingiz Aytmatovun 80 illik yubileyi ilk dəfə olaraq Azərbaycanda keçirildi və Ç.Aytmatov Azərbaycan Prezidenti tərəfindən “Dostluq” ordeni ilə təltif olundu. Bildirilib ki, Qırğızıstanda Heydər Əliyev parkının salınması və Ümummilli lider Heydər Əliyevin heykəlinin qoyulması, eyni zamanda, Gəncədə Çingiz Aytmatovun adına küçə salınması və onun heykəlinin qoyulması məqsədəmüvafiq olar.
Qırğızıstan Respublikasının ölkəmizdəki fövqəladə və səlahiyyətli səfiri Ayciqit Buranov isə deyib ki, Qırğızıstan Azərbaycanla müxtəlif sahələri əhatə edən münasibətlərin inkişafında maraqlıdır. Səfir diqqətə çatdırıb ki, Qırğızıstan ölkəmizlə mövcud iqtisadi münasibətlərin siyasi münasibətlər səviyyəsinə qalxmasını vacib hesab edir. Ayciqit Buranov bildirib ki, mövsümi olsa belə, Bişkek-Bakı aviareysinin açılması münasibətlərin inkişafına təkan verə bilər. Çünki Qırğızıstanda Azərbaycanın çoxsaylı diaspor nümayəndəsi yaşayır və bu ölkədən Azərbaycana gəlmək istəyən turistlərin sayı kifayət qədərdir, eyni zamanda, bu ölkə sərnişinləri Azərbaycandan tranzit məkan kimi istifadə etməklə Avropaya uçuş imkanı əldə etmiş olarlar.
Daha sonra çıxış edən Qırğızıstan-Azərbaycan parlamentlərarası əməkdaşlıq üzrə Dostluq Qrupunun üzvü Sədaqət Vəliyeva deyib ki, xalqlarımız arasında çoxsaylı bənzərliklər mövcuddur. O diqqətə çatdırıb ki, “mən uşaqkən Çingiz Aytmatovun Azərbaycan yazıçısı olduğunu zənn edirdim, bu gün də onu öz yazıçımız hesab edirəm, çünki qırğızlarla azərbaycanlılar eyni tarixi kökdən gələn xalqlardır”.
Dostluq Qrupunun üzvü Hikmət Babaoğlu isə bildirib ki, xalqlarımız arasında dərin tarixi köklər var. Hər iki xalqın etnogenezisinin formalaşmasında eyniadlı türk tayfaları iştirak ediblər ki, bu da bizim ortaq milli təfəkkürümüzü və mədəniyyətimizi formalaşdıran əsas amillərdən biridir. Hikmət Babaoğlu əlavə edib ki, Azərbaycan Prezidenti İlham Əliyev ikitərəfli münasibətlərin inkişafı naminə qətiyyətli addımlar atmaqdadır. Qırğızıstanın Oş vilayətində baş vermiş zəlzələnin nəticələrinin aradan qaldırılmasına dəstək məqsədilə Azərbaycan Prezidenti İlham Əliyevin tapşırığına əsasən Qırğızıstana 1 milyon manat dəyərində humanitar yardım göndərilməsi bu qəbildən olan nümunələrdəndir.

Paylaş:

Baxılıb: 2624 dəfə