Martinş Lazdovskis: Azərbaycan regionda əsas tərəfdaşımızdır

Bakı:

23 °C

94 %

1 m/s

Əlaqə

AZ RU EN

Ana səhifə / Xarici siyasət / Martinş Lazdovskis: Azərbaycan regionda əsas tərəfdaşımızdır

Martinş Lazdovskis: Azərbaycan regionda əsas tərəfdaşımızdır

09.09.2014 [09:31]

Latviya İqtisadiyyat Nazirliyinin dövlət katibi Martinş Lazdovskis AzərTAc-ın müxbiri ilə söhbətində ölkəsinin Azərbaycan ilə iqtisadi əməkdaşlığının əsas istiqamətlərindən danışıb.
M.Lazdovskis qeyd edib ki, Latviya ilə Azərbaycan arasında ticarət-iqtisadi əlaqələrin fəallaşmasına 2013-cü ilin yazında Latviya Prezidenti Andris Berzinşin Bakıya səfəri də kömək edib. Ölkələrimiz arasında mal dövriyyəsi 2013-cü ildə 31 milyon avro təşkil edib ki, bu da 2012-ci ildəkindən 30 faiz çoxdur. Dövlət katibi bildirib ki, mal dövriyyəsinin faizlə artımı Latviya ilə Azərbaycan arasında iqtisadi əlaqələrin intensivliyini sübut edir. Lakin bu göstərici hələlik ölkələrimizin potensialına cavab vermir.
M.Lazdovskis bildirib ki, siyasi sahədə Latviya-Azərbaycan əlaqələri çox yaxşı səviyyədədir. Azərbaycanın regionda Latviyanın əsas tərəfdaşı olduğunu vurğulayan dövlət katibi qeyd edib ki, Latviya tərəfi institutsional bazanın təkmilləşəcəyinə və gələcəkdə konkret layihələrin reallaşacağına ümid edir.
Dövlət katibi vurğulayıb ki, Latviya iki ölkə sahibkarlarının fəaliyyətinin səmərəliliyinə böyük ümidlə baxır. M.Lazdovskis diqqətə çatdırıb ki, bank sahəsi üzrə latviyalı sahibkarlar Azərbaycanın maliyyə bazarının fəal iştirakçılarıdır. Ölkədə Latviyanın “Citadele” və “Trasta komercbanka” maliyyə qrupları fəaliyyət göstərir, eləcə də “DPA” beynəlxalq informasiya texnologiyaları, “TILDA” şirkətləri, Baltikyanı ölkələrin aparıcı əczaçılıq müəssisəsi olan “Grindex” şirkəti, “Olayfarm” kimya-əczaçılıq zavodu Azərbaycanda filiallarını açıblar.
M.Lazdovskis bildirib ki, Latviya Azərbaycanın öz mallarının daşınması, tranziti və saxlanması üçün Latviyanın nəqliyyat infrastrukturundan istifadəni genişləndirməsində maraqlıdır. Dövlət katibinin sözlərinə görə, bu, Azərbaycana Latviyanın nəqliyyat infrastrukturundan, o cümlədən liman xidmətlərindən və Latviyanın dəmiryolu daşınmaları sahəsində müsbət təcrübəsindən istifadə etməklə öz mallarının Avropaya ixracını genişləndirmək üçün yaxşı imkanlar verərdi. Latviya Azərbaycanın nəqliyyat və logistika şirkətlərinə bu ölkənin ərazisində özlərinin logistika və distribusiya mərkəzlərini açmaqla fəaliyyətlərini genişləndirməyi təklif etməyə hazırdır.
M.Lazdovskis deyib ki, hava nəqliyyatı sahəsində əməkdaşlıq ikitərəfli iqtisadi əlaqələrin vacib aspektlərindəndir. Çünki Latviya iki ölkə arasında yük və sərnişin aviasiyası sahəsində əməkdaşlığın inkişafında maraqlıdır. Bu zaman Şimali Avropa nəqliyyat qovşağı qismində “Riqa” Beynəlxalq Aeroportunun üstünlükləri vurğulanır.
Martinş Lazdovskis qeyd edib ki, Ukraynadakı hazırkı vəziyyət prizmasından baxsaq, Azərbaycan bazarı Latviyanın kənd təsərrüfatı məhsulları üçün potensial bazardır. Dövlət katibi qeyd edib ki, Latviya, öz növbəsində, istinad nöqtəsi ola və Azərbaycan məhsullarının Avropa bazarına çıxmasına kömək edə bilər.
Azərbaycan ilə bağlı təəssüratlarını bölüşən Martinş Lazdovskis bildirib ki, o, bircə dəfə - 2006-cı ildə Bakıda olub. Dövlət katibi deyib: “Keçmiş SSRİ-nin müxtəlif şəhərlərində olmuşam, Bakıda da oxşar vəziyyətlə qarşılaşacağımı gözləyirdim. Lakin hələ 2006-cı ildə Azərbaycan bir çox istiqamətlərdə yüksək sürətli inkişafı ilə heyrət doğurub. İki il əvvəl Bakının ev sahibliyi etdiyi “Eurovision” mahnı müsabiqəsinə televiziya vasitəsilə baxanda çox təsirləndim və bir daha əmin oldum ki, Azərbaycan böyük inkişaf yolu keçib”.

Paylaş:

Baxılıb: 1679 dəfə