“Amnesty İnternational”ın subyektiv “demokratiya” anlayışı...

Bakı:

18°C

72%

12m/s

Əlaqə

AZ RU EN

Ana səhifə / Xarici siyasət / “Amnesty İnternational”ın subyektiv “demokratiya” anlayışı...

“Amnesty İnternational”ın subyektiv “demokratiya” anlayışı...

31.10.2014 [09:55]

Azərbaycanın dinamik inkişafından, müasir dünya siyasəti və beynəlxalq münasibətlər sistemindəki mövqeyinin davamlı surətdə möhkəmlənməsindən narahatlıq keçirən bəzi dairələr “demokratiya”, “insan hüquqları” kimi məfhumlardan istifadə edərək ölkəmizə qarşı təzyiq mexanizmi formalaşdırmağa çalışırlar
Müstəqil inkişaf strategiyasına malik olan Azərbaycan bu gün beynəlxalq miqyasda müasir demokratik ölkə kimi tanınır. Ümumiyyətlə, ölkəmizin daxili siyasət kursunun mühüm istiqamətlərindən birini demokratik təsisatların təkmilləşdirilməsi, insan və vətəndaş hüquq və azadlıqlarının təmin və müdafiə edilməsi təşkil edir.
Azərbaycan demokratik dəyərlər və təsisatların təşəkkül tapdığı müasir hüquqi dövlətdir
Bu kontekstdə qeyd etmək lazımdır ki, Azərbaycan demokratik dəyərlər və təsisatların təşəkkül tapdığı müasir hüquqi dövlətdir. Ölkəmizdə demokratiya və onun başlıca atributları olan vətəndaş cəmiyyəti və hüquqi dövlətin mütləq komponentlərinin təşəkkül tapmasını, həmçinin, inkişafını təmin edən əsas amillərdən biri məhz davamlı hüquqi islahatların həyata keçirilməsidir.
Digər tərəfdən, çoxistiqamətli islahatlar siyasi sistemin təkmilləşməsinə mühüm töhfələr verir. Həyata keçirilən inkişaf strategiyasının fonunda reallaşdırılan demokratik islahatlar mütəmadi xarakter daşıyır. Azərbaycan siyasi, hüquqi, iqtisadi islahatları davam etdirmək əzmindədir və həyata keçirilən bütün tədbirlər ölkəmizin davamlı inkişafına xidmət edir. Xüsusilə də müxtəlif sahələrdə islahatların paralel aparılması reallaşdırılan siyasi kursun səmərəliliyini təmin edir. Bütün bunlar, eyni zamanda, vətəndaş cəmiyyətinin inkişafına fundamental strateji töhfələr verir.
Bununla yanaşı, Azərbaycanda insan və vətəndaş hüquqları milli dövlətimizin Konstitusiya tələblərinə görə qorunur və ölkəmizdə hər bir vətəndaş qanunla müəyyən olunmuş qaydada öz hüquq və azadlıqlarından sərbəst surətdə istifadə edə bilir.
“Amnesty İnternational” ənənəvi ampluasında...
Lakin Azərbaycanın dinamik inkişafından, müasir dünya siyasəti və beynəlxalq münasibətlər sistemindəki mövqeyinin davamlı surətdə möhkəmlənməsindən narahatlıq keçirən bəzi dairələr “demokratiya”, “insan hüquqları” kimi institusional məfhumlardan istifadə edərək ölkəmizə qarşı təzyiq mexanizmi formalaşdırmağa çalışırlar. Bu istiqamətdə ayrı-ayrı ölkələrdə demokratik inkişaf səviyyəsini, insan hüquqlarının vəziyyətini araşdırdığı iddia edilən, lakin sözün əsl mənasında, missioner təsisat və ya təzyiq qrupu kimi çıxış edən təşkilatların xidmətlərindən istifadə edilir. Bu cür təşkilatlar vaxtaşırı olaraq hazırladıqları hesabat və ya bəyanatlarda müstəqil daxili və xarici siyasət kursuna malik olan ölkələri hədəfə alır, müxtəlif ittihamlar səsləndirərək subyektiv, ədalətsiz və qərəzli mövqe sərgiləyirlər. Şübhəsiz, bu kontekstdə Azərbaycan da istisna təşkil etmir...
Bu istiqamətdə son olaraq “Amnesty İnternational” təşkilatının bəyanatında bu cür qeyri-obyektiv, qanunun aliliyi prinsipinin heçə sayıldığı məqamlar yer alıb. Bəyanatda ölkəmizdə hüququn aliliyi prinsipini heçə sayaraq qanun pozuntularına yol vermiş şəxslər müdafiə edilib, bir növ, onların cinayətkar fəaliyyətinə haqq qazandırılıb. Bundan başqa, Vaşinqtonda yerləşən Açıq Cəmiyyət Fondunun Avropa Sabitlik Təşəbbüsü Mərkəzi və ABŞ Beynəlxalq İnkişaf Agentliyi USAID-in təmsilçilərinin də iştirakı ilə keçirdiyi tədbirdə ölkəmizin əleyhinə qərəzli fikirlər səsləndirilib.
Əlbəttə, “Amnesty İnternational” təşkilatının bu cür mövqe sərgiləməsi təəccüblü görünmür. Çünki bəhs olunan qurumun məhz bu zamana qədərki bəyanatlarında əks olunan subyektiv mülahizələr və ədalətsiz çalarlar demokratik prinsiplərin kobudcasına heçə sayılması və ikili standartlar əsasında çıxış etmək deməkdir.
Dolayısıyla, “Amnesty İnternational” kimi təşkilatların hesabat və bəyanatları real məqamlar, faktlar əsasında deyil, müəyyən dairələrin maraqlarına xidmət edən dezinformasiyalar əsasında hazırlanır.
İkili standartlar “Amnesty İnternational”ın metodoloji prinsipi kimi...
Digər məqam budur ki, Azərbaycan əleyhinə ikili standartlara söykənən bu cür bəyanatlar verən “Amnesty İnternational” kimi təşkilatlar insan hüquqlarını əsas tutduğunu iddia edirlərsə, Azərbaycan ərazisinin 20 faizinin Ermənistan tərəfindən işğal edildiyini, 1 milyondan çox soydaşımızın qaçqın və məcburi köçkün vəziyyətinə düşməsini, minlərlə insanın xüsusi qəddarlıq və vəhşiliklərə məruz qalmasını niyə diqqətə çatdırmırlar? Yaxud Ermənistanın işğalçılıq və etnik təmizləmə siyasətinin yeni bir mərhələsi olan, Azərbaycan xalqının başına gətirilmiş qanlı faciələrdən biri - Xocalı soyqırımı haqqında gerçəkliklər nəyə görə tənqid obyektinə çevrilmir?
“Amerikanın səsi” təzyiq qruplarının ruporu qismində...
Digər tərəfdən, bu cür təzyiq kampaniyalarında müəyyən dairələrin direktivləri əsasında fəaliyyət göstərən transmilli media strukturlarının xidmətlərindən də xüsusi olaraq istifadə edilir. Həmin media qurumları dezinformasiya xarakterli məlumatları və subyektiv mülahizələrə söykənən - ittiham xarakterli fikirləri dövriyyəyə buraxmaqla “qara piar” kampaniyası aparır, bu məsələlərlə bağlı dünya ictimaiyyətini manipulyasiyaya məruz qoyur. Məhz “Amnesty İnternational” təşkilatının yuxarıda bəhs olunan qərəzli, qeyri-obyektiv mülahizələrinə tribuna verən “Amerikanın səsi” radiosu da bu cür fəaliyyət mexanizminə malikdir.
Əslində, bu media qurumunun təxribatçı, qərəzli mövqeyə məmnuniyyətlə tribuna verməsi onu göstərir ki, öz fəaliyyəti ilə dünyaya “nümunə” olduğunu iddia edən “Amerikanın səsi” təzyiq qruplarının ruporu qismində çıxış edir.
Anti-Azərbaycan dairələrin manipulyasiyası heç bir nəticə verməyəcək
Nəticə etibarilə, Azərbaycan öz inkişaf yolunda irəliləyir və ictimai maraqların, milli təhlükəsizliyin təmin olunması əsas məqsəd kimi müəyyənləşdirilmişdir. Bəzi anti-Azərbaycan dairələrin bu cür neqativ cəhdləri heç bir nəticə verməyəcək. Həmçinin belə manipulyasiyalarla ölkəmizdə ictimai rəyə təsir etmək mümkün deyil. Bu səylər nə Azərbaycanın pozitiv beynəlxalq imicinə kölgə sala, nə də ki, ölkəmizdəki ictimai-siyasi sabitliyə təsir göstərə bilər.
Nurlan QƏLƏNDƏRLİ