Pandemiya şəraitində məscidlərin dini ayinlərə bağlı qalması insanların sağlamlığının qorunmasına xidmət edir

Bakı:

23 °C

83 %

4 m/s

AZ RU EN

Ana səhifə / Sosial / Pandemiya şəraitində məscidlərin dini ayinlərə bağlı qalması insanların sağlamlığının qorunmasına xidmət edir

Pandemiya şəraitində məscidlərin dini ayinlərə bağlı qalması insanların sağlamlığının qorunmasına xidmət edir

15.08.2020 [01:02]

Ekspertlərin fikrincə, məscidlərdə dini ayinlərin yerinə yetirilməsi zamanı kütləvilik yaşanması COVID-19-a yoluxma riskini artırmış olar

Ölkəmizdə koronavirus pandemiyası (COVID-19) ilə mübarizə çərçivəsində görülən tədbirlərdən biri insanların kütləvi şəkildə toplanmasının qarşısının alınmasıdır. Belə ki, böyük ticarət mərkəzləri, şadlıq evləri, yas mərasimlərinin keçirildiyi məkanlar insanların daha sıx və kütləvi toplandığı ərazilər sayıldığı üçün onların fəaliyyəti müəyyən müddət üçün dayandırılıb. O cümlədən hazırda pandemiya şəraitində məscidlər dini ayinlərə bağlıdır. Bütün bunlar, heç şübhəsiz, insanların sağlamlığının qorunmasına xidmət edir. Çünki insanların kütləvi şəkildə bir məkana toplaşması yoluxma ehtimalını artırır.

Xüsusi vurğulamaq lazımdır ki, qlobal bəlaya çevrilmiş COVID-19 pandemiyası şəraitində bir çox müsəlman ölkəsində müvəqqəti olaraq məscidlərdə ibadət etmək yasaqlanıb. Məsələ ilə bağlı fikirlərini bölüşən Qafqaz Müsəlmanları İdarəsinin (QMİ) sədr müavini Fuad Nurullayev dövlətimizin COVID-19 infeksiyasının ölkədə geniş yayılmasının qarşısının alınması məqsədilə gördüyü tədbirlərin təqdirəlayiq olduğunu bildirib. Koronavirus pandemiyasının qlobal problem olduğunu deyən F.Nurullayev vətəndaşlarımızın sağlamlığının qorunması üçün dövlətimizin bütün lazımi addımları atdığını söyləyib. O qeyd edib ki, son zamanlar müsbət dinamikanın əldə olunmasında karantin qaydalarına riayət olunması mühüm rola malikdir: “Bu gün bir sıra məkanlar müvəqqəti olaraq bağlıdır. Təbii ki, pandemiya ilə əlaqədar artıq aylardır ki, şadlıq evləri və yas mərasimlərinin keçirildiyi məkanlar fəaliyyət göstərmir. O cümlədən məscidlərdə dini ayinlərin yerinə yetirilməsi və ya camaat namazlarının qılınması zamanı kütləvilik qeydə alındığı üçün bu, hələlik məqsədəuyğun hesab edilmir. Xatırlatmaq istəyirəm ki, avqustun 21-dən Məhərrəm ayı daxil olur və avqust ayının 30-da Aşura günüdür. Təbii ki, Aşura ilə bağlı ayinlərin də məscidlərdə kütləvi şəkildə keçirilməsi tibbi baxımdan müəyyən risklər yaradır və bu risk xəstəliyin qarşıdakı dövrdə artımına səbəb ola bilər. Bu, müvəqqəti haldır və inanırıq ki, yaxın zamanda dünyada pandemiya sona çatacaq və insanlar yenidən öz normal həyatlarına qayıdacaqlar. Allah edilən ibadətləri məkanından asılı olmayaraq qəbul edir və bütün ibədətlərimizi ailəmizin içində, ailəmizlə birlikdə keçirə bilərik. Bu xəstəliyin yayılmaması üçün dualar etməli və sağlamlığımızın qeydinə qalmalıyıq, kütləvi şəkildə yığışmamalıyıq. Bunun üçün də dövlətin qərarlarına ehtiram, hörmət və riayət boynumuzda bir haqdır”.

Qafqaz Müsəlmanları İdarəsi fətva və moizə şöbəsinin aparıcı mütəxəssisi, fəlsəfə üzrə fəlsəfə doktoru İbrahim Quliyev isə ölkəmizdə yeni növ koronavirus infeksiyasının geniş yayılmasının qarşısının alınması istiqamətində görülən zəruri tədbirlərin effektivliyini diqqətə çatdırıb. Onun sözlərinə görə, İslam dinində də ən vacib məsələlərdən biri məhz insanların sağlamlığının qorunmasıdır ki, bununla bağlı Qurani-Kərimdə bir neçə ayə mövcuddur: “Dövlətimiz vətəndaşların sağlamlığının qorunması ilə bağlı çox vacib addımlar atıb. Qafqaz Müsəlmanları İdarəsi olaraq biz də vətəndaşlarımızı Operativ Qərargahın tələb və tövsiyələrinə riayət etməyə çağırırıq. Təbii ki, insanların kütləvi toplanması indiki halda müəyyən risklər yaradır və bu da yenidən yoluxma sayında artıma səbəb ola bilər. Bu səbəbdən Operativ Qərargahın məscidlərin müvəqqəti bağlanması ilə bağlı qərarına hörmətlə yanaşırıq”.

“Bu gün dünya dövlətlərində bu hal yaşanır, insanların kütləvi toplaşmaması üçün tədbirlər görülür. Bu amil virusun yayılmasının qarşısının alınmasında ilkin şərtdir. Hətta bir sıra İslam dövlətlərində də belə qərarların şahidi oluruq. Məsələn, İraq dövləti qarşıdan gələn Məhərrəm ayı dövründə Kərbəla şəhərinə girişi və çıxışı qadağan edib. Çalışaq ki, fəaliyyətimizdə, addımlarımızda həm öz həyatımızı, həm də digərlərinin həyatını riskə atmayaq və Operativ Qarargahın tələb və tövsiyələrinə riayət etməklə ölkəmizdə pandemiyanın bitməsinə birgə nail olaq”, - deyə İ.Quliyev əlavə edib.

Pərviz SADAYOĞLU

Paylaş:

Baxılıb: 666 dəfə