Karantin rejimi ilə bağlı bəzi qadağaların yenidən tətbiqi zərurətdən yaranır

Bakı:

19 °C

68 %

4 m/s

Əlaqə

AZ RU EN

Ana səhifə / Sosial / Karantin rejimi ilə bağlı bəzi qadağaların yenidən tətbiqi zərurətdən yaranır

Karantin rejimi ilə bağlı bəzi qadağaların yenidən tətbiqi zərurətdən yaranır

10.06.2020 [09:25]

Ekspertlərin fikrincə, əks təqdirdə, yeni növ koronavirus infeksiyasına yoluxanların sayı çoxala bilər
Yeni növ koronavirus (COVİD-19) infeksiyası ilə bağlı ilkin hallar üzə çıxdığı andan etibarən ölkəmizdə atılan addımlar, reallaşdırılan sosial izolyasiya tədbirləri nəticəsində xüsusi karantin rejimi dövründə yoluxma hallarının sayının minimuma endirildiyi, ölkəmizdə ölüm hallarının çox aşağı səviyyədə olduğu, xüsusi rejimli xəstəxanalarda müalicə olunaraq sağalanların sayının isə yeni yoluxma hallarının sayını kəskin üstələdiyi hər kəsə məlumdur. Lakin təəssüflə qeyd etməliyik ki, xüsusi karantin rejiminin yumşaldılmasının ardından ölkəmizdə bu infeksiyaya yoluxma halları yenidən artıb. Bunun başlıca səbəbi isə vətəndaşların məsələyə, necə deyərlər, loyal yanaşmasındadır. Daha doğrusu, əksər ekspertlərin vurğuladıqları kimi, hazırkı dövrdə pandemiya ilə səmərəli mübarizə bilavasitə vətəndaşların davranışı və məsələyə məsuliyyətlə yanaşmasından birbaşa asılıdır. Qeyd edək ki, son günlərdə yoluxma sayının artması yenidən bəzi qadağaların tətbiqi məsələsini gündəmə gətirib. Bundan başqa, sözügedən qadağalar növbəti həftədən hətta bütün ölkə üzrə tətbiq oluna bilər.
Ekspertlər qeyd edirlər ki, koronavirusa yoluxma riskinin azalması, cəmiyyətin sağlamlığının qorunması üçün hər kəs “evdə qal” çağırışına uyğun davranmalı, sosial məsafə tələbinə əməl etməli, qoruyucu vasitə olan maskadan istifadə olunmalıdır.
Məsələyə münasibət bildirən Milli Məclisin Əmək və sosial siyasət komitəsinin sədri Musa Quliyev son 10 gündə dinamik olaraq yoluxanların sayının sağalanların sayını üstələdiyini və ölənlərin, ağır xəstələrin də sayının artdığını diqqətə şatdırıb. M.Quliyev deyib ki, bu şəkildə davam edərsə bir müddətdən sonra çox çətin tibbi və səhiyyə problemləri ilə üzləşə bilərik: “Bunları nəzərə alaraq karantin rejiminin gücləndirilməsi doğru addımdır. Karantin rejiminin həftə sonu ciddiləşməsi isə bununla əlaqədardır ki, həftə sonu insanlar sərbəstdilər, daha çox lazım olmayan hallarda müəyyən alış-veriş mərkəzlərində, mağazalarda, restoran və kafelərdə toplaşırlar ki, bu da koronavirusun yayılması üçün çox geniş baza yaratmış olur”.
Komitə sədri onu da bildirib ki, indiyə qədər Azərbaycanda bu təcrübənin tətbiq edilməsinə zərurət yox idi, amma görünür, indiki vəziyyət həftə sonu ciddi karatin rejiminin tətbiq edilməsini zəruri edir və gələcəkdə lazım olarsa tam karantin rejiminin də tətbiq edilməsi istisna edilmir.
Milli Məclisin deputatı Fatma Yıldırım da qaydalara əməl edildiyi təqdirdə qadağalara ehtiyac qalmayacağını deyib. Onun sözlərinə görə, əksər insanların koronavirusa hələ də inanmaması, öz sağlamlıqlarını düşünməməsi buna gətirib çıxarıb. Mİllət vəkili qeyd edib ki, xüsusi karantin rejiminin yumşaldılması, bəzi vətəndaşlarda arxayınlıq hissi yaradıb: “Düşünürəm ki, digər ölkələrin təcrübəsində olduğu kimi, küçəyə çıxma qadağasının tətbiqi nəticə verər. Yoluxma sayı minimuma enər. Artıq biz bunu qəbul etməliyik. COVID-19 pandemiyası ilə mübarizədə qalib gəlmək üçün məsuliyyətli olmağımız əsas şərtdir. Birmənalı olaraq hamı maska taxmalı, sosial məsafə saxlamalıdır. Mən bir daha hər kəsə, bölgələrimizdə yaşayan vətəndaşlarımıza da müraciət edərək bildirmək istəyirəm ki, biz birlikdə güclüyük cümləsinin mənasını tam dərk edək, bizim sağlamlığımızın qorunması istiqamətində verilən hər qərarda dövlətimizin yanında olaq. Metodik göstərişlərə riayət edərək, virusa birlikdə qalib gələk”.
Pərviz SADAYOĞLU

Paylaş:

Baxılıb: 343 dəfə