Qəbələnin füsunkar təbiəti turistləri özünə cəlb edir

Bakı:

27 °C

44 %

4 m/s

Əlaqə

AZ RU EN

Ana səhifə / Turizm / Qəbələnin füsunkar təbiəti turistləri özünə cəlb edir

Qəbələnin füsunkar təbiəti turistləri özünə cəlb edir

10.06.2015 [09:11]

İsti yay aylarında Qəbələ rayonu gözəl təbiətinə, sıx meşələrinə, soyuq bulaqlarına, mənzərəli çay və göllərinə, həmçinin müasir turizm infrastrukturuna görə yerli və xarici turistlər üçün daha cəlbedici olur.
Rayon mədəniyyət və turizm şöbəsinin müdiri Nargilə Qafarova AZƏRTAC-a bildirib ki, Qəbələnin müasir turizm obyektlərində “Bakı-2015” birinci Avropa Oyunları ilə əlaqədar ölkəmizə çoxsaylı xarici qonaqların gələcəyi nəzərə alınaraq mühüm hazırlıq işləri görülüb.
Artıq Xorvatiya, Portuqaliya, Rusiya, BƏƏ və Türkiyədən birinci Avropa Oyunlarını izləmək üçün ölkəmizə gələn turistlər fürsətdən istifadə edərək, bu günlərdə Qəbələyə də üz tuturlar. Kanatla dağ gəzintisi, atla meşələrdə gəzintiyə çıxmaq, göllərdə qayıqla gəzmək və balıq tutmaq, meşələrdə heyvan və quş ovlamaq barədə düşünənlərin arzusu Qəbələdə gerçəkləşir. Birinci Avropa Oyunları günlərində Qəbələyə gələcək yerli və xarici turistlərin istirahətinin mənalı təşkili üçün “Qafqaz Resorte”, “Qafqaz Riverside”, “Qafqaz Karvansaray”, “Qafqaz Yengicə Termal Hotel və SPA” və “Qafqaz Sport”, “Qəbələ City” və “Yeddi Gözəl” otellərində, “Qəbələnd” istirahət və əyləncə mərkəzində yüksək şərait yaradılıb. Avropa Oyunları keçirilən günlərdə yerli və xarici turistlər Qəbələnin qədim tarixi, müasir şəhərsalma mədəniyyəti və ləziz mətbəxi ilə də yaxından tanış olmaq imkanı əldə edə biləcəklər.
Şöbə müdiri onu da qeyd edib ki, Qəbələdəki “Tufandağ” Qış-Yay Turizm İstirahət Kompleksi, Stend və Ox Atıcılığı Kompleksi, Çuxur Qəbələ kəndində yerləşən və 900 il Qafqaz Albaniyasının paytaxtı olan qədim Qəbələ şəhərinin qalıqları, Nic qəsəbəsindəki qədim “Cotari” alban kilsəsi, Vəndam qəsəbəsindəki “Yeddi gözəl” şəlaləsi, Qəbələ şəhərindəki “Beltman” piano fabriki, Qəbələ Tarix-Diyarşünaslıq Muzeyi turistlərin ən çox üz tutduqları yerlərdəndir. Həmçinin sıx meşəliklə əhatə olunan və Dəmiraparan çayının sahilində yerləşən “Qəbələ-Xanlar” İstirahət Mərkəzi ləziz təndir yeməkləri, daşarası kababı, qeyri-adi mürəbbələri və dadlı şirniyyatlarla təqdim olunan çay süfrəsi ilə yerli və xarici turistlərin marağını cəlb edir.
Nargilə Qafarova deyib ki, hazırda rayonda irili-xırdalı 100-ə yaxın turizm-istirahət obyekti fəaliyyətdədir. Həmin obyektlərdən 19-u beş, dörd və üçulduzlu otellər, müasir istirahət mərkəzləridir. Bu turizm obyektlərində gün ərzində 2500 qonağı qarşılamaq, onlara yüksək səviyyədə xidmət göstərmək mümkündür. Ötən il Qəbələyə 50 min 300-dən çox yerli və xarici turist gəlib. Bu il turistlərin sayının daha çox olacağı gözlənilir.

Paylaş:

Baxılıb: 2864 dəfə