Dərs saatı artılır...

Bakı:

28 °C

43 %

3 m/s

Əlaqə

AZ RU EN

Ana səhifə / Sosial / Dərs saatı artılır...

Dərs saatı artılır...

31.12.2023 [11:30]

“Azərbaycan dili” fənni daha çox keçiriləcək

Y.SAHİB

Ölkəmiz müxtəlif dillərdə tədris aparılan məktəblərin olmasına şərait yaradır. Bu gün türk, rus, ingilis, fransız, alman və s. kimi dillərdə və həmin ölkələrin proqramları ilə fəaliyyət göstərən məktəblər və ya bölmələr var. Burada çoxluq rus, ingilis, türkdilli məktəblər arasında ardıcıl olaraq paylanılır.

2019-cu ildə qəbul edilən “Təhsil haqqında” qanunun birinci fəslinin “Tədris dili” maddəsində deyilir ki, Azərbaycan Respublikasının təhsil müəssisələrində dövlət dili - Azərbaycan dilidir. Tədris digər dillərdə aparılan ümumi təhsil müəssisələrində Azərbaycan dili, ədəbiyyatı, tarixi və coğrafiyası tədris olunmalıdır.

Bu günlərdə Elm və təhsil naziri Emin Əmrullayev AzTV-də yayımlanan “Əsas Məsələ” verilişində bir sıra mühüm məqamları qeyd edib. Nazirin sözlərinə görə, tədris digər dillərdə aparılan ümumi təhsil müəssisələrində “Azərbaycan dili” fənninin dərs saatları artırılıb. Azərbaycan tarixi fənni ilə yanaşı “Qarabağ tarixi” və “Zəfər tarixi” fənlərinin də Azərbaycan dilində tədrisinə başlanılıb.

Nazir qeyd edib ki, tədris digər dillərdə aparılan ümumi təhsil müəssisələrində “Azərbaycan dili” fənninin tədris keyfiyyətinin monitorinqi aparılır və bu proses davam edəcək: “Dövlət İmtahan Mərkəzinin (DİM) buraxılış imtahanlarının məlumatları da toplanılır. Bu məsələ ilə bağlı tolerantlıq və güzəşt gözlənilməməlidir”.

E.Əmrullayev bildirib ki, Azərbaycan dilinin inkişafı istənilirsə, mütləq bu dildə uşaqlar üçün maraqlı olan məzmunlar yaradılmalıdır: “Azərbaycan dilinin inkişafı təhsil sahəsi ilə yanaşı, media və siyasətdən də asılıdır. Azərbaycan dilində bu və ya digər səviyyələrdə qurulmuş ünsiyyətin məzmun keyfiyyəti artıqca, bu dilə olan tələbat da artacaq”.

Təhsil üzrə ekspert Nadir İsrafilov “Yeni Azərbaycan”a açıqlamasında tədris digər dillərdə aparılan təhsil müəssisələrində “Azərbaycan dili” fənninin çox keçirilməsinin tərəfdarı olduğunu bildirib. Ekspertin fikrincə, dərs saatı az olduğuna görə, şagirdlər bu fənnə ciddi yanaşmırlar: “ “Təhsil haqqında” qanuna söykənərək digər bölmələrdə təhsil verən məktəblərin qarşısına şərt qoyulmalıdır ki, “Azərbaycan dili”, “Azərbaycan ədəbiyyatı”, “Azərbaycan tarixi” hökmən Azərbaycan dilində tədris olunsun. Bunun nəticəsi o olacaq ki, azərbaycanlı uşaqlar digər dildə təhsil alarkən öz dillərinə yad olmayacaq, öyrənəcək, dilimizin imkanlarına bələd olaraq azərbaycanlı təfəkkürü ilə böyüyərək bəşəri insan olacaqlar”.

N.İsrafilov qeyd edib ki, bu gün Azərbaycanda rus bölməsinə ciddi maraq var: “Əlbəttə ki, bu, valideynlərin öz işi, öz seçimidir. Düşünürəm ki, “Azərbaycan dili” fənni minimum 6 saata qədər qaldırılmalı və həmin məktəblərdə buna əməl edilməsi üçün nəzarət artırılmalıdır. Bəlkə də bu, tez bir zamanda mümkün deyil, çünki tədris proqramı dəyişərsə, dərslik məsələsi ortaya çıxacaq. Amma bunu ilk mərhələdə Azərbaycan bölməsində istifadə edilən dərsliklərlə həll etmək mümkündür”.

Paylaş:

Baxılıb: 730 dəfə