Danışır, “Qarabağ!”

Bakı:

27 °C

57 %

4 m/s

Əlaqə

AZ RU EN

Ana səhifə / Sosial / Danışır, “Qarabağ!”

Danışır, “Qarabağ!”

24.10.2023 [10:54]

8 dildə yeni radio fəaliyyətə başlayıb

Günel ABBAS

Qarabağda radio yayımı heç şübhəsiz günün reallığıdır və bu, bilavasitə informasiya şəbəkəsinin genişləndirilməsi, məlumatların yerli əhaliyə vaxtında çatdırılması, dünya hadisələrindən onların xəbərdar edilməsi istiqamətində vacib addımdır. Bu mənada, Qarabağda AzTV QSC-nin Beynəlxalq Radiosunun fəaliyyətə başlaması da xüsusi əhəmiyyət daşıyır. Daha öncə AM-də yayımlanan radio, 4 aydır 101.1 FM dalğasına keçib.

Qeyd edək ki, ən son xəbərlər azərbaycanca, türkcə, farsca, rusca, ərəbcə, kürdcə, ləzgi, talış və ermənicə yayımlanır.

Media eksperti, professor Qulu məhərrəmli “Yeni Azərbaycan”a açıqlamasında bildirib ki, Azərbaycanda, ümumiyyətlə, beynəlxalq radio sisteminin yaranması və inkişaf etməsi yeni məsələ deyil: “Azərbaycan Dövlət Radiosunun bu sahədə uzun və böyük bir təcrübəsi var. Bizdə Beynəlxalq Radionun yaradılmasının əsası 1941-ci ildə qoyulub. İkinci Dünya müharibəsi başlanandan sonra bir çox dillərdə xəbərlər yaymağa ehtiyac var idi. Ona görə bu sistem işə salındı. Əvvəlcə ərəb dilində, sonra fars dilində, sonra türk dilində, sonra başqa xalqların dillərində və nəhayət, müstəqillik dövründə isə ingilis, fransız, alman dillərində, eləcə də Azərbaycanda yaşayan azsaylı xalqların dillərində radio verilişlər təşkil olunub. İndi hesab edirəm ki, Qarabağda da belə kiçik modelinin yaradılması çox önəmlidir, vacibdir. Çünki bölgədə gedən prosesləri işıqlandırmaq, mürəkkəb proseslərə aydınlıq gətirmək, insanların səsini, sözünü dünyaya çatdırmaq, dünyada gedən prosesləri, həmin bölgənin əhalisinə çatdırmaq çox vacibdir. Hesab edirəm ki, belə bir radionun yaradılması çox müsbət addımdır və onun qarşısına qoyduğu məqsədi reallaşdıra biləcəyinə tam əminəm”.

Milli Məclisin üzvü Tahir Rzayevin sözlərinə görə, bundan sonra da Qarabağda tikinti-abadlıq və quruculuq genişlənəcək, eləcə də informasiya təminatının ödənilməsi üçün ciddi tədbirlər həyata keçiriləcək: Bu, Qarabağda yaşayan erməni əsilli əhali üçün çox vacibdir. Çünki onlar bu günə kimi anti-Azərbaycan təbliğatı altında millətçilik ruhunda tərbiyə olunublar və bu cür mübarizə aparıblar. Azərbaycan həqiqətləri onlara səthi, dar mənada yanlış izah olunub və ölkədə gedən quruculuq işlərindən ermənilər o qədər də məlumatlı deyil. Ancaq Azərbaycan Prezidenti İlham Əliyev dəfələrlə çıxışlarında deyib ki, Azərbaycan vətəndaşlığını qəbul edən ermənilər bizim üçün bir vətəndaşdırlar və onlar üçün ölkədə hər cür imkan, şərait yaradılacaq. Eləcə də bir müddət əvvəl icmaların görüşündə belə bir təklif irəli sürülmüşdü ki, həmin ərazidə televiziya və radio şəbəkəsi, verilişləri tətbiq edilsin. Həmin görüş artıq tez bir zamanda nəticələrini verir. Bu da sevindirici haldır və verilən vədə bir zəmanətdir, bir əməli tədbirdir”.

Paylaş:

Baxılıb: 672 dəfə