Mötəbər tədbir yaxınlaşır...

Bakı:

26 °C

47 %

2 m/s

Əlaqə

AZ RU EN

Ana səhifə / Turizm / Mötəbər tədbir yaxınlaşır...

Mötəbər tədbir yaxınlaşır...

28.09.2024 [08:43]

COP29-da ölkəmizə nə qədər turist gələcək?

Məlum olduğu kimi, bu il ölkəmiz olduqca vacib tədbirə ev sahibliyi edəcək. Noyabr ayında Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) baş tutacaq. İqlim konfransı çərçivəsində paytaxtımıza on minlərlə qonağın gələcəyi gözlənilir.

Ölkə başçısı ilin əvvəlində təqribən 70-80 min xarici qonağın iki həftə ərzində Azərbaycanda olacağını bildirmişdi. Ötən COP28 tədbirində rəsmi olaraq 70 min qonaq qeydiyyatdan keçmişdi.

70 min qonağı yerləşdirmək imkanımız var?

Xatırladaq ki, Azərbaycanın indiyə kimi ev sahibliyi etdiyi ən böyük beynəlxalq tədbir Avropa Oyunları olub. O zamanlar ölkəyə 5 min idmançı və onları müşayiət edən təqribən 3 min qonaq gəlmişdi. Ötən ilin iyun ayında isə ümumilikdə, 89 mindən çox xarici turist Bakı otellərinə yerləşib.

Azərbaycan elan edib ki, COP29 tədbiri təxminən 70 min adam tutumlu Bakı Olimpia Stadionunda keçiriləcək. Tədbirlər zamanı stadionun ətraf əraziləri də istifadə olunacaq, zallar quraşdırılacaq.

Turizm sektoru COP29-a necə hazırlaşır?

Bu mötəbər tədbirə turizm sektoru da ciddi hazırlaşır. Texniki və təşkilati baxımdan turizm sənayesinin COP29 kimi mühüm tədbirin yüksək səviyyədə keçirilməsini təmin etmək məqsədilə tam hazırlıqlı vəziyyətə gətirilməsi istiqamətində işlər davam edir. Azərbaycana bu tədbirlə əlaqədar səfər edəcək qonaqların rahat yerləşdirilməsi üçün mayın 23-dən vahid onlayn rezervasiya platforması istifadəyə verilib.

Turizm üzrə ekspert Ramin Zamanov “Yeni Azərbaycan”a açıqlamasında bildirib ki, Dövlət Turizm Agentliyi Bakı, Sumqayıt şəhərləri və Abşeron rayonu ərazisində fəaliyyət göstərən 300-dən artıq yerləşmə obyektinin auditini həyata keçirib. Ekspert qeyd edib ki, onlardan 207-si təsnifatdan keçirilərək ulduz dərəcəsi əldə edib: “Təsnifatdan keçməyən 40-a yaxın hotelə nöqsanları aradan qaldırmaq üçün vaxt verilib və onların təkrar auditi davam edir. Agentlik regionlarda fəaliyyət göstərən yerləşmə obyektlərinin də monitorinqini aparıb. Ulduz dərəcələrinin təyin edilməsi ilə bağlı işlərin icrası nəzərdə tutulur”.

Tur bələdçilərinin sayı...

R.Zamanovun sözlərinə görə, xidmət keyfiyyətinin artırılması məqsədilə Bakı, Sumqayıt şəhərləri və Abşeron rayonunda fəaliyyət göstərən hotellərin 2 minə yaxın personalına peşə təlimləri, eləcə də mətbəx idarə edilməsi ilə bağlı təlimlər keçirilir: “Agentlik hotellərdə qastronomiya təlimlərinin keçirilməsi üzrə işləri davam etdirir.

Bundan əlavə, 200 turizm bələdçisinin sertifikatla təmin olunmaları, minə yaxın turizm könüllüsünün müvafiq hotellərə təhkim edilməsi üzrə də tədbirlər keçirilir. Mötəbər tədbirin keçiriləcəyi zaman ölkəmizdə tur bələdçilərinin sayına da xüsusi diqqət yetirilib. Milli park və qoruqların ərazisindəki təbiət və mədəniyyət abidələrində abadlıq işlərinin həyata keçirilməsi, infrastrukturun yenilənməsi, qeyd olunan ərazilərə tur proqramların hazırlanması fəaliyyətləri də davam edir”.

Məsuliyyətli və dayanıqlı turizm potensialı

Ekspert bildirib ki, COP29 Azərbaycanın tarixi, milli-mədəni irsinin tanıdılması ilə yanaşı, ölkəmizin ekoturizm, aqroturizm, məsuliyyətli və dayanıqlı turizm kimi yeni bir sahədə də geniş potensialı haqqında məlumatlarının artırılmasına töhfə verəcək: “Bütün bunlarla yanaşı, Azərbaycan hökuməti tərəfindən COP29 konfransına hazırlıq işləri çərçivəsində ölkəmizə səfər edəcək çoxsaylı rəsmi şəxslər, nümayəndə heyətləri və digər qonaqların rahatlığının təmin olunması istiqamətində bir sıra addımlar atılır. Belə ki, tədbir iştirakçılarının viza müraciəti prosesini sadələşdirərək onların Bakıya səfərlərinin rahat və səmərəli şəkildə təmin olunması məqsədilə COP29 xüsusi vizasının əldə edilməsi üzrə müvafiq portal istifadəyə verilib”.

Yeganə BAYRAMOVA

Paylaş:

Baxılıb: 823 dəfə