Əsir götürülmüş erməni zabiti: Ermənistan ordusunun Azərbaycan Silahlı Qüvvələrinə qalib gəlmək şansı yoxdur

Bakı:

26 °C

52 %

0 m/s

AZ RU EN

Ana səhifə / Sosial / Əsir götürülmüş erməni zabiti: Ermənistan ordusunun Azərbaycan Silahlı Qüvvələrinə qalib gəlmək şansı yoxdur

Əsir götürülmüş erməni zabiti: Ermənistan ordusunun Azərbaycan Silahlı Qüvvələrinə qalib gəlmək şansı yoxdur

27.08.2020 [08:55]

Ermənistan ordusunun diversiya qrupunun əsir götürülmüş komandiri videomüraciət edib
Xəbər verdiyimiz kimi, avqustun 23-də saat 06 radələrində cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupunun komandiri, baş leytenant 1989-cu il təvəllüdlü Qurgen Alaverdyan Azərbaycan Ordusu tərəfindən həyata keçirilmiş tədbirlər nəticəsində müəyyən edilərək saxlanılıb.
AZƏRTAC xəbər verir ki, avqustun 26-da Qurgen Alaverdyanın videomüraciəti yayılıb.
Videomüraciətində 1989-cu il avqustun 14-də Ermənistan Respublikasının Syunik vilayətinin Martuni şəhərində anadan olduğunu deyən düşmən ordusunun zabiti 2015-ci ildən Ermənistan silahlı qüvvələrində xidmətə başladığını deyib. O, zabit qismində Ermənistan Müdafiə Nazirliyinin Ermənistan ərazisində dislokasiya olunmuş 21127 nömrəli hərbi hissəsində xidmət etdiyini, bir müddət sonra Azərbaycan Respublikasının işğal olunmuş Kəlbəcər rayonu ərazisindəki 75937 nömrəli hərbi hissənin kəşfiyyat bölüyündə taqım komandiri vəzifəsində döyüş postlarında xidmətini davam etdirdiyini bildirib: “Təxminən iyul ayının sonunda hərbi hissənin komandiri polkovnik Vazgen Vartanyan mənimlə birgə bir neçə kəşfiyyatçıdan ibarət hərbçiləri, habelə əraziyə yaxşı bələd olan “Hovaz-2” və “Ömər-2” postlarında müdafiəni təşkil edən taqımın komandiri baş leytenant Armen Camalyanın, post başçısı Qrena Hakopyanın daxil olduğu qrupu yanına çağırdı. O, yuxarı komandanlığın göstərişi ilə yaxın vaxtlarda Azərbaycan Respublikasının Silahlı Qüvvələrinin Goranboy rayonunda təmas xətindəki döyüş mövqelərində diversiya törədilməsi, yəni, qumbara və avtomat silahlardan istifadə edərək mümkün qədər çoxlu sayda Azərbaycan hərbçisinin məhv edilməsi, eləcə də bir hərbçinin əsir götürülməsi ilə bağlı əməliyyat keçirilməsi üçün hazırlıq görülməsini tapşırdı. Bundan sonra həmin qrup təxminən 20 gün ərzində xüsusi təlim keçərək ərazini dəqiqliklə öyrənib. Diversiya aktının keçirilməsi üçün “Ovaz-2” postunun qarşısındakı mövqe seçilib və bununla bağlı əməliyyat planı hazırlanıb. Daha sonra həmin diversiya aktının keçirilməsi üçün əlverişli hava şəraitinin yaranması gözlənilib”.
Q.Alaverdiyan rəhbərliyim altında olan diversiya qrupunun avqustun 23-də saat 02:30 radələrində havanın dumanlı olmasından istifadə edərək əvvəlcədən planlaşdırılmış marşrutla Azərbaycan Silahlı Qüvvələrinin Goranboy rayonundakı mövqeləri istiqamətində hərəkət etdiyini deyib: “Biz Azərbaycan Silahlı Qüvvələrinin döyüş postunun ərazisinə daxil olmaq istəyərkən Azərbaycan hərbçiləri tərəfindən verilmiş “Həyəcan” siqnalı əsasında aşkar olunduğumuzu anlayaraq geri qayıtmaq məcburiyyətində qaldıq. Ərazini tərk edərkən qrup üzvləri qaçmağa müvəffəq olsalar da, mən havanın dumanlı olması səbəbindən istiqaməti müəyyən edə bilmədiyim üçün əsir götürüldüm”.
Ermənistan silahlı qüvvələrinin zabiti olaraq Azərbaycanın işğal olunmuş ərazilərində xidmətini davam etdirmək istəmədiyini qeyd edən Q.Alaverdyan hərbi qulluqçu kimi bu ərazidə məcburiyyət qarşısında xidmətə cəlb olunduğunu bildirib: “Törətdiyim əmələ görə peşmançılıq hissi keçirməklə yanaşı, Ermənistan silahlı qüvvələrinin tərkibində mənim kimi xidmət edən bir çox hərbi qulluqçunun Azərbaycanın işğal edilmiş ərazilərində məcburi olaraq xidmətə göndərildiyini bildirmək istəyirəm. Əsir götürüldükdən sonra təsəvvürlərimin tam əksinə olaraq, mənə qarşı heç bir qeyri-insani davranış, işgəncə, təzyiq olunmayıb. Eyni zamanda, qidalanmağım və saxlanma şəraitimlə bağlı heç bir şikayətim yoxdur. Mən Azərbaycan Respublikasında qalmaq istəyirəm, bilik və bacarıqlarımla bu dövlətə xidmət etmək niyyətindəyəm. Mən, həmçinin başa düşdüm ki, Ermənistan ordusunun Azərbaycan Silahlı Qüvvələrinə qalib gəlmək şansı yoxdur”.

Paylaş:

Baxılıb: 501 dəfə