Ramazan ayında qidalanma rejimi necə olmalıdır?

Bakı:

30 °C

38 %

0 m/s

Əlaqə

AZ RU EN

Ana səhifə / Sosial / Ramazan ayında qidalanma rejimi necə olmalıdır?

Ramazan ayında qidalanma rejimi necə olmalıdır?

30.04.2020 [16:48]

Və ya qida qəbulu ilə əlaqədar hansı qaydalara riayət etmək lazımdır?

Ramazan ayında sağlam və faydalı qidalanmaq müzakirə olunan mühüm məsələlərdəndir. Həkim-mütəxəssislər bu barədə müvafiq tövsiyələrini ifadə edərək immuniteti qorumaq üçün qida qəbulu ilə əlaqədar hansı qaydalara riayət etməli olduğumuza dair elmi qənaətlərini diqqətə çatdırırlar. Xüsusi olaraq vurğulanır ki, müqəddəs ayın koronavirusla mübarizə apardığımız bu günlərə təsadüf etməsi isə ikiqat diqqətli və məsuliyyətli olmaq ehtiyacı yaradır.

Balanslı və keyfiyyətli qidalanmaq vacibdir

Azərbaycan Respublikasının Qida Təhlükəsizliyi Agentliyinin (AQTA) Ramazan ayında düzgün qidalanmağın qaydaları barədə məlumatında balanslı və keyfiyyətli qidalanmağın vacibliyi diqqətə çatdırılır. Ramazan ayı yaz fəslinə təsadüf etdiyindən oruc tutarkən aclıq və susuzluğu hiss etmiş oluruq. Bu səbəbdən imsak və iftarda tərkibində maye olan qidalar qəbul edilməlidir. Mütəxəssislər hesab edirlər ki, fasilələrlə qidalanmaq daha çox faydalıdır. Orqanizmin ehtiyacı olan vitaminlərin, mineralların yetərli miqdarda, balanslı olaraq qəbulu mühümdür. Belə qidaların kifayət qədər qəbul edilməməsi orqanizmə mənfi təsir göstərir, fiziki və əqli iş qabiliyyəti zəifləyir.

Səhər yeməyi vitamin və proteinlərlə zəngin olmalıdır

Nəinki Ramazan ayının imsakında, adi günlərdə belə səhər yeməyi mütləq yeyilməlidir. Əgər imsakda düzgün qidalansaq, gün ərzində həm su, həm də enerji balansımızı qorumuş olarıq. Özümüzü yorğun və halsız hiss etmərik. Mütəxəssislər imsakda toxluq müddətini uzadan, bədəndə su saxlayan qidalara üstünlük verməyi tövsiyə edirlər. Həzm problemi yaşamamaq, qanda şəkərin miqdarını normada saxlamaq üçün lifli qidalardan istifadə artırılmalıdır. Tərkibində yumurta olan səhər yeməyinə qatıq, yulaf və çia toxumu əlavə edilərsə, toxluq hissi daha uzunmüddətli ola bilər.

Həzm sisteminin fəaliyyətinin pozulmaması üçün...

AQTA-nın məlumatında o da vurğulanıb ki, həzm sisteminin fəaliyyəti pozulduqda qəbizlik, şişkinlik, qaz problemləri müşahidə oluna bilər. Bu halda, qatıq istehlakı artırılmalı və daha çox meyvə-tərəvəzə üstünlük verilməlidir. Maye olaraq bitki çayı, az şəkərli kompot, ayran və süd kimi məhsullar da bağırsaqların fəaliyyətinə müsbət təsir edir.

Orucu ilıq su ilə açın!

Daha bir faydalı məlumat orucu ilıq su ilə açmaq barədədir. Tövsiyə olunur ki, 1-2 stəkan su içdikdən sonra zeytun, xurma, tərəvəz salatı və göy-göyərti yemək məqsədəuyğundur. 15-20 dəqiqəlik fasilədən sonra isə əsas yeməklərə başlamaq olar. Birbaşa quru qidanın qəbulu həzm problemləri yarada bilər. İlk olaraq sulu yeməklərdən başlamaq məsləhətdir. Qəbul olunan qidalar yaxşı çeynənməlidir ki, həzm problemi yaranmasın. Normadan artıq və fasiləsiz qida qəbul etmək isə ziyandır. Əsas yeməklərdən bir neçə çeşid varsa, birinə üstünlük verilməlidir.

Yağlı yeməklərə üstünlük verilməsi məqsədəmüvafiq deyil

Müvafiq tövsiyələrdə qeyd edilir ki, mümkün qədər az yağlı yeməklər qəbul edilməlidir. Xəmir xörəklərinin, qızartmaların, tərkibində sous olan kalorili yeməklərin ramazan ayı boyunca iftar süfrələrində yer almaması tövsiyə olunur. Acılı, müxtəlif ədviyyatlı qidaların, həmçinin turşuların qida rasionuna daxil edilməsi məqsədəuyğun deyil. 1-2 dilimdən çox çörək yemək məsləhət görülmür.

Şirniyyat və meyvələri yeməkdən dərhal sonra qəbul etmək tövsiyə edilmir

Yeməklərdən dərhal sonra şirniyyat qəbulunun artıq çəkiyə səbəb olması məlumdur. O səbəbdən tövsiyə edilir ki, şirniyyatla əsas menyu yeməyi arasında fasilə ən azı 1-2 saat olmalıdır. Şərbətli şirniyyatların əvəzinə yarım porsiya südlü şirniyyat daha məqbuldur.

Yuxu rejiminə düzgün əməl etmək gərəkdir

İftarla imsak arası bol miqdarda su içilməsi tövsiyəsi faydalı məsələhətlərdəndir. Belə ki, iftardan sonra bağırsağın aktiv fəaliyyəti, qəbul edilmiş qidaların yaxşı həzm olunması üçün hərəkət şərtdir. Oruc tutanlar yuxu rejiminə də düzgün əməl etməlidirlər.

MÜŞFİQƏ

Paylaş:

Baxılıb: 432 dəfə